Isukulu Odibọgba Ọghẹnẹ ọrọ 2001
1 Ẹjiroro Ikereakere buobu e riẹ nọ mai kpobi ma re ro w’obọ vọvọ wọhọ epanọ o sae lọhọ te kpobi evaọ Isukulu Odibọgba Ọghẹnẹ na.—Itẹ 15:23; Mat. 28:19, 20; Iruẹru 15:32; 1 Tim. 4:12, 13; 2 Tim. 2:2; 1 Pita 3:15.
2 Ọruẹrẹfihotọ ọrọ isase Ebaibol ẹkpoka yọ oware nọ u kri no evaọ isukulu na. O rẹ kuvẹ kẹ ese oware wọhọ ẹwẹ-obe ọvo evaọ Ebaibol na kẹdẹ kẹdẹ. Muhọ evaọ ukpe onana, a m’omaa isase Ebaibol fihọ ẹkpoka ọkiẹkpemu okerefihotọ kpobi. Omaa ọ isase Ebaibol ofiba na, onọ ma fihọ kẹ ikpe esa nọ e vrẹ na, u reno. Rekọ whọ tẹ gwọlọ se vrẹ omaa Ebaibol nọ a fihọ na, whọ sai ru omaa isase omobọ ra.
3 Ẹme Avọ 2 na o re wuhrẹ inievo emezae kẹ ‘isase ogbotu’ ọrọ Ẹme Ọghẹnẹ. (1 Tim. 4:13) Okenọ who te wo ẹme isase, evaọ etoke omaruẹrẹhọ ra se ei do via ẹsibuobu. Whọ sae rehọ ekasẹte itepu Society ọrọ isase Ebaibol na ro ru ẹnyaharo evaọ osegba ra, enwene edo-uvo ra, gbe abọ ọfa ọrọ emamọ isase.
4 Ẹme Avọ 3 gbe ọrọ Avọ 4 na i no obe Ọzae nọ Ọ Mae Rro gbe omobe Izoẹme Ebaibol rọ kẹ Iroro e Jẹ na ze. Otẹrọnọ eria nọ a k’owhẹ na o bu vi onọ whọ rẹ sae ta evaọ oke nọ a fihọ na, salọ oware nọ o te mai w’iruo kẹ ẹkwotọ ukoko ra. Whọ sae rehọ abọ odibọgba kpobi nọ o fo kẹ ẹkwotọ ra ro ru ei.
5 Daoma ra kpobi re who ru eme ra kpobi evaọ isukulu na. Fi oke họ rọ ruẹrẹ oma kpahe ziezi, jẹ t’ẹme no udu ze. Whọ te jọ ehri uduotahawọ kẹ ukoko na, yọ who ti wo erere kẹ omobọ ra ẹkwoma abọ-owo no udu ze evaọ Isukulu Odibọgba Ọghẹnẹ na evaọ etoke ukpe 2001 na.