Ewhowho Uzẹme na Kẹdẹ Kẹdẹ Evaọ Aro Orokele Jesu
1 Jesu o wo ugogo iruo nọ o re rugba oke nọ ọ ze otọakpọ na. Oyena o jọ lọlọhọ gaga: ‘Re o se isẹi kẹ uzẹme na.’ (Jọn 18:37) O whowho uzẹme na kpahe ekwakwa-aghae gbe ẹjiroro Ọsẹ riẹ. Iruo nana e wọhọ emuore kẹe; uzuazọ riẹ kpobi o ware riẹe họ. (Jọn 4:34) Luk ọ niyẹrẹ nọ Jesu o je ‘wuhrẹ evaọ uwou egagọ-ode kẹdẹ kẹdẹ.’ (Luk 19:47) Jesu ọ rehọ oke nọ o jariẹ kpobi ruiruo vọvọ. (Jọn 9:4) Evaọ etoke jọ taure o te ti whu, ọ sai whowho kẹ Ọsẹ riẹ nọ: “Mẹ kẹ owhẹ oruaro eva akpọ na, epanọ me ru iruo nọ whọ kẹ omẹ no.”—Jọn 17:4.
2 Okenọ idu mai e tẹ vọ avọ ovuhumuo eware kpobi nọ Jihova o ru, u re no omai eva ze re, re ma t’ẹme kpahiẹe kẹdẹ kẹdẹ. Ma vẹ te jọ wọhọ ilele Jesu nọ e rọ aruọwha whowho nọ: “Ma rẹ sae siọ oware nọ ma ruẹ je yo ba ẹta ha.” (Iruẹru 4:20) Ẹmeọta rai kpahe Jihova ọ jọ ababọ eriosehọ, keme okerefihotọ na ọ ta nọ ‘kẹdẹ kẹdẹ . . . a seri uwuhrẹ họ họ.’ (Iruẹru 5:42) U fo re ma nọ omobọ mai nọ, ‘Kọ mẹ yọ ọnọ ọ be raro kele Owuhrẹ mẹ, Jesu?’
3 Usiuwoma Ota avọ Ovẹrẹ: Jesu ọ ruẹaro nọ okenọ a te whowho ovuẹ Uvie na evaọ akpọ na kpobi no, “kẹsena urere u te zi te.” (Mt. 24:14) Onana u re ru omai riẹ ẹkpata gbe oghẹrẹ nọ iruo mai i wuzou te. Avọ izuazọ ima ahwo nọ e rọ awa, ma sae ruẹ oware ovo nọ omai wuzou hayo wo erere vi iruo enana nọ ma re ru hu. Nọ eyero ọnana ọ be kẹle urere riẹ na, oke nọ ukiọkọ re a ro ru iruo nana gb’unu o re kpẹkpẹe!
4 Iyẹrẹ i dhesẹ nọ Jihova o bi ru iruo ekokohọ enọ e wọhọ igodẹ na vẹrẹ. (Aiz. 60:22) Evaọ abọ akpọ na buobu, ahwo a bi zurie ze uzẹme na, be rọ oghọghọ whowho nọ: “Je oma lele owhai, keme ma yo nọ Ọghẹnẹ avọ owhai a gbẹrọ”! (Zek. 8:23) Eme ọ Jesu enana e mae rọ uzẹme enẹna vi oke ọfa kpobi nọ ovrẹ: “Ivuẹvu na i ghine bu, rekọ iruiruo e rẹ kakaọ. . . . Wha lẹ Olori ivuẹvu na re o vi iruiruo kpobọ ivuẹvu riẹ.” (Mt. 9:37, 38) Kọ onana o gbẹ lẹliẹ omai wo ajọwha wọhọ ilele Jesu nọ e “jọ uwou egagọ-ode kẹse kẹse jiri Ọghẹnẹ”?—Luk 24:53, ẹjẹlẹ ibieme na ọmai.
5 Ru Uzẹme na Via Kẹdẹ Kẹdẹ: U fo re ma gwọlọ edhere nọ ma rọ ta uzẹme na kẹ amọfa kẹdẹ kẹdẹ. Ma wo uvẹ buobu. Kọ whọ sae ta usiuwoma kẹ ohwo nọ ọ kẹle owhẹ evaọ imoto? Hayo kẹvẹ kpahe ileta i kere se ohwo jọ nọ who dihọ uwou ho? Kọ who roro kpahe omobe-ovẹvẹ hayo emagazini i fihọ ada kẹ ọnọ ọ be zẹ eki hayo ahwo nọ whọ nyaku evaọ eki okenọ whọ be dẹ eware? Ẹsejọhọ, whọ sai roro kpahe uvẹ efa buobu nọ who wo kẹdẹ kẹdẹ no nọ whọ rọ ghale ẹruore ra kugbe amọfa. Otẹrọnọ whọ rẹ daoma je dhesẹ umutho aruọwha, Jihova o ti fiobọhọ k’owhẹ.—1 Tẹs. 2:2.
6 Fikiere, nọ ma te bi mu iruo okpẹdẹ họ, ma rẹ nọ omobọ mai nọ, ‘Kọ mẹ te rehọ iroro obọ mẹ ghale ẹruore mẹ kugbe ohwo jọ otẹrọnọ uvẹ u rovie via nẹnẹ?’ Rehọ aro kele uruemu Jesu, ọnọ o dhesẹ oware nọ a ro viei ze otọakpọ anọ: ‘Mẹ rẹ vuẹovuẹ usiuwoma uvie Ọghẹnẹ na hrọ.’ (Luk 4:43) Ma tẹ gwọlọ jọ wọhọ Owuhrẹ mai, ma re ru epavo na re.—Luk 6:40.