“Fe Eva Iruo Iwoma”

¹ Evaọ etoke ikpe urere erọ odibọgba ọwhọ riẹ, Pọl ukọ na o ruiruo kugbe Timoti gbe Taitọs kpekpekpe. O kere oghẹrẹ eme uduotahawọ evona se ai omomọvo. Ọ ta kẹ Taitọs nnọ u fo re “otu ahwo nọ a rọwo Ọghẹnẹ no” a “sẹro oma rai kẹ iruo iwoma i ruo.” (Tait. 3:8) Ọ ta kẹ Timoti nnọ enọ i fi ẹruore rai họ Ọghẹnẹ a re “fe eva iruo iwoma.” (1 Tim. 6:17, 18) Onana yọ obọdẹ ohrẹ k’omai kpobi! Rekọ eme ọ rẹ w’omai ru iruo iwoma evaọ izuazọ mai? Kọ didi ugogo iruo ma rẹ sai ru evaọ edẹ nọ e rrọ obaro na?

² Ọwhọ nọ a re ro fe evaọ iruo iwoma o re no orọwọ gbe uyoyou mai kẹ Jihova ze je no obọdẹ ẹruore nọ ọ k’omai na ze. (1 Tim. 6:19; Tait. 2:11) Maero evaọ etoke nana evaọ ukpe na, a rẹ kareghẹhọ omai nnọ Jihova o vi Ọmọ riẹ ziọ otọakpọ re Jesu ọ ruẹsi si afuẹwẹ no odẹ Ọsẹ riẹ je rovie edhere uzuazọ fihọ kẹ ahwo akpọ nọ a te kpobi. (Mat. 20:28; Jọn 3:16) A ti ru onana vevẹ ziezi evaọ ehaa Ekareghẹhọ uwhu Kristi na evaọ March 28. Evaọ owojẹ kpahe ẹruore nọ ma wo ọrọ ewo uzuazọ ibẹdẹ bẹdẹ na, kọ oma o gbẹ be w’omai re ma dao ẹgba mai kpobi re ma “fe eva iruo iwoma”? Nwanọ ere o rrọ! Didi iruo ma rẹ sai ru enẹna?

³ Iruo Iwoma nọ A re Ru Evaọ March gbe Obaro: Ababọ avro, ma ti kpohọ Ekareghẹhọ na—ehaa nọ e mai w’uzou evaọ egbukpe na rọkẹ Isẹri Jihova wariẹ akpọ na họ. (Luk 22:19) Rekọ ma gwọlọ ghale oghọghọ ehaa yena kugbe amọfa buobu. Rri iyẹrẹ iruo na evaọ Uwou-Eroro ọ January 1, 2002, whọ te ruẹ nnọ evaọ ukpe n’ukpo evaọ ekwotọ buobu wariẹ akpọ na họ, ahwo nọ a kpohọ Ekareghẹhọ na a bu vi unu iwhowho-uvie na akuasa, akuane, akuasoi, hayo bu viere. O ghinẹ rehọ omodawọ ogaga mi enọ e rrọ ikoko na kpobi re a ghale uzizie Ekareghẹhọ na nya ekwotọ rai duwu. Fikiere, ma gwọlọ raha utho oke nọ ma rẹ sae raha kpobi no umuo enẹna vrẹ rite March 28 ro zizie ahwo kpohọ Ekareghẹhọ na, fiobọhọ kẹ ae re a wuhrẹ kpahe ẹruore esiwo na.

⁴ Evaọ amara April, ẹvẹ ma sai ro ru iruo ezi nọ ma muhọ evaọ emerae nọ e vrẹ na haro, re ma rọ ere “fe eva iruo iwoma”? Ẹkwoma obọ nọ ma re gbe wo evaọ iruo ewhowho emamọ usi na avọ ọwhọ, “rehọ oma kẹ iruo iwoma iruo.” (Tait. 2:14: Mat. 24:14) Otẹrọnọ whọ sai ru ọkobaro obufihọ evaọ March he, kọ whọ sai ru ere evaọ April gbe/hayo May? Otẹrọnọ who bi ru ọkobaro evaọ March, kọ whọ sae ruabọhọ iẹe?

⁵ Ahwo jọ nọ a re ruiruo okọ a ruẹ nnọ a rẹ sae raha oware wọhọ auwa ọvo ta usiuwoma evaọ okenọ a tẹ rrọ edhere bi kpohọ iruo, ru isẹri-ise iyẹrẹ hayo t’ẹme kẹ ahwo nọ a bi ruiruo okọ nọ a rẹ kaki rovie evaọ irioke. Amọfa a rẹ m’omaa abọjọ oke emu uvo rai rọ ta usiuwoma. Ahwo jọ a ruẹ no nọ a rẹ sai ru uwuhrẹ Ebaibol kugbe ibe oruiruo evaọ etoke yena. Inievo-emetẹ buobu nọ e rrọ eyae-uwou orọo a sae ruẹrẹ oke họ rọkẹ iruo odibọgba na no evaọ okenọ emọ rai e rrọ obọ isukulu. Ẹkwoma ẹkake kparoma evaọ edẹ jọ re a rẹrote iruo uwou rai, a re wo uvẹ evaọ oke uvo nọ a rẹ rọ ta usiuwoma je wuhrẹ amọfa.—Ẹf. 5:15, 16.

⁶ O tẹ make rọnọ whọ sai ru ọkobaro obufihọ họ, ẹsejọhọ whọ sae m’omaa omobọ ra re who wo obọ viere evaọ odibọgba na, dao ẹgba ra kpobi re who “ru ewoma re [who] fe eva iruo iwoma, eva efuafo avọ ọghọ-oruo” nọ whọ rẹ rọ ghale uzẹme na kugbe amọfa.—1 Tim. 6:18.

⁷ Kareghẹhọ Iruo Iwoma ọrọ Ilele Iruo Na: K’ukpe k’ukpe ma re wo ahwo nọ a wo isiuru nọ a rẹ ziọ Ekareghẹhọ na. Kọ o sae lọhọ re ahwo jọ evaọ ukoko na a kpovao ri ahwo nọ a ziọ ehaa na rekiyọ a bi wuhrẹ obe enẹna ha? Kọ a sai zihe bru rai avọ ẹjiroro ọ obọ nọ a re fihọ kẹ ae re a ru ẹnyaharo abọ-ẹzi? O sae jọ nọ ahwo nana jọ nọ e ziọ Ekareghẹhọ na yọ imoni ọ Isẹri. Efa e sae jọ ahwo nọ a je wuhrẹ obe evaọ okenọ u kpemu vẹre yọ uduotahawọ ọvo họ oware nọ a gwọlọ re a wariẹ muhọ ewuhrẹ je kpohọ iwuhrẹ kẹse kẹse. Dai roro oghọghọ nọ u re noi ze re ma rue rai nọ a zihe ruọ idibo ọwhọ Jihova kuomagbe omai!

⁸ Ẹkwoma abọ nọ ma re wo viere evaọ odibọgba na evaọ etoke March gbe evaọ obaro, ma sai duku amọfa nọ a wo isiuru nọ ma re zihe bru. Daoma fi onọ jọ h’otọ kẹ ae re whọ tẹ nya vrẹ. Whọ vẹ y’eyaa nọ whọ te za onọ na evaọ oke ofa nọ who zihe. Enẹ oruo, o re rovie edhere fihọ kẹ ozihebro. Epanọ ma zihe vẹrẹ te, ere u re woma te. Otẹrọnọ ma sai muọ uwuhrẹ họ evaọ iweze ọsosuọ na ha, o tẹ lọhọ ma rẹ daoma re ma mu ojọ họ evaọ iweze avivẹ na.

⁹ Ma tẹ rrọ isẹri-ise iyẹrẹ, ma re fiẹrohotọ rọkẹ ẹme emuhọ kugbe ahwo. Ahwo nọ a wo isiuru nọ a nya ku evaọ oke isẹri-ise iyẹrẹ a rọ edẹ, adrẹse, gbe inọmba ifonu rai kẹ iwhowho-uvie buobu no. Otẹrọnọ ohwo nọ who lele t’ẹme na ọ be rria ẹkwotọ ra ha, rehọ efọmo ọ Please Follow Up (S-43) na evaọ obọ Ọgwa Uvie na, kere eme fihọ iẹ, re whọ rehọ iẹ kẹ okere-obe ukoko na, ọnọ o ti vi ei se ukoko nọ u wo ẹkwotọ nọ ohwo na ọ be rria na. Otẹrọnọ okere-obe na ọ gbẹ sai ru ere he, o ti vi ei se uwou-ogha na re a ruiruo kpahe iẹe. Evaọ edhere otiọna, a sae bọ isiuru na haro.

¹⁰ Otẹrọnọ ohwo na o wo ifonu ọ jẹ kẹ owhẹ inọmba na orọnọ adrẹse he, ru ozihebro ẹkwoma ohwo na nọ who re fonu. Kake ruẹrẹ ẹme nọ whọ te ta kpahe. Jọ omobe ọ Ebaibol E rọ Jiroro o j’owhẹ obọ re whọ hae sai rri kpohọ iẹe vẹrẹ vẹrẹ. Ahwo jọ a wo obokparọ ziezi no evaọ obe uwuhrẹ kugbe ahwo evaọ ifonu, kugbe ahwo nọ o jọ bẹbẹ kẹ ae re a dihọ uwou vẹre. Oniọvo-ọmọtẹ jọ o muọ inọmba ifonu họ ẹnọ mi eyae nọ i wo isiuru nọ ọ nya ku evaọ usiuwoma n’uwou ruọ uwou, fikiere ọ tẹ sai mu iwuhrẹ Ebaibol ivẹ họ.

¹¹ Ruiruo-Kugbe Ekpako na Evaọ Obufihọ kẹ Enọ E Siọ Iruo Uvie Ba No: Ekpako na i wo isiuru gaga kpahe ẹruorote oyoyou ọrọkẹ ahwo nana. Ibuobu ahwo itieye na, avọ iroro obọ rai, a muọ iwuhrẹ ukoko họ ẹnya no. A vuhu ẹgwọlọ nọ a re ro wo usu okpekpe kugbe ukoko Jihova mu re a ruẹsi wo omofọwẹ abọ-ẹzi nọ a dhesẹ evaọ Olezi avọ 91 na. Ahwo nana jọ a ruẹrẹ oma kpahe no re a wariẹ w’obọ evaọ iruo usiuwoma ota na. Otẹrọnọ amọfa nọ a siọ iruo uvie ba no a ziọ Ekareghẹhọ na amara nana, ẹsejọhọ a ti dede uwuhrẹ Ebaibol omobọ ohwo rehọ. O tẹ rrọ ere, ekpako na i re ru ọruẹrẹfihotọ re ohwo jọ o wuhrẹ obe kugbe enọ e gwọlọ obufihọ. A te zizie owhẹ re who fiobọhọ evaọ abọ nana, ẹmeoyo ra ọ te were omai gaga.—Rom 15:1, 2.

¹² Ruabọhọ ‘Ẹyọrọ Iruo Iwoma’: Ahwo buobu nọ a w’obọ evaọ iruo ọkobaro no evaọ amara ọvo hayo bu viere a ruẹ no inọ iruo usiuwoma ota rai i vi haro evaọ emerae efa nọ i lele i rie. A nya ku ahwo nọ a wo isiuru nọ a ruẹ nnọ u fo re a zihe bru. Onana o kẹ rai ọwhọ re a daoma viere kpohọ usiuwoma ota vi epaọ ọsosuọ re a ruẹse wariẹ lele enọ i wo isiuru na t’ẹme. Ejọ i muọ ebe-iwuhrẹ họ, yọ oyena u fiobọhọ kẹ ae w’obọ viere evaọ odibọgba na.

¹³ Efa jọ e ruẹ oghọghọ buobu evaọ erubuo iruo usiuwoma ota gbe ilele-iruo na no te epanọ a rọ wariẹ roro kpahe eware nọ e mae r’oja evaọ uzuazọ rai. Fikiere, ejọ i ti bru oke jọ no iruo okọ rai a te zihe ruọ ekobaro obufihọ erọ ikẹse kẹse. Amọfa a sae ruọ iruo ọkobaro oke-kpobi na no. A fi ẹruore rai họ Ọghẹnẹ vọvọ viere no viukpọ eware nọ akpọ na ọ rẹ kẹ. A ruẹ no inọ ewo “eva efuafo avọ ọghọ-oruo,” o wha eghale no obọ Jihova ze se ai jẹ bọ ẹruore rai ọrọ ẹriọ awere “uvi uzuazọ” na ga no. (1 Tim. 6:18, 19) Uzẹme, nọ amọfa a be ruọ iruo ọkobaro oke-kpobi na, ukoko na soso u re wo erere. Ekobaro e rẹ t’ẹme kpahe eware nọ a rọ ẹro ruẹ je zizie amọfa re a w’obọ kugbe ae evaọ odibọgba na, yọ onana o rẹ kpare emamọ uyero abọ-ẹzi ze evaọ ukoko na.

¹⁴ Jọ mai kpobi ma “fe evaọ iruo iwoma” evaọ ezi Ekareghẹhọ nana gbe evaọ obaro ẹkwoma erubuo ẹkẹ abọ mai evaọ odibọgba Ileleikristi na. Joma dhesẹ ovuhumuo mai via rọkẹ eware nọ Jihova o ru no evaọ ẹruore nọ ọ k’omai ọrọ ẹria bẹdẹ bẹdẹ evaọ otọakpọ okpokpọ ukiẹrẹe na.—2 Pita 3:13.