‘He Ru Ewoma gbe Ọghọ’
1 Ikpe-udhusoi buobu nọ i kpemu no Pọl ukọ na ọ hrẹ Timoti re ọ tuduhọ ibe enọ e rọwo no awọ “re a he ru ewoma re a fe eva iruo iwoma, eva efuafo avọ ọghọ-oruo.” (1 Tim. 6:18) Pọl ọ tẹ jẹ kareghẹhọ Ileleikristi Hibru inọ a siọ “oware uwoma gbe ọghoruo ba ha.” (Hib. 13:16) Fikieme o je kere ehrẹ enana? Fikinọ ọ riẹ nọ “oruaro avọ adhẹẹ gbe udhedhẹ [e te jọ] kẹ enọ i ru uwoma.”—Rom 2:10.
2 Fiki Ọkwa-Ọnọma riẹ, Jihova Ọghẹnẹ họ Ọnowo eware kpobi. (Evia. 4:11) Ma ghine wo ovuhumuo kẹ oware nọ ọ be rehọ ekwakwa riẹ ru k’omai. Ghelọ uruemu ababọ-uyere ahwo-akpọ buobu na, Ọnọ Ọ Mai Kpehru na ọ gbẹ be kẹ ahwo kpobi uvẹ re a wo erere no ọruẹrẹfihọ ọghọ-oruo riẹ ọrọ ẹruọsa uzuazọ ze. (Mat. 5:45) O tube siobọno Ọmọ riẹ nọ ọ mae ghare kpobi ro dheidhe re ma ruẹsi wo uzuazọ ebẹdẹ bẹdẹ. Kọ uyoyou nọ a dhesẹ k’omai na o gbẹ gb’omai họ re ma kẹ uyere ẹkwoma ewoma nọ ma re ru kẹ erivẹ mai?—2 Kọr. 5:14, 15.
3 Eme Ma Rẹ Sae Ghale? U fo re ma rehọ ekwakwa nọ ma wo kpobi ro ruiruo evaọ edhere nọ o kiehọ evaọ aro Ọghẹnẹ. Ẹhẹ ma rẹ tha iruo Uvie akpọ soso na uke evaọ edhere ekwakwa iwo gbe abọ-ẹzi. Uzẹme, emamọ usi na họ efe nọ ọ mai wo aghare nọ ohwo ọ rẹ sai wo, keme oye họ “ogaga usiwo Ọghẹnẹ.” (Rom 1:16) Ẹkwoma unevaze nọ ma rẹ rọ rehọ oke gbe ekwakwa mai ro ruiruo k’amara k’amara re ma w’obọ evaọ iruo usiuwoma ota gbe ewuhrẹ na, ma rẹ sae ghale efe abọ-ẹzi nana kugbe amọfa, nọ u re su ai kpohọ ewo uzuazọ ebẹdẹ bẹdẹ.
4 Eva e rẹ were Jihova evaọ okenọ ma tẹ be tha iyogbere uke. Ọ y’eyaa eghale, ọ tẹ jẹ kareghẹhọ omai nọ: “Efe ọ rẹ kẹ erere evaọ ẹdẹ ofu hu, rekọ ẹrẹriokie o re si ohwo no uwhu.” (Itẹ 11:4; 19:17) Iruo Uvie na nọ ma rẹ tha uke ẹkwoma ekwakwa iwo gbe abọ owo vọvọ evaọ ovuẹ emamọ usi na yọ idhere igbunu nọ ma rẹ sai ro dhesẹ nnọ ma bi ghine ru ewoma, gbe ọghọ.