“Ru Iruo Ezi Kẹ Ahwo Kpobi”
1 ‘Vuẹ Ẹme Ọghẹnẹ na Vọvọ’ gbe “Fe Eva Iruo Iwoma” yọ izoẹme nọ a ro ruiruo evaọ uko-obeva ọ Odibọgba Uvie Mai ọrọ February gbe March 2002. (Kọl. 1:25; 1 Tim. 6:18) Evaọ ivitha eyena a tuduhọ omai awọ re ma dawo oma viere ro fiobọhọ kẹ enọ i wo isiuru re a kpohọ Ekareghẹhọ na, re ma fiobọhọ kẹ enọ e siọ iruo uvie ba no re a muọ iruo họ evaọ ukoko na, re ma je fiobọhọ kẹ emọ mai gbe emọ-uwuhrẹ Ebaibol nọ i te re a muọ emamọ usi na họ ewhowho. Ababọ avro, ma reawere obokparọ jọ no fiki obọdẹ omodawọ mai. Enẹna, “nọ uvẹ o gbẹrọ na, joma [ruabọhọ] iruo ezi kẹ ahwo kpobi.”—Gal. 6:10.
2 Zizie Ai re A Wariẹ Nya: Evaọ Nigeria, ahwo nọ a bu vi 250,000 nọ e rrọ iwhowho-uvie emamọ usi na ha a re kpohọ Ekareghẹhọ na k’ukpe k’ukpe. Nọ ẹnyaze rai o dhesẹ isiuru jọ via na, eme ma re ru hrọ re ma fi ajọwha họ enọ “a ro mu kẹ uzuazọ ebẹdẹ bẹdẹ” na re a zihe ruọ enọ e “rọwo”? (Iruẹru 13:48) Tuduhọ ae awọ re a wariẹ ziọ iwuhrẹ ukoko na ababọ oke oraha.
3 Kọ eme who gbe zizie ahwo nọ a wo isiuru re a kpohọ Uwuhrẹ Obe Ukoko na re a reawere ẹmeọta isiuru ọrọ obe Eriariẹ na ha? Otẹrọnọ whẹ yọ omoni hayo ogbẹnyusu ohwo na, yọ a kẹ owhẹ ẹme nọ who ti ru evaọ Isukulu Odibọgba Esuo-Ọghẹnẹ nọ ọ be tha na, whọ sai zizie ohwo na re ọ nyaze te kezọ kẹ ẹme ra na. Vuẹe kpahe izoẹme evuẹ ogbotu nọ a te kẹ evaọ obaro. (A re fi omaa evuẹ etoke na họ ebọdo evuẹ na.) Gwọlọ uvẹ kpobi nọ whọ rẹ rọ kpare isiuru ohwo na re ọ gọ Jihova. Yọ, otẹrọnọ o ti muọ Ebaibol na họ ewuhrẹ kugbe ohwo jọ evaọ ukoko na ha, whọ sae rehọ ẹwo ta kẹe kpahe obe uwuhrẹ.
4 Gbẹ Hae Tuduhọ Enọ E Siọ Iruo Uvie Ba no Na Awọ: Ejọ nọ e be ziọ Ekareghẹhọ na a roma mudhe kẹ Jihova no vẹre. Dede na, evaọ okejọ a tẹ siọ ewhowho emamọ usi na ba. Rekọ Pọl ọ tuduhọ omai awọ re ma “ru iruo ezi . . . mae ro kọ rọ kẹ otu nọ ọrọ ẹgba orọwọ na.” (Gal. 6:10) Fikiere, enọ e siọ iruo uvie ba no na e rẹ mae jọ omai oja.
5 Ẹsejọhọ ahwo jọ a j’owọ no lele uduotahawọ nọ ekpako na gbe amọfa a kẹ re a wariẹ duomahọ iruo odibọgba na. Otẹrọnọ ekpako na a rọ owhẹ mu re who lele owhowho-uvie nọ ọ wariẹ mu iruo uvie họ kpohọ usiuwoma, riẹ nnọ uyoyou ra kẹ Jihova jẹ rọkẹ iruo odibọgba na o te bọ evaifihọ ohwo na ga. Dhesẹ epanọ who bi ro ru abọ sa-sa ọ odibọgba na kẹe re ọ sae jariẹ ruẹ oghọghọ, re ọ ruabọhọ iruo usiuwoma ota na, jẹ sae ruẹ eghale Jihova.
6 Kẹ Iwhowho-Uvie Ekpokpọ Emamọ Emuhọ: Okenọ aye jọ nọ o wo isiuru obọ o vuhumu nnọ ọ ruẹ ukoko uzẹme orọ Ọghẹnẹ no, ọ tẹ gwọlọ muọ usiuwoma họ ẹta ovavo. Nọ ọ riẹ oware nọ a gwọlọ mi ei no, ọ tẹ ta nnọ: “Joma muhọ ovavo.” Otẹrọnọ a kuenu kẹ ohwo jọ nọ who bi wuhrẹ Ebaibol kugbe no re o muọ obọ họ ewo evaọ usiuwoma ota, fiobọhọ kẹe ruẹ ẹgwọlọ nọ o re ro “muhọ ovavo,” whọ vẹ rehọ ere kẹ owhowho-uvie ọkpokpọ na emamọ emuhọ. Fiobọhọ kẹe wo uruemu omaruẹrẹhọ kẹ gbe obọ uwo kẹse kẹse evaọ odibọgba na k’oka k’oka.
7 Otẹrọnọ ọmọ obọ ra họ ọnọ o zihe ruọ owhowho-uvie ọkpokpọ nọ ọ re họ-ame he na, lele iei ruiruo re o wo ẹnyaharo wọhọ epanọ ikpe gbe ẹgba riẹ o mu. Avọ umutho obufihọ jọ n’obọ ra ze, u ti gbe owhẹ unu nọ whọ tẹ ruẹ oghẹrẹ nọ ọ te rọ ta usiuwoma k’ohwo jọ, se no Ebaibol na ze, je fi obe họ ada. Ọ tẹ nyaku ohwo nọ o wo emamọ isiuru evaọ usiuwoma, wuhrẹ iẹe re o ru ozihebro re o je lele isiuru na.
8 Ru Odibọgba Ra Kẹre: Kọ iyero ra e k’owhẹ uvẹ re who ru ẹkabọ ra evaọ iruo usiuwoma ota na rro viere tubẹ vrẹ ezi Ekareghẹhọ na? Kọ whọ sai ku auwa ọvo hayo ivẹ kugbe oke nọ whọ rẹ raha evaọ usiuwoma ota vẹre k’oka k’oka? Kọ who bi rri kparo evaọ ukeledẹ na kpohọ okenọ whọ sae rọ wariẹ ru ọkobaro obufihọ? Hayo kọ whọ sae ruẹrẹ edhere uzuazọ ra họ re whọ ruọ iruo odibọgba oke-kpobi na? Omodawọ kpobi nọ ma ru evaọ odibọgba na o rẹ sai fiobọhọ kẹ ohwo jọ jẹ uzẹme na rehọ! (Iruẹru 8:26-39) Nọ ma bi rri kpohọ edẹ obaro na, joma ‘hae gwọlọ ru ewoma kẹ ohwohwo jegbe ahwo kpobi kẹse kẹse.’—1 Tẹs. 5:15.
[Box on page 3]
Gbẹ Hai Fiobọhọ Kẹ:
□✔ Ahwo nọ a kpohọ Ekareghẹhọ
□✔ Iwhowho-uvie nọ e wariẹ muọ iruo uvie họ no
□✔ Iwhowho-uvie ekpokpọ nọ e re họ-ame he