Yọrọ Iroro Ovẹrẹ!
1 Jesu ọ riẹ inọ oke nọ o wo evaọ otọakpọ nọ o re ro ru iruo Ọsẹ riẹ gba o rẹ kpẹkpẹe. (Jọn 9:4) Fikiere ọ wha odibọgba riẹ haro avọ iroro ovẹrẹ, yọ o wuhrẹ ilele riẹ re a ru epọvo na re. (Luk 4:42-44; 8:1; 10:2-4) Ọ rehọ ekwakwa abọ-iwo nọ e rẹ wha omosasọ sei rọ karo ho. (Mat. 8:20) Oyejabọ ọ sai ro ru iruo nọ Jihova ọ kẹ riẹ gba.—Jọn 17:4.
2 Oke nọ O rẹ Kpẹkpẹe: Oke nọ a rẹ rọ ta usiuwoma evaọ “akpọ na kpobi” o rẹ kpẹkpẹe re. (Mat. 24:14) Eruẹaruẹ Ebaibol i dhesẹ nọ ma rria diwi ruọ oke urere na gaga no. Kẹle na ‘enọ e riẹ Ọghẹnẹ hẹ, gbe enọ e kezọ usiuwoma Jesu Ọnowo mai hi, a te re oja ọraha ibẹdẹ bẹdẹ.’ (2 Tẹs. 1:6-9) Ẹdhoguo yena ọ te roma via idudhe. (Luk 21:34, 35; 1 Tẹs. 5:2, 3) U fo nọ ahwo a jaja aro vi kẹ uyero imuozọ nọ a rrọ na. O rro owha-iruo mai re ma fi obọ họ kẹ ai gwọlọ ọjẹrehọ Jihova nọ oke o gbẹ riẹ na.—Zef. 2:2, 3.
3 Ma Ru Utho Ẹgba Mai Kpobi: Fikinọ idibo Ọghẹnẹ a riẹ inọ “oke nọ a fihọ o rẹ kpẹkpẹe,” a be rọ iruo usiuwoma ota na karo. (1 Kọr. 7:29-31; Mat. 6:33) Ejọ e kpairoro vrẹ uvẹ iruo nọ a hai ro le efe nọ u rovie fihọ kẹ ai hayo ilale eware omobọ-ohwo efa re a sai ru odibọgba rai kẹre. (Mak 10:29, 30) Amọfa a be “hẹ jọ owhreze iruo Ọnowo na” dede nọ a bi thihakọ edawọ. (1 Kọr. 15:58) Ibuobu e be hae jọ ẹgbede whowho emamọ usi na ababọ enuho. (Hib. 10:23) Jihova o bi rri omarodhidhe yena nọ a be rọ tha isiuru Uvie na uke ghaghae.—Hib. 6:10.
4 Uzuazọ mai kpobi nọ ma re fihọ egagọ Jihova, onọ o kẹre te usiuwoma ota na, u re fi obọ họ kẹ omai wo ẹdẹ Jihova họ iroro ziezi. O rẹ thọ omai nọ akpọ Setan o gbe ro reghe omai hi, jẹ bọ ọtamuo mai ga nọ ma rẹ rọ yọrọ uruemu ofuafo. (2 Pita 3:11-14) Evaọ uzẹme, odibọgba mai nọ ma rẹ wha haro avọ iroro ovẹrẹ o rẹ sai siwi uzuazọ mai gbe orọ ahwo nọ a be kezọ kẹ omai.—1 Tim. 4:16.