Ẹkọ Buobu Ọ rẹ Wha Eghale Ibuobu Ze
1 Mai kpobi ma bi rri kparo kpohọ orugba eyaa igbunu nọ e rrọ Ẹme Ọghẹnẹ na. Makọ enẹna, Jihova ọ be kẹ eghale buobu nọ e rẹ wha evawere ziọ uzuazọ mai. Dede na, epanọ erere nọ ma re wo kẹ oma mai ọ rẹ rro te o roma hwa omodawọ mai gaga. Wọhọ epanọ Pọl ukọ na o fi rie họ, “[ọnọ] ọ kọ buobu [ọye] ọ rẹ kọrọ buobu.” (2 Kọr. 9:6) Roro kpahe eria ivẹ jọ nọ ehri-uzi nana u je wo iruo.
2 Odibọgba Mai: Ẹghale emamọ usi na kugbe ahwo evaọ okenọ ma te wo uvẹ nọ ma sai ro se-isẹri o rẹ wha irere buobu ze. (Ite 3:27, 28) U fo ejiro inọ, ibuobu e be kọ buobu ẹkwoma erukẹre iruo rai evaọ odibọgba na, te iruo ọkobaro obufihọ hayo ọrọ oke-kpobi. Mai kpobi a rẹ sae kọ buobu ẹkwoma ezihe re ma bọ isiuru kpobi nọ ma duku gbe ẹkwoma uwuhrẹ Ebaibol nọ ma rẹ kẹ evaọ oke kpobi nọ uvẹ na u te rovie. (Rom 12:11) Oma mai nọ ma rẹ dao gaga evaọ idhere enana o rẹ sae wha iyẹrẹ ọbọga ze u ve je ru oghọghọ mai evaọ odibọgba na vihọ aro.
3 Uketha kẹ Isiuru Uvie: Pọl ọ ta ẹme ọ ‘ẹkọ buobu’ na kpahe ẹkẹ ọrọ ekwakwa iwo. (2 Kọr. 9:6, 7, 11, 13) Nẹnẹ na, eware buobu e riẹ nọ ma rẹ sai ru rọ tha isiuru Uvie na uke evaọ edhere ugbobọ gbe edhere ekwakwa iwo. Ma rẹ sai fi obọ họ evaọ ebabọ Egwa Uvie gbe Egwa Okokohọ. Ma rẹ sae fialoma via re ma w’obọ evaọ erufuọ gbe ẹruorote eria egagọ uzẹme enana. Fibae, ma rẹ sae zọhọ ugho rọkẹ araha ukoko mai jẹ rọkẹ iruo ewhowho ovuẹ Uvie gbe ilele-iruo na. Nọ mai kpobi ma bi ru ẹkẹ abọ mai na, ẹvẹ eva e rẹ were omai te nọ ma be ruẹ eghale Jihova buobu nọ ọ wha fihọ iruo nana nọ Ọghẹnẹ ọ kẹ udu riẹ na!—Mal. 3:10; Luk 6:38.
4 Ẹme Ọghẹnẹ ọ ta udu họ omai awọ inọ ‘ma hai ru ewoma re ma fe eva iruo iwoma, eva efuafo avọ ọghọ-oruo.’ Ma te bi yo ohrẹ oyena, ma rẹ reawere eghale buobu enẹna. Eva oke ovo na, yọ ‘ma bi fi otọhotọ uwoma họ kẹ oma mai rọkẹ obaro gbe uvi uzuazọ’ nọ o be tha na.—1 Tim. 6:18, 19.