Oware nọ Odibọgba Mai O bi Rugba
1 Ẹme Ọghẹnẹ o dhesẹ Ileleikristi wọhọ enọ e be nya avọ obokparọ evaọ iruo Jihova, wọhọ nọ a rrọ uje obokparọ. (2 Kọr. 2:14-16) Nọ ma bi wuhrẹ ahwo eriariẹ Ọghẹnẹ na, iruẹru akpẹwẹ mai e wọhọ insẹnse nọ i bi gbo ore awere se Jihova. Awere emamọ usi na u bi si ahwo jọ uru; amọfa a be se iẹe. Rekọ dedenọ ibuobu e be gaviezọ họ, oyena u dhesẹ nọ iruo mai ifofe he. Muẹrohọ oware nọ odibọgba mai o bi rugba.
2 Jiri Jihova: Setan ọ ta inọ fiki oriobọ ahwo-akpọ a be rọ gọ Jihova. (Job 1:9-11) Odibọgba Oleleikristi na ọ k’omai uvẹ nọ ma re ro dhesẹ inọ omarọkẹ mai kẹ Ọghẹnẹ o rrọ orọ oriobọ họ. Ghelọ iyero ebẹbẹ omobọ-ohwo gbe ababọ isiuru nọ ahwo a bi dhesẹ, iwhowho-uvie buobu a bi yoẹme kẹ ujaje nọ a rẹ rọ ta usiuwoma je ru ilele na. Ithihakọ omarokpotọ itieye na i re ru udu Jihova ghọghọ!—Itẹ 27:11.
3 Fibae, Odibọgba mai o wobọ re evaọ erugba ẹjiroro Ọghẹnẹ. Rọ kpahe ọraha nọ o ti te akpọ Setan eva obaro kẹle na, Jihova ọ ta nọ: “Erẹwho na kpobi a vẹ te riẹ nọ mẹ họ ỌNOWO na.” (Izik. 39:7) Re erẹwho na e riẹ onana, o roja re idibo Ọghẹnẹ a ruabọhọ ewhowho odẹ gbe ẹjiroro riẹ “rọkẹ erẹwho gbe erua gbe evẹrẹ gbe ahwo kpobi.”—Evia. 14:6, 7.
4 Otọhotọ Rọkẹ Ẹdhoguo: Ewhowho emamọ usi na o tẹ jẹ rrọ otọhotọ rọkẹ ẹdhoguo. Pọl ukọ na ọ ta inọ Kristi Jesu ọ te rehọ ọraha te “enọ e riẹ Ọghẹnẹ hẹ, gbe enọ e kezọ usiuwoma Jesu Ọnowo mai hi.” (2 Tẹs. 1:8, 9) Oghẹrẹ owọ nọ ahwo a jẹ kpahe emamọ usi na a ti ro gu ai ẹdhọ. Owha-iruo nọ onana u fihọ idibo Ọghẹnẹ uzou o rro kẹhẹ! Re ma sae whaha abe-ọriọ azẹ, ma rẹ siọ ovuẹ Uvie na nọ u re siwi uzuazọ na ba ẹvuẹ vievie he.—Iruẹru 20:26, 27.
5 Oma nọ ma be dawo ro fiobọhọ kẹ erivẹ mai re a wo aruoriwo Ọghẹnẹ yọ edhesẹ ohrọ-oriọ Jihova. (1 Tim. 2:3, 4) Fikinọ ma riẹ nọ uzuazọ ahwo u bi dhe enwenwene, ma be nyabru ai ẹsikpobi jẹ ta udu họ ai awọ re a kurẹriẹ bru Jihova ze nọ oke o gbẹ riẹ na. Ẹkwoma ere oruo, yọ ma bi dhesẹ “epa ohrọ uyoyou Ọghẹnẹ mai,” ọnọ “ọ guọlọ nọ ohwo ọvo o whu hu, rekọ ahwo kpobi a zite ekurẹriẹ.”—Luk 1:78; 2 Pita 3:9.
6 Erere Rọkẹ Omobọ Mai: Egagọ Jihova nọ ma rẹ jọ wobọ ẹsikpobi yọ ọthọwẹ k’omai. U re fiobọhọ k’omai “rẹro ẹtha ẹdẹ Ọghẹnẹ vẹrẹ vẹrẹ” je ru nọ uyere akpọ muomu nana u gbe zue omai oma ha. (2 Pita 3:11-14; Tait. 2:11, 12) Fikiere, joma ‘dikihẹ whawha, ma nuhẹ hẹ, kẹse kẹse ma hẹ jọ owhreze iruo Ọnowo na,’ ma riẹ nọ omodawọ mai evaọ odibọgba Oleleikristi na o rrọ uvrẹvru hu.—1 Kọr. 15:58.
[Study Questions]
1. Ẹvẹ Jihova o bi rri odibọgba mai, kọ ẹvẹ ahwo-akpọ a be jowọ kpahe iẹe?
2. Eme odibọgba mai o re fiobọhọ k’omai dhesẹ via?
3. Fikieme o jẹ roja re ma ruabọhọ ewhowho odẹ Ọghẹnẹ gbe ẹjiroro riẹ?
4. Ẹvẹ iruo usiuwoma ota na o rọ rrọ otọhotọ kẹ ẹdhoguo?
5. Ẹvẹ ohrọ-oriọ Ọghẹnẹ o bi ro dhesẹ oma via evaọ odibọgba mai?
6. Ẹvẹ owhreze nọ ma rẹ jọ evaọ iruo Jihova o rọ rrọ erere kẹ omai?