Ta Usiuwoma Avọ Ọwhọ!
1. Uduotahawọ Pọl vẹ o gwọlọ nọ ma re roro kpahe nẹnẹ?
1 “Vuẹ ovuẹ ẹme na, mu ọwhọ riẹ.” (2 Tim. 4:2) Fikieme uduotahawọ Pọl na u ro wuzou gaga nẹnẹ? Ẹvẹ eme nana i re kpomahọ uzuazọ mai gbe orọ amọfa?
2. Fikieme ma jẹ roma totọ gwọlọ ahwo nọ a ri yo emamọ usi na ha?
2 Uzuazọ Ahwo E Rrọ Ọza: Ima ahwo buobu wariẹ akpọ na họ a ri yo emamọ usi nọ o rẹ sai su ai kpohọ uzuazọ na ha. (Rom 10:13-15; 1 Tim. 4:16) A be jọ ekwotọ nọ a be jọ ta usiuwoma na kẹse kẹse duku ahwo buobu nọ a wo udu-oruọzewọ. Evaọ iwou nọ ma jọ ta usiuwoma kẹ ohwo jọ no ẹdẹjọ, ma te zihe kpohọ ae ẹdẹ-ọfa hayo oke ofa, ma sae jarai nyaku ahwo nọ ma re ta usiuwoma kẹ vẹre he. Oghẹrẹ utioye nọ ma rẹ rọ roma totọ gwọlọ ahwo o rẹ lẹliẹ omai wo obroziẹ-iroro ọfuafo jẹ kare abeọriọ-azẹ.—Iruẹru 20:26.
3. Ẹvẹ ma sae rọ rehọ oke mai ruiruo avọ areghẹ nọ ma tẹ rọ usiuwoma ota?
3 Dedenọ Ileleikristi ikpe-udhusoi ọsosuọ a rẹriẹ ovao dhe ọwọsuọ ọgaga, a “rehọ ewuhrẹ rai vọ Jerusalem.” (Iruẹru 5:28) Kọ ma gba riẹ mu epọvo na inọ ma re ‘se isẹri ziezi’? (Iruẹru 10:42) Nọ ma tẹ rọ usiuwoma ota, kọ ma be hae rọ oke mai ruiruo avọ areghẹ? Nọ ma tẹ be hẹrẹ amọfa nọ a zihe bru ahwo jọ, kọ ma be hae rọ uvẹ yena t’ẹme kẹ ahwo nọ a be nya etẹe vrẹ?
4. Ẹvẹ usiuwoma ota avọ ọwhọ u re ro fi obọ họ k’omai jaja aro vi?
4 Ẹromuhotọ Vi Epaọ Ọsosuọ: Nọ ekuhọ uyero akpọ nana o kẹle gaga no na, o gba omai họ nọ ma rẹ jaja aro vi ẹsikpobi. (1 Tẹs. 5:1-6) Ma tẹ be t’ẹme kpahe ẹruore Uvie na ẹsikpobi, u re fi obọ k’omai nọ ma gbẹ ruawa gahrọ họ kpahe eware nọ e be via evaọ akpọ nana. (Luk 21:34-36) Ofariẹ, nọ ma bi “rẹro” ẹtha ẹdẹ Jihova gaga na, oma o be wọ omai re ma w’obọ evaọ iruo usiuwoma ota na vi epaọ ọsosuọ.—2 Pita 3:11, 12.
5. Eme adhẹẹ kẹ uzuazọ o rẹ wọ omai ru evaọ odibọgba na?
5 Ma tẹ be ta usiuwoma na avọ ọwhọ, kiyọ ma wo eriwo nọ Jihova o wo kpahe uzuazọ: “Ọ guọlọ nọ ohwo ọvo o whu hu, rekọ ahwo kpobi a zite ekurẹriẹ.” (2 Pita 3:9; Izik. 33:11) Joma gbae mu nọ ma rẹ ta usiuwoma na kẹ ahwo kpobi nọ a rrọ ẹkwotọ mai re o wha ajiri se Jihova!—Ol. 109:30.