Isukulu Odibọgba Ọghẹnẹ ọrọ 2000
1 Isukulu Odibọgba Ọghẹnẹ na o rrọ oghale ulogbo kẹ ahwo Jihova. Bu vi ikpe 50 nọ e vrẹ no, u fiobọhọ kẹ ima ahwo buobu bọ ẹgba rai no wọhọ ahwo nọ a rẹ t’ẹme evaọ ogbotu gbe iwuhrẹ ọ uzẹme Ebaibol. (Ol. 145:10-12; Mat. 28:19, 20) Kọ whọ sae ruẹ epanọ isukulu na i ro fiobọhọ k’owhẹ no? O rẹ gbẹ sai ru ere evaọ etoke ukpe ọ 2000 na otẹrọnọ whọ jariẹ w’obọ vọvọ je fi ithubro nọ a kẹ na h’iruo.
2 A kere ithubro kpahe eme nọ a ti ru gbe ebe nọ a si eme na noze fihọ ẹwẹ-obe ọsosuọ ọrọ omaa isukulu ọ 2000 na. A ta kpahe oke nọ a fihọ kẹ abọ ọvuọvo, oria nọ a ti ru eme na noze, epanọ a re ru ẹme na, gbe eware efa. Iviena gwọlọ uvẹ re whọ romatotọ se ithubro na je fi ai h’iruo.
3 Isase Ebaibol Ẹkpoka: A kere omaa isase Ebaibol ivẹ nọ i wo ohẹriẹ fihọ omaa isukulu na. Ọjọ yọ omaa isase ahwo kpobi nọ u theri te ewẹ-obe isoi erọ Ebaibol na. A re si oruvẹ Ebaibol no ọnana ze. Omaa isase avivẹ na yọ orọ ofiba yọ u theri te akuava ọ orọ ọsosuọ na. Ẹkwoma ẹnya lele omaa onana, whọ rẹ sai se Ebaibol na soso reno evaọ ikpe esa. Ma vuhumu inọ ahwo jọ a sae gwọlọ nọ a re se bu vi epanọ o rrọ omaa ofiba na, yọ amọfa a rẹ sae nyate omaa na ha. Viukpenọ whọ rẹ roma ra wawo amọfa, ghọghọ evaọ oware nọ whọ sai rugba. (Gal. 6:4) Oware nọ o r’oja họ re a se Ẹme Ọghẹnẹ kẹdẹ kẹdẹ.—Ol. 1:1-3.
4 Re who fi odẹ h’otọ evaọ Isukulu Odibọgba Ọghẹnẹ na, whọ rẹ t’ẹme kugbe ọsẹro ukoko na. Iviena se ẹme ra gboja, yọ who mu siọ ẹme ba eruo ho. Wo ovuhumuo kẹ isukulu na wọhọ ọruẹrẹfihotọ nọ o n’obọ Jihova ze. Ruẹrẹ oma kpahe ziezi, riẹ ẹme nọ a k’owhẹ na fiotọ, jẹ t’ẹme n’udu ze, re whọ rọ ere wo erere vọvọ no isukulu oghẹrẹsa ọnana ze.