Wo Erere No Isukulu Odibọgba Ọghẹnẹ Ọrọ 1996 na Ze—Abọ 2
1 Nọ a nwane rọ Isukulu Odibọgba Ọghẹnẹ na mu no evaọ 1943, uwou ogha Ukoko-Ulogbo jọ o n’iyẹrẹ nọ: “Ọruẹrẹfihọ ọnana u fiobọhọ vẹrẹ gaga kẹ inievo nọ i je roro nọ a te sae t’ẹme evaọ ẹgbede he zihe ruọ enọ i w’ẹgba ẹmeọta evaọ platfọm gbe evaọ obọ otafe.” Isukulu na ọ gbẹ be wha ewuhrẹ nọ ọmai woma haro, nọ mai kpobi a gwọlọ.
2 Isase Ebaibol: Orọnikọ ahwo nọ a kẹ ẹme ọvo a re wo erere no isukulu na ze he. Evaọ uzẹme, mai kpobi a wo ẹkẹ iruo mai—ọrọ isase Ebaibol ẹkpoka na. Oma isukulu na u re dhesẹ izou Ebaibol nọ a re se koka koka. Ekareghẹhọ Ikereakere buobu e riẹ nọ i fiẹgba họ epanọ isase Ebaibol ikẹdẹ kẹdẹ i wuzou te. (Jos. 1:8; Ol. 1:2; Iruẹru 17:11) Isase Ebaibol o r’oja kẹ omakpokpọ ẹzi; ọ rẹ lẹliẹ iroro gbe udu na jọ ọkpokpọ. Otẹrọnọ ma bi se Ebaibol na iminiti isoi evaọ okpẹdẹ, ma te nyate oma isase na. Evaọ urere ukpe na, yọ ma se bu vi izou 150 evaọ Ẹme Ọghẹnẹ no. Ma tẹ rehọ Ebaibol kẹle oma, ma sai se omojọ kẹdẹ kẹdẹ.
3 Ẹme Ohrẹ: Re ma sae wọ inievo na kpohọ iruo omurokpotọ gbe ajọwha, o gwọlọ nọ ọnọ ọ be kẹ ẹme ohrẹ na ọ rẹ rehọ emamọ edhere ewuhrẹ ruiruo, re o ru ẹme na vevẹ, jẹ bọ ovuhumuo kẹ Jihova, Ẹme riẹ, gbe ukoko riẹ. Ekpako gbe idibo iruiruo a sai ru onana ẹkwoma oma nọ a rẹ ruẹrẹ kpahe ziezi, a vẹ bọ ẹme rai wariẹ uzou ẹme na, t’ẹme na avọ imuẹro, je ru ẹme na jajaja. (Hib. 4:12) U wuzou re ọnọ o bi ru ẹme na o lele oke nọ a kẹ riẹ. Ebe Ukoko-Ulogbo na buobu e vọ avọ ikere Ebaibol, e tẹ jẹ ruẹrẹ Ikereakere họ nọ i re fi ọwhọ họ ohwo oma jẹ k’ohwo erere ẹzi.
4 Oruvẹ Ebaibol: Oniọvo nọ a kẹ ẹme ọnana ọ rẹ salọ awọ ikere jọ nọ a sai fihọ iruo kẹ obufihọ ukoko na. Onana o gwọlọ nnọ o re se izou nọ a kẹ na, roro kpahe ae, jẹ kiẹ awọ ikere na re ọ ruẹ eme nọ i fi otofa họ ikereakere eyena. Evaọ emu Watch Tower Publications Index, “Scripture Index” (Ọruẹrẹhọ Ikereakere) ọ riẹe, nọ o rẹ sae fiobọhọ evaọ ẹgwọlọ evuẹ kpahe uzedhe awọ Ebaibol. Inievo nọ i bi ru abọ ọnana a rẹ rehọ emamọ ẹgba iroro rai ruiruo re a se eme nọ i wuzou ho ba e fihọ ẹme na. A rẹ salọ eme buobu nọ a sae ta re evaọ iminiti ezeza ha ha.
5 Mai kpobi a sai wo erere no Isukulu Odibọgba Ọghẹnẹ ze. O rẹ sae fiobọhọ k’omai nyaharo evaọ ẹgba ẹmeọta avọ ewuhrẹ. Ma tẹ rehọ erere uvẹ ọruẹrẹhọ ọnana ruiruo vọvọ u ti fiobọhọ k’omai ‘re ahwo kpobi a ruẹ ẹnyaharo mai.’—1 Ti. 4:15.