Usiuwoma Ota U re Fi Obọ họ kẹ Omai Thihakọ
1 Ẹme Ọghẹnẹ ọ tuduhọ omai awọ inọ ma “rehọ oriori dhẹ ohrẹ nọ a fihọ kẹ omai na.” (Hib. 12:1) Wọhọ epanọ ọdhẹ-ohrẹ ọ gwọlọ ithihakọ re ọ sae dhẹ te oka na, ere ọvona ma gwọlọ ithihakọ re ma sai wo osa uzuazọ ibẹdẹ bẹdẹ. (Hib. 10:36) Ẹvẹ odibọgba Oleleikristi na ọ sai ro fiobọhọ k’omai rọ ẹrọwọ thihakọ te urere?—Mat. 24:13.
2 O be Bọ Omai Ga Evaọ Abọ-Ẹzi: Ewhowho nọ ma bi whowho eyaa igbunu Ebaibol orọ akpọ ọkpokpọ ẹrẹreokie na u re fiobọhọ ru nọ ẹruore mai o je muẹro. (1 Tẹs. 5:8) Ma te bi kpohọ usiuwoma ota ẹsikpobi, ma re wo uvẹ nọ ma rẹ rọ ta uzẹme nọ ma wuhrẹ no Ebaibol ze no via. Ma wo uvẹ nọ ma rẹ rọ tha ẹrọwọ mai uke, nọ o rẹ rọ ere bọ omai ga evaọ abọ-ẹzi.
3 Re ma sai wuhrẹ amọfa ziezi, ma re wo otoriẹ uzẹme Ebaibol na kẹ omobọ mai tao. Ma re ru ekiakiẹ je roro didi kpahe ẹme na. Oma nọ ma rẹ dawo evaọ edhere nana u re ru otoriẹ mai rro, bọ ẹrọwọ mai ga, jẹ sasa omai oma evaọ abọ-ẹzi. (Itẹ 2:3-5) Fikiere, nọ ma be gwọlọ fiobọhọ kẹ amọfa na, yọ ma be bọ oma mai ga re.—1 Tim. 4:15, 16.
4 Ajọwha nọ ma re ro wobọ evaọ odibọgba na yọ abọjọ nọ o wuzou evaọ “ẹgọ-ẹmo Ọghẹnẹ” na, nọ ma gwọlọ re ma sai dikihẹ ga kẹ Ẹdhọ avọ idhivẹri na. (Ẹf. 6:10-13, 15) Obọ nọ ma re wo ẹsikpobi evaọ iruo Ọghẹnẹ u re fiobọhọ k’omai tẹrovi eware ọbọga je ru nọ akpọ Setan ọ gbẹ raha omai hi. (Kọl. 3:2) Nọ ma bi wuhrẹ amọfa idhere Jihova na, yọ ma be kareghẹhọ oma mai ẹsikpobi oware nọ o jẹ gwọlọ nọ ma yọrọ uruemu ofuafo.—1 Pita 2:12.
5 Ẹgba nọ Ọghẹnẹ Ọ rẹ kẹ: Orọ urere, obọ nọ ma re wo evaọ iruo odibọgba na u bi wuhrẹ omai nọ ma fi eva họ Jihova. (2 Kọr. 4:1, 7) Ẹvẹ oyena o rrọ oghale te! Evaifihọ itieye na nọ ma re wo orọnikọ o rẹ ruẹrẹ omai kpahe re ma ru odibọgba mai gba ọvo ho rekọ u re fiobọhọ k’omai yeri lele uyero kpobi nọ ma nyaku evaọ uzuazọ. (Fil. 4:11-13) Evaọ uzẹme, epanọ a rẹ rọ rehọ ẹro so Jihova nọ ma re wuhrẹ họ otọhotọ kẹ ithihakọ. (Ol. 55:22) Evaọ idhere buobu, usiuwoma ota u re fiobọhọ k’omai thihakọ.