Kọ Whọ Sai Fi Obọ Họ?
1 Jihova ọ rẹ gwọlọ idhere nọ o re ro fi obọ họ kẹ idibo omarokpotọ riẹ ẹsikpobi. (2 Irv. 16:9; Aiz. 41:10, 13) Be rehọ Jihova dhesẹ othuru-igodẹ nọ ọ rẹ sẹro igodẹ riẹ ziezi, Aizaya o kere nọ: “O re ti koko imigodẹ na họ obọ riẹ, ọ vẹ te wọ ae họ igbama riẹ, o ve ti su enọ avọ emọ a rọ ẹrera.” (Aiz. 40:11) Roro kpahe idhere jọ nọ ma jẹ sae rehọ aro kele ọdawẹ oyoyou Jihova.
2 Fi Obọ họ kẹ Ahwo Ọkpokpọ: Ma rẹ sai fi obọ họ ẹkwoma ahwo ọkpokpọ nọ ma re zizie re a reawere usu ọbọga kugbe omai. (Itẹ 13:20) Nọ oniọvo ọmọzae jọ o roro kpahe oghẹrẹ nọ amọfa a ro fi obọ họ kẹe nọ o mu oma họ ekugbe ukoko Isẹri Jihova, ọ ta nọ: “Eva unuẹse buobu, uviuwou jọ u ku omẹ kugbe ewuhrẹ uviuwou rai. Nọ mẹ be nyaharo na, imava-orọo jọ nọ a rọo obọ nọ a rrọ ekobaro a jẹ hai zizie omẹ ẹsikpobi nnọ me ku oma gbe ai okpẹdoke ọsoso evaọ odibọgba na. Ẹsikpobi ma jẹ hae ta eme eware abọ-ẹzi kugbe.” O fibae nọ: “Taure me te ti zihe ruọ Oleleikristi, mẹ jẹ hai kpohọ otafe eva aso Edisoi-Oka gbe ọrọ Ẹdẹ-Ọmaha kpobi. Rekọ oke nọ mẹ raha kugbe inievo na u ru ẹgwọlọ mẹ kẹ omakugbe-ahwo gba.” Uvi isiuru nọ ukoko na u dhesẹ na u fi obọ họ kẹ oniọvo nana dikihẹ gaga evaọ orọwọ na, yọ obọnana o bi ruiruo wọhọ omọvo uviuwou Ebẹtẹle.—Kọl. 2:6, 7.
3 Wha Bọ Ohwohwo Ga: Ma sai muẹrohọ uvẹ jọ nọ ma re ro fi obọ họ kẹ inievo mai nọ a tẹ rẹriẹ ovao dhe iyero ebẹbẹ. Kọ whọ sai ru ọruẹrẹfihotọ nọ who re ro ru isẹri-ise ifonu kugbe owhowho-uvie nọ oma o ga ha hayo zizie ei re o kuomagbe owhẹ evaọ eru obe-uwuhrẹ Ebaibol jọ, hayo tube zizie ọmọ-uwuhrẹ na ziọ uwou riẹ re wha jọ etẹe ru uwuhrẹ na? Kọ nọ a te fi obọ họ kẹ ọyewọ nọ o wo emaha esese nọ wha tẹ rrọ odibọgba na o gbẹ were iẹe? Kọ ahwo jọ nọ a rẹ vuoma a riẹ nọ e te gwọlọ uketha evaọ okenọ a bi ru izihebro hayo nọ a bi wabọ evaọ ofẹ ofa jọ odibọgba na? Uvi isiuru nọ ma re wo kpahe inievo mai o te wọ omai gwọlọ idhere sa-sa nọ ma rẹ rọ bọ ae ga.—Rom 14:19.
4 Nọ ma be rọ aro kele uvi ọdawẹ nọ Jihova o wo kẹ idibo riẹ na, ma rẹ bọ ohwohwo ga, fiobọhọ si ukoko na kẹle oma evaọ uyoyou, jẹ wha orro se Ọsẹ obọ odhiwu mai.—Ẹf. 4:16.