Omaa Uviuwou—Iwuhrẹ Ukoko
1 Otẹrọnọ whẹ yọ ọsẹ hayo oni nọ ọ rrọ Oleleikristi, whọ gwọlọ nọ emọ ra e rro whẹro re a you Jihova jẹ gọe, ukuhọ riẹ a ve wo uzuazọ ibẹdẹ bẹdẹ evaọ akpọ ọkpokpọ nọ Ọghẹnẹ ọ ya eyaa riẹ. Kọ ẹvẹ whọ sai ro fiobọhọ kẹ ae re a rọ egagọ Jihova karo evaọ uzuazọ rai? Ugogo edhere jọ họ ẹkwoma oriruo nọ who re fihọ otọ kẹ ae. (Itẹ 20:7) Be kareghẹhọ oriruo oni riẹ nọ ọ jọ Osẹri Jihova, oniọvo-ọmọtẹ jọ ọ ta nọ: “Ma rehọ ewuhrẹ ọnya fihọ oware u je omai ma nya hayo u je omai ma seba ha.” Onana o kẹ riẹ ajọwha gaga.
2 Kọ uviuwou ra u wo ovuhumuo kẹ ẹjiroro nọ ma bi ro kpohọ iwuhrẹ ukoko? Ithubro nọ ma rẹ jọ iwuhrẹ na wo e rẹ k’omai ẹgba rọ ruabọhọ oreva Ọghẹnẹ uruo, yọ usu-okpekpe nọ ma rẹ reawere riẹ kugbe inievo mai na yọ ehri uduotahawọ nọ u wo ibe he. (Aiz. 54:13; Rom 1:11, 12) Rekọ, ugogo ẹjiroro iwuhrẹ itieye na họ re ma jiri Jihova “eva udevie ogbotu na.” (Ol. 26:12) Iwuhrẹ ukoko e rẹ k’omai uvẹ nọ ma re ro dhesẹ uyoyou mai kẹ Jihova jẹ gọe.
3 ‘Fi Ẹro họ Otọ’: Ovuhumuo kẹ ẹjiroro ọfuafo iwuhrẹ mai o rẹ wọ omai ‘fi ẹro họ otọ’ nọ ma gbẹ rọ ẹrera muọ uruemu nọ iwuhrẹ i re ro vo omai họ ewo ho fiki eware jọ nọ i wuzou tere he. (Ẹf. 5:15, 16; Hib. 10:24, 25) Nọ who te bi ru omaa uviuwou ra, whọ sae rehọ oke iwuhrẹ ukoko mu omaa na họ. Wha ve muẹrohọ nọ eware efa e rẹ whrẹrẹ ruọ oke iwuhrẹ na ha. Wha muẹrohọ nọ iwuhrẹ ukoko nọ a rẹ nya yọ oware nọ uviuwou ra o rọ karo.
4 Oma o gbẹ wọ omai nọ ma te se kpahe inievo mai nọ i fi ebẹbẹ kparobọ re a sai kpohọ iwuhrẹ gbe ikokohọ? Dede nọ iyero ra i ti wo ohẹriẹ, whọ be rẹriẹ ovao dhe use-abọ re. Setan o bi ru ei ga ẹgẹga kẹ ahwo Ọghẹnẹ re a siọ Jihova ba ẹgọ. Ghele na, wo imuẹro inọ emọ ra i ti gine muẹrohọ oma nọ uviuwou rai o be dawo re a kpohọ iwuhrẹ ukoko. Evaọ uzẹme, ẹkwoma ere oruo, whọ sae kẹ ae okẹ abọ-ẹzi jọ nọ o te thọrọ ae ẹro vievie he.