Kareghẹhọ Enọ I Wo Ẹrọwọ nọ E Kpako No
1 Dede nọ ọ jọ aye-uku jẹ kpako no, Anna nọ ọ kpako te ikpe 84 no na, “o je no uwou egagọ-ode he.” Ẹrọwọ riẹ ọ lẹliẹ Jihova kẹ e oghale obọdẹ jọ. (Luk 2:36-38) Nẹnẹ na, inievo buobu i bi dhesẹ ẹzi nọ ọ wọhọ ọrọ Anna ghelọ iyero ebẹbẹ nọ a rẹriẹ aro dhe. Okenọ o tẹ gba ahwo ẹrọwọ itieye họ re a thihakọ ebẹbẹ ẹyao hayo owho, udu rai o rẹ sai whrehe. J’oma roro kpahe uvi idhere jọ nọ ma sae rọ t’udu họ ae awọ je fi obọ họ kẹ ae re a yọrọ emamọ omaa-iruo abọ-ẹzi.
2 Iwuhrẹ gbe Odibọgba Na: Okenọ amọfa a tẹ rọ oma uyoyou ru ọruẹrẹfihotọ rọkẹ ofa, enọ ekpako nọ i wo ẹrọwọ a rẹ sai kpohọ iwuhrẹ Ileleikristi lọlọhọ ẹsikpobi. Onana o rẹ bọ idibo ẹrọwọ enana nọ e gọ kri no na ga evaọ abọ-ẹzi o vẹ jẹ bọ ukoko na ga. Kọ whọ jọ iruo iwoma nana w’obọ no?—Hib. 13:16.
3 Obọ nọ a re wo evaọ odibọgba na kẹse kẹse o rẹ wha uvi oghọghọ gbe edẹro Oleleikristi ze. Rekọ ere oruo o rẹ sae jọ bẹbẹ kẹ enọ ekpako no gbe enọ oma rai o ga ha. Kọ o lọhọ re omọvo ọ inievo eghaghae nana jọ ọ sai w’obọ kugbe owhẹ wọhọ ‘ibe oruiruo’ evaọ abọjọ iruo isẹri-ise na? (Rom 16:3, 9, 21) Whọ sai zizie iei re o kuomagbe owhẹ evaọ isẹri-ise ifonu hayo re o lele owhẹ kpohọ ozihebro hayo obe-uwuhrẹ Ebaibol. Otẹrọnọ ọnọ ọ kpako no na ọ gbẹ be sai no uwou riẹ hẹ, kọ ọmọ-uwuhrẹ Ebaibol ọ sae ziọ obọ uwou riẹ kẹ obe-uwuhrẹ?
4 Uwuhrẹ gbe Omakugbe: Evaọ otiẹse, ahwo jọ a re zizie ohwo nọ ọ kpako no hayo ọnọ oma o ga ha re o ku oma gbe uwuhrẹ uviuwou rai, tube ru ewuhrẹ na evaọ uwou riẹ dede. Oni jọ ọ rehọ emọ esese ivẹ riẹ kpohọ obọ uwou oniọvo-ọmọtẹ jọ nọ ọ kpako no, a tẹ jọ obei ru ewuhrẹ rai evaọ Obe Ikuigbe Ebaibol Mẹ, yọ omakugbe na o kẹ rai kpobi uduotahawọ. O rẹ jẹ were ahwo otiọye na nọ a te zizie ai kpohọ emuọriọ hayo etoke omakugbe ofa. Otẹrọnọ enọ oma rai o ga ha na a wo ẹgba nọ a sae rọ nyaze iweze ithethei hi, whọ sai fonu rai hayo wẹriẹ omoke kpẹkpẹe re who se ẹme kẹ ae, lele ai lẹ, hayo gb’iku eware ọbọga nọ a rọ ẹro ruẹ kugbe ai.—Rom 1:11, 12.
5 Jihova o re rri enọ e kpako no nọ i wo ẹrọwọ ghaghae. (Hib. 6:10, 11) Ma rẹ sae rọ aro kele ie ẹkwoma ovuhumuo mai nọ ma re dhesẹ kẹ ae gbe ẹkwoma obọ nọ ma re fihọ kẹ ae re a yọrọ emamọ omaa-iruo abọ-ẹzi.