‘Vuẹ Ẹme na Ovovẹrẹ’
1 Otẹrọnọ oware jọ u t’owhẹ obọ nọ a kpokahọ nọ “OVOVẸRẸ,” ẹvẹ who re rri rie? Ubiẹme na “ovovẹrẹ” u dhesẹ “oware nọ a rẹ rẹriẹ ovao ku vẹrẹ vẹrẹ.” Avọ emamọ ẹjiroro, Pọl ukọ na ọ kẹ Ileleikristi uthubro nọ a ‘vuẹ ẹme na ovovẹrẹ.’ (2 Tim. 4:2) Kọ whọ be j’owọ re whọ rẹriẹ ovao ku iruo nana kpatakpata?
2 Ẹsejọhọ ovuẹ u te Pọl obọ inọ inievo riẹ jọ e be ‘moyẹlẹ evaọ iruo rai’ wọhọ Ileleikristi. (Rom 12:11) Onana o tẹ liẹliẹ iyẹrẹ iruo rai gbe oghọghọ nọ a hai wo rono obufihọ kẹ amọfa ze kiekpotọ.
3 Eriwo Jesu Kpahẹ Odibọgba Na: Ẹvẹ oghọghọ nọ Jesu ọ ruẹ evaọ odibọgba riẹ o rro te! Ọ ta nọ: “Emu mẹ họ oreva Ọnọ O vi omẹ ze, jegbe re me ru iruo riẹ.” Oriruo Jesu o fi ọwhọ họ ilele riẹ oma, enọ ọ tuduhọ awọ ẹkwoma ẹme nọ ọ ta kẹ ae nnọ ‘idhu na e fano kẹ ivuẹvu.’ (Jọn 4:34, 35) Oma ovẹrẹ nọ o dhesẹ evaọ odibọgba riẹ kpobi u dhesẹ oma via okenọ ọ ta kẹ ilele riẹ re a “lẹ Olori ivuẹvu na re o vi iruiruo kpobọ ivuẹvu riẹ.” (Mat. 9:38) Jesu o vuhumu inọ uwou nọ a vi rie họ re ọ ta usiuwoma, yọ ọ gba riẹ mu nnọ uvumọ oware o rẹ whaha iẹe ere oruo ho.
4 Kọ Ẹvẹ Kpahe Omai? Nẹnẹ na, o rrọ ovẹrẹ vi epaọ anwẹdẹ re ma tunye haro evaọ iruo usiuwoma ota na. Evaọ abọ akpọ na buobu, idhu na e fano kẹ ivuẹvu. Makọ evaọ ekwotọ nọ ma roro nnọ a jọ se isẹri ziezi no dede, ahwo idu buobu a be jọ obei họ ame k’ukpe k’ukpe. Nọ ekuhọ uyerakpọ nana ọ be tha kpatakpata na, ma wo iruo ‘buobu nọ ma re ru evaọ iruo Olori na.’ (1 Kọr. 15:58) Rro vi okiofa kpobi, o r’oja re ma daoma gaga evaọ ẹghale ovuẹ Uvie na kugbe amọfa.
5 Joma wo ajọwha ọ emamọ usi na nọ ma re ro te amọfa oma, te n’uwou ruọ uwou gbe oria kpobi nọ ma re jo duku ahwo evaọ ẹkwotọ na. Ẹkwoma ẹgba mai kpobi nọ ma rẹ dawo evaọ iruo usiuwoma ota na, yọ ma bi dhesẹ vevẹ inọ ma fi Uvie na họ oware ọsosuọ no evaọ izuazọ mai. (Mat. 6:33) Ithihakọ mai nọ ma be rọ vuẹ ẹme na kpatakpata o rẹ wha oghọghọ buobu s’omai.