Dhesẹ Oruaro Jihova Via
1 Ọso-ilezi na o whowho nọ: “Jọ akpọ kpobi, ọ suile ọkpokpọ kẹ ỌNOWO! . . . Dhesẹ oruaro riẹ via kẹ erẹwho akpọ na, jegbe iruo urirẹ riẹ eva udevie ahwo na!” Nọ ma bi roro kpahe eware nọ Jihova o ru no, enọ o bi ru enẹna, gbe enọ o ti ru k’omai evaọ obaro, udu mai o rẹ w’omai re ma dhesẹ oruaro riẹ via!—Ol. 96:1, 3.
2 Evaọ Odibọgba Mai: Isẹri Jihova a wo uvẹ-ọghọ nọ a be rọ rehọ odẹ Ọghẹnẹ se ai je bi whowho iei nya akpọ soso wariẹ. (Mal. 1:11) Ohẹriẹ nọ o rrọ udevie rai avọ isu-ichọche Kristẹndọm nọ e rọ omorro si odẹ Ọghẹnẹ no efafa Ebaibol no o rro kẹhẹ! Iruo nọ a rẹ rọ vuẹ amọfa kpahe odẹ Ọghẹnẹ o rọ kpata kpata, nọ o rrọ nọ ahwo a rẹ rọ ẹrọwọ se odẹ yena re a sae zọ vrẹ uye ulogbo nọ o be tha na. (Rom 10:13-15) Ofariẹ, udhedhẹ ehru gbe akpọ, onọ o kẹre te eware kpobi nọ e be rria akpọ na, o roma wha erufuọ odẹ Ọghẹnẹ. Evaọ uzẹme, iruo Ọghẹnẹ kpobi i wobọ kpahe odẹ riẹ.
3 ‘Jihova ọ re ruaro, a rẹ rehọ ujiro ulogbo kẹ e.’ Rekọ re ahwo a sae ‘rehọ oruaro nọ u te odẹ Jihova rọ kẹ e,’ a rẹ riẹ uzẹme na kpahe iẹe. (Ol. 96:4, 8) Dede na, ahwo jọ a vro inọ Ọghẹnẹ ọ rrọ họ. (Ol. 14:1) Amọfa a be tae raha inọ o wo ẹgba ha, hayo inọ o wo isiuru kpahe iruẹru ahwo-akpọ họ. Nọ ma bi fiobọhọ kẹ ahwo udu oruọzewọ re a wo eriariẹ egbagba kpahe Ọnọma omai, ẹjiroro riẹ, gbe iruemu iwoma riẹ na, yọ ma be wha orro se Jihova.
4 Ẹkwoma Uruemu Mai: Ẹria lele itee ikiẹrẹe Jihova o rẹ wha orro sei. Uruemu uwoma mai u re vo ẹro vievie he. (1 Pita 2:12) Wọhọ oriruo, ẹgọ gbe osẹ mai nọ ọ rrọ fuafo tẹtẹtẹ jẹ rrọ kpatiẹ e rẹ lẹliẹ amọfa ta eme iwoma kpahe omai, k’omai uvẹ nọ ma rẹ rọ ta kpahe irere nọ i re no ẹria lele ithubro nọ e rrọ Ebaibol na ze. (1 Tim. 2:9, 10) Ẹvẹ eva e rẹ were omai te nọ amọfa a tẹ ‘ruẹ iruo iwoma mai a ve jiri Ọsẹ mai nọ ọ rrọ obọ odhiwu’!—Mat. 5:16.
5 Joma rehọ ẹkwoma ẹme gbe uruemu mai jiri Ọghẹnẹ oride mai kẹdẹ kẹdẹ, rọ ere jẹ uzizie oghọghọ na rehọ: “Suole kẹ ỌNOWO, oghale u te odẹ riẹ; ta eme usiwo riẹ kẹdẹ kẹdẹ.”—Ol. 96:2.