Eruga ọ Isẹri-Ise na nọ Urere na O Kẹle no Na
1 Ezi ivuẹvu na yọ etoke oghọghọ. O tẹ jẹ rrọ etoke iruo egaga. Umutho oke ọvo u kiọkọ kẹ ekokohọ ekakọ na. Iruiruo na a re yiwi zaharo evaọ iruo rai hi.
2 Evaọ edhere ẹwoho, Jesu ọ rehọ “urere akpọ na” wawo etoke ivuẹvu. (Mat. 13:39) Ma be rria evaọ urere akpọ ọnana, avọ umutho oke gheghe nọ u kiọkọ kẹ isẹri-ise “kẹ akpọ na kpobi.” (Mat. 24:14) Nọ urere na u bi sikẹle vi epaọ anwẹdẹ na, o gwọlọ re ma ru ẹkabọ mai evaọ odibọgba na bu viere. Fikieme? Jesu o dhesẹ nọ: “Ivuẹvu na i ghine bu, rekọ iruiruo e rẹ [kakao].”—Mat. 9:37, 38; Rom 12:11.
3 Ru Ei Kpatakpata: Okenọ Jesu o muọ iruo ilogbo usiuwoma ota riẹ họ, ikpe esa gbe ubro ọvo o wo nọ o re ro ru iruo nọ a rọ kẹe gba. Ọ ta usiuwoma avọ iroro ovẹrẹ, anọ: “Mẹ rẹ vuẹovuẹ usiuwoma uvie Ọghẹnẹ [kẹ] ewho efa re; keme fiki onana a je vi omẹ ze.”—Luk 4:43.
4 Jesu o fi iroro ovẹrẹ utioye na họ ilele riẹ oma. (Mak 13: 32-37) Oye o soriẹ nọ “kẹdẹ kẹdẹ a jẹ jọ eva uwou egagọ-ode gbe obọ uwou seri uwuhrẹ Jesu Kristi họ họ” na. (Iruẹru 5:42) Iruo efa nọ e r’oja tere he e karo evaọ izuazọ rai hi. Epanọ a make kao te na, a kparobọ evaọ ovuẹ emamọ usi na “kẹ enọ a ma kpobi evaọ akpọ na.”—Kọl. 1:23.
5 Ma wo ẹjiroro nọ ọ mae rro nọ ma je wo iroro ovẹrẹ ovo oyena enẹna, nọ “urere eware kpobi o kẹlino” na. (1 Pita 4:7) Jihova o fi ẹdẹ gbe auwa họ kẹ urere akpọ ọnana no. (Mat. 24:36) A re ru iruo usiuwoma na reno evaọ oke nọ u kiọkọ na. Oye jabọ nọ ma je gbe ru omodawọ mai ga viere re ma rehọ emamọ usi na rọ nya te ahwo buobu ọfa oma.
6 Ẹkwoma eruga ọ ẹkabọ mai evaọ iruo isẹri na nọ urere na u sikẹle no na, ma ti wo evevọwẹ nọ ma rẹ rọ ta kẹ Jihova, wọhọ epanọ Jesu ọ ta: ‘Ma ru iruo nọ whọ k’omai no.’—Jọn 17:4.