Jihova Ọ Rẹ Rẹrote Idibo Riẹ Nọ E Kpako No

“Ọghẹnẹ ọ kare ọ rọ ẹrẹreokie he nọ iruo rai i re vẹro . . . gbe uyoyou nọ owha be rehọ fiki riẹ ruẹ.”—HIB. 6:10.

1, 2. (a) Whọ tẹ ruẹ ohwo nọ ọ dhẹ eza no, eme o rẹ kareghẹhọ owhẹ? (b) Ẹvẹ Jihova o re rri Ileleikristi nọ e kpako no?

WHỌ tẹ ruẹ ekpako-soso nọ e dhẹ eza no evaọ ukoko na, kọ o rẹ kareghẹhọ owhẹ oria jọ evaọ obe Daniẹl? Jihova Ọghẹnẹ ọ jọ eruẹaruẹ jọ dhesẹ oma riẹ kẹ Daniẹl inọ o wo eto uzou efuafo. Daniẹl o kere nọ: “Epanọ me bi ro riwi na, mẹ tẹ ruẹ egbara-uvie nọ a ruẹrẹhọ gbe ọnọ ọ rọ no oke anwae ze ọ keria ae; yọ ewu riẹ ọ be fua wọhọ ekpalekpa ame, jegbe eto uzou riẹ e wọhọ emamọ ivovo.”—Dan. 7:9.

² Uvovo nọ a gua oware ovo kugbe he o rẹ jọ fuafo papapa. Fikiere, eto efuafo gbe odẹ-ọkwa na “ọnọ ọ rọ no oke anwae ze” i dhesẹ inọ Ọghẹnẹ ọ kpako gaga o te je wo areghẹ, yọ u fo inọ ma rẹ kẹe adhẹẹ odidi fiki onana. Nọ o rrọ ere na, kọ ẹvẹ Jihova, Ọnọ ọ rọ no oke Anwae ze na, o bi rri ezae gbe eyae nọ e kpako no, enọ e be roma totọ gọe? Ebaibol e ta nọ “eza uzou yọ etu uvie adhẹwẹ; ọriẹruo a ro wo i.” (Itẹ 16:31) Ẹhẹ, otẹrọnọ uvi Oleleikristi ọ dhẹ eza uzou, Ọghẹnẹ o re rri ohwo otiọye na wowoma. Kọ enẹ who bi rri inievo nọ e kpako no na?

Fikieme A jẹ Ghare Tere?

3. Fikieme ibe eg’Ọghẹnẹ nọ e kpako no a rọ ghare omai obọ gaga?

³ Usu idibo eghaghae Ọghẹnẹ itieye nọ e kpako no họ ahwo Ugboma Esuo ọrọ Isẹri Jihova, enọ e jọ esẹro ọnyawariẹ gbe esẹro ubrotọ vẹre gbe enọ e gbẹ rrọ enẹna, ekobaro ọwhọ, gbe iwhowho Uvie nọ e kpako no—inievo nọ i kru egagọ Ọghẹnẹ gaga evaọ ikoko mai. Ẹsejọhọ whọ riẹ ejọ nọ e rehọ ọwhọ whowho emamọ usi na te ikpe buobu no gbe enọ emamọ oriruo rai o lẹliẹ emaha na wo ajọwha je nwene uzuazọ rai no. Ibe eg’Ọghẹnẹ mai jọ nọ e kpako no a wọ ewha-iruo ilogbo buobu no yọ a thihakọ ukpokpoma no fiki emamọ usi na. Jihova avọ ‘ọrigbo nọ o wo ẹrọwọ avọ areghẹ na’ a rri iruo nọ a ru vrẹ no gbe enọ a gbe bi ru fiki Uvie na ghaghae.—Mat. 24:45.

4. Fikieme ma jẹ rehọ adhẹẹ kẹ Ileleikristi nọ e kpako no jẹ lẹ roro ai?

⁴ U fo re idibo Jihova Ọghẹnẹ nọ e re kpako ho a rọ adhẹẹ kẹ enọ e kpako no na. Evaọ uzẹme, Uzi nọ Ọghẹnẹ ọ rehọ ẹkwoma Mosis kẹ u dhesẹ inọ ohwo nọ o wo ozodhẹ Jihova ọ rẹ rọ adhẹẹ kẹ ekpako na. (Izerẹ 19:32) Ma rẹ fodẹ inievo nana evaọ elẹ mai je yere Ọghẹnẹ kẹ ọwhọ nọ a dhesẹ no. Pọl ukọ na ọ jọ olẹ lẹ roro ibe-iruiruo riẹ nọ e rrọ ghaghae, te emaha te ekpako.—Se Ahwo Tẹsalonika 1:2, 3.

5. Eme ma re ru re ma ruẹsi wo erere no ibe eg’Ọghẹnẹ nọ e kpako no ze?

⁵ Ofariẹ, inievo nọ e rrọ ukoko na kpobi a rẹ sai wo erere nọ a tẹ be nya kẹle Ileleikristi nọ e kpako no. Inievo nana nọ e gọ Jihova kri gaga no na a wo eriariẹ ziezi no ẹkwoma isase ebe ukoko na, ẹromuhotọ, gbe eware nọ a rọ ẹro ruẹ no evaọ uzuazọ. A wuhrẹ epanọ a re ro dhesẹ odiri gbe ọdawẹ no, yọ iruemu ezi nana nọ a bi wuhrẹ amọfa o be kẹ ae evawere gbe evevọwẹ gaga. (Ol. 71:18) Whai inievo nọ e re kpako ho, wha bigba inievo nana re wha wo erere no eriariẹ ididi rai ze wọhọ epanọ ohwo o re si ame no ozae nọ ọ rrọ didi ze na.—Itẹ 20:5.

6. Ẹvẹ whọ sai ro dhesẹ kẹ enọ e kpako no inọ who gine rri rai ghaghae?

⁶ Kọ whọ be jọ enọ e kpako no riẹ inọ who rri rai ghaghae wọhọ epanọ Jihova o rri rai na? Edhere jọ nọ whọ rẹ sai ro ru ere họ who re dhesẹ kẹ ai inọ who rri iroro-ejẹ rai ghare gaga gbe nnọ who you rai fikinọ a kru egagọ Ọghẹnẹ gaga. Ofariẹ, who te bi ru lele eware nọ who wuhrẹ mi ai, yọ who bi dhesẹ inọ adhẹẹ nọ who wo kẹ ai yọ uvi riẹ. Ileleikristi buobu nọ e kpako no a rẹ sae kareghẹhọ ohrẹ areghẹ nọ inievo nọ e kpako no a kẹ rai gbe epanọ ohrẹ na nọ a fihọ iruo u fi obọ họ kẹ ae no anwọ oke emaha ze.a

Rehọ Idhere nọ A rẹ Ruẹ Dhesẹ Ọdawẹ Kẹ Ai

7. Amono Jihova ọ gwọlọ inọ a rẹrote ekpako na?

⁷ Ọghẹnẹ ọ kẹ iviuwou enọ e kpako no na owha-iruo nọ a rẹ rọ rẹrote ai. (Se 1 Timoti 5:4, 8.) Eva e rẹ were Jihova nọ ahwo uviuwou a tẹ be ginẹ rẹrote ekpako na, be rehọ ere dhesẹ inọ a wo ọdawẹ kẹ ekpako na wọhọ epanọ ọye omariẹ o wo na. Ọghẹnẹ ọ rẹ tha iviuwou itieye na uke jẹ ghale ae fiki omodawọ gbe iruo rai.b

8. Fikieme ikoko a re ro dhesẹ ọdawẹ kẹ Ileleikristi nọ e kpako no?

⁸ Epọvo na re, eva e rẹ were Jihova nọ ukoko soso u te bi fi obọ họ kẹ ekpako nọ e rrọ ọbẹwẹ, enọ ahwo uviuwou rai a kurẹriẹ hẹ hayo enọ ahwo uviuwou rai i gbabọ kẹ. (1 Tim. 5:3, 5, 9, 10) Ikoko nọ i bi ru ere yọ a bi dhesẹ inọ a bi weri kẹ ekpako na, a you rai, gbe nnọ a wo ohrọ kẹ ae. (1 Pita 3:8) Pọl o dhesẹ ọdawẹ nọ a re wo kẹ enọ e kpako no evaọ ukoko na nọ ọ ta inọ otẹrọnọ abọ ugboma na jọ o be ruẹ uye “yọ u te oma na kpobi” no. (1 Kọr. 12:26) Ma tẹ be rọ ohrọ ru eware jọ ro fi obọ họ kẹ ekpako na yọ ma bi ru lele ohrẹ Pọl na: “Whai ohwo ọ wha uye ohwo, re wha rọ ere ru uzi Kristi na gba.”—Gal. 6:2.

9. Ebẹbẹ vẹ owho o rẹ sae wha ze?

⁹ Didi uye enọ e kpako no na a be ruẹ? Oma o rẹ kake lọhọ ibuobu. A rẹ sai roro inọ eware nọ a jẹ hai ru vẹre e ga vi ai abọ, eware wọhọ ekpohọ ẹsipito, eware nọ e whomahọ obe-ukere, ẹruorote uwou, gbe emu othere. Nọ orọnọ ohọwo gbe uruame u re kpe ahwo nọ a kpako no te epaọ ọsosuọ họ na, a rẹ sai roro inọ a re du re emu hayo d’ame te epanọ o gwọlọ họ. Epọvo na o rrọ kpahe emu abọ-ẹzi. Nọ ohwo ọ be kpako na, o rẹ jọ bẹbẹ kẹe re ọ rehọ ibiaro riẹ se obe jẹ rehọ ezọ riẹ yo ẹme evaọ iwuhrẹ, yọ re ọ ruẹrẹ oma kpahe kẹ iwuhrẹ dede ibadidi. Eme amọfa a rẹ sai ru kẹ ekpako itieye na?

Epanọ Whọ Sai Ro Fi Obọ Họ

10. Eme ekpako ukoko a rẹ sai ru re a ruẹ inọ a be rẹrote enọ e kpako no ziezi?

¹⁰ Evaọ ikoko buobu, a be rẹrote enọ e kpako no ziezi. Inievo nọ e rrọ yoyou a bi fi obọ họ kẹ ae dẹ eware no obọ eki ze, there emu, fọrọ iwu rai je ru uwou rai fo. A bi fi obọ họ kẹ enọ e kpako no wuhrẹ obe, ruẹrẹ oma kpahe kẹ iwuhrẹ, re a jẹ siọ ẹdhigodo ba ẹjọ evaọ odibọgba na. Inievo nọ e gbẹ maha a re lele ai usu jẹ tubẹ wọ ae kpohọ oria ewuhrẹ hayo usiuwoma ota. O tẹ rrọ bẹbẹ re enọ e kpako no a no uwou, a rẹ sae rrọ ifonu gaviezọ kẹ eme nọ a be jọ obọ ewuhrẹ ta hayo a rẹ sae rehọ itepu rekọdo eme na se ai. O tẹ lọhọ, ekpako ukoko a rẹ ruẹ inọ a wo ọruẹrẹfihotọ nọ a re ro fi obọ họ kẹ enọ e kpako no evaọ ukoko na.c

11. Gbiku epanọ uviuwou jọ o ro fi obọ họ kẹ oniọvo-ọmọzae jọ nọ ọ kpako no?

¹¹ Ileleikristi omomọvo a rẹ sai fi obọ họ re. Okenọ aye oniọvo jọ o whu, oniọvo na nọ ọ kpako no na ọ gbẹ jẹ sae hwa osa uwou riẹ hẹ. Tei te aye riẹ a wuhrẹ Ebaibol kugbe uviuwou jọ nọ uwou rai o rrọ ruaro, uviuwou nọ ọsẹ, oni, gbe emetẹ ivẹ a rrọ. A tẹ kẹe ibruwou ivẹ re ọ rria. Ikpe 15 o lele uviuwou nana rria, oria ọvo a jẹ jọ riemu, yọ a jẹ were eva kugbe. Uviuwou na a wo erere gaga no ẹrọwọ gbe eriariẹ riẹ ze, yọ uviuwou nana o sasa oniọvo na oma gaga. Oniọvo nana o lele uviuwou na rria bẹsenọ o ro whu nọ ọ kpako te ikpe udhone gbe izii (89) no. Uviuwou na o gbe bi yere Ọghẹnẹ kẹ eghale buobu nọ a jọ oma oniọvo nana wo. ‘Osohwa rai u vru vievie he’ fiki obọ nọ a fihọ kẹ ibe olele Jesu Kristi.—Mat. 10:42.d

12. Eme whọ rẹ sai ru ro dhesẹ ọdawẹ kẹ inievo nọ e kpako no?

¹² Ẹsejọhọ whọ sai ti fi obọ họ kẹ oniọvo nọ ọ kpako no wọhọ epanọ uviuwou nana u ru na ha, rekọ ẹsejọhọ whọ sai fi obọ họ kẹ ohwo nọ ọ kpako no evaọ odibọgba na hayo kpohọ iwuhrẹ. Whọ rẹ sai je zizie ai ziọ uwou ra hayo ku ai gboma kpohọ oria. Whọ rẹ sai weze bru rai maero nọ a tẹ be mọ. Ofariẹ, o gwọlọ inọ whọ rẹ rehọ ai ẹsikpobi wọhọ ekpako soso nọ e riẹ oware nọ a bi ru. Iroro rai e tẹ gbẹ gba ziezi, a re ku Ileleikristi nọ e kpako no gboma nọ a tẹ be jiroro nọ i kpomahọ ai. Makọ enọ iroro rai e gbẹ gba tere he a rẹ riẹ nọ amọfa a tẹ be kẹ ae adhẹẹ.

Iruo Ra E Te Thọrọ Jihova Ẹro Ho

13. Fikieme o rọ rrọ oja re ma wo ọdawẹ kẹ Ileleikristi nọ e kpako no?

¹³ O roja re ma rehọ ọghọ kẹ ekpako soso. Evaọ ẹsibuobu, o rẹ kẹ enọ e kpako no na uye gaga fikinọ a gbẹ be sai ru eware nọ a jẹ hai ru vẹre he evaọ okenọ a gbẹ jọ udhu. Wọhọ oriruo, ẹyao ọgaga jọ o kie oniọvo-ọmọtẹ jọ nọ ọ gọ Jihova ziezi te ikpe udhuvẹ gbe ikpe (50), ọnọ ọ jọ ọkobaro oke-kpobi, rekọ enẹna udugaga ọ be sai ro kpohọ iwuhrẹ. Nọ o roro epanọ ọ jẹ hae ta usiuwoma te vẹre je rri oma riẹ enẹna, ọ tẹ kpare oviẹ. Nọ o gb’uzou h’otọ, avọ oviẹ ọ tẹ ta nọ, “Mẹ gbẹ be sai ru oware ovo enẹna ha.”

14. Uduotahawọ vẹ idibo Jihova nọ e kpako no a rẹ sai wo no ilezi na ze?

¹⁴ Otẹrọnọ whẹ yọ ohwo nọ ọ kpako no, kọ whọ be hai wo oghẹrẹ iroro itieye? Hayo kọ whọ be hai roro ẹsejọ inọ Jihova ọ kpairoro vrẹ owhẹ no? O wọhọ nnọ ọso-ilezi na o wo oghẹrẹ iroro itieye evaọ ubrobọ ekuhọ uzuazọ riẹ, keme ọ lẹ se Jihova nọ: “Oke owhuo mẹ who le omẹ fiẹ hẹ; gbe okenọ ogaga mẹ u re no who lere omẹ hẹ. Dede nọ mẹ kpako dheza no, O Ọghẹnẹ whọ se omẹ ba ha.” (Ol. 71:9, 18) Orọnikọ Jihova o je ti leri ọnọ ọ so olezi yena ha, yọ O ti leri owhẹ gbe he. Devidi ọ jọ olezi ọfa nọ ọ so dhesẹ inọ o fievahọ nnọ Ọghẹnẹ ọ te sẹro riẹ. (Se Olezi 68:19.) Jọ u mu owhẹ ẹro inọ whọ tẹ rrọ Oleleikristi nọ ọ kpako no nọ ọ be gọ Ọghẹnẹ ziezi, Jihova ọ te jọ kugbe owhẹ jẹ sẹro ra n’ẹdẹ t’ẹdẹ.

15. Eme o rẹ sai fi obọ họ kẹ enọ e kpako no whaha iroro ọkora?

¹⁵ Jihova ọ be kareghẹhọ eware nọ whai Isẹri riẹ nọ e kpako no a ru no gbe onọ wha gbe bi ru enẹna rọ kẹe orro. Ebaibol e ta nọ: “Ọghẹnẹ ọ kare ọ rọ ẹrẹreokie he nọ iruo rai i re vẹro . . . gbe uyoyou nọ owha be rehọ fiki riẹ ruẹ.” (Hib. 6:10) Fikiere, si iroro ethọthọ no udu ra, who gbe roro ho inọ who gbe wo iruo kẹ Jihova ha fikinọ whọ kpako no. Daoma rehọ iroro iwoma ro nwene iroro ọkora itieye. Jọ eghale nọ whọ be reawere rai gbe ẹruore nọ who wo na e lẹliẹ eva were owhẹ. Ma wo “ẹruore”—onọ o mai woma kpobi—yọ Ọnọ ọ ma omai ọ k’omai imuẹro riẹ no. (Jeri. 29:11, 12; Iruẹru 17:31; 1 Tim. 6:19) Roro kpahe ẹruore ra, daoma jọ jajaja, jẹ riẹ inọ whọ rrọ uduotahawọ kẹ amọfa nọ a tẹ be ruẹ owhẹ evaọ ukoko na!e

16. Fikieme oniọvo jọ nọ ọ kpako no o je ro roro inọ o re no ọkpako no, kọ ẹvẹ ugboma ekpako na a rọ tuduhọ iẹe awọ?

¹⁶ Roro kpahe Johan, ọnọ ọ kpako te ikpe udhone (80) no, nọ ọ be rẹrote Sannie, aye riẹ nọ ọ mọ fihọ uwou.f Inievo-emetẹ a jẹ hai nwene ohwohwo re a jọ kugbe oniọvo-ọmọtẹ nana re Johan, ọzae riẹ, ọ sai kpohọ iwuhrẹ gbe usiuwoma. Kẹle na, Johan o je roro inọ uye na o ga hrọ kẹe, fikiere o te je roro inọ o re dhugbe siobọno ọkwa ọkpako ukoko nọ ọ rrọ. Avọ irui oviẹ, ọ tẹ ta nọ: “Otọ ọkpako ukoko nọ mẹ rrọ na orọ? Mẹ gbẹ be sai ru emamọ oware ọvo evaọ ukoko na ha.” Ibe ekpako ukoko riẹ a tẹ ta kẹe inọ eriariẹ gbe iroro-ejẹ riẹ i bi fi obọ họ gaga. A tẹ tuduhọ iẹe awọ inọ ọ gbẹ jọ ọkpako dede nọ ọ gbẹ be sai ru te epaọ ọsosuọ họ. Fiki uduotahawọ nana, Johan ọ tẹ gbẹ jọ ọkpako, yọ ọ wha eghale buobu se ukoko na.

Jihova Ọ rẹ Ginẹ Daezọ

17. Imuẹro vẹ Ebaibol na e kẹ Ileleikristi nọ e kpako no?

¹⁷ Ikereakere na i ru rie vevẹ inọ enọ e kpako no a rẹ gbẹ sai kru oma ga evaọ egagọ Ọghẹnẹ ghelọ ebẹbẹ nọ owho o rẹ wha ze. Ọso-ilezi na ọ ta nọ: “Enọ a kọ fihọ uwou Jihova, . . . a te jọ gaga ghele evaọ oke owho, a te gbẹ jọ bọbọbọ avọ ẹgba.” (Ol. 92:13, 14, NW) Pọl ukọ na, ọnọ o wọhọ nnọ ọ jẹ ruẹ uye ẹyao, oma o rọ riẹ hẹ, dede nọ owho o jẹ lahiẹe.—Se 2 Ahwo Kọrint 4:16-18.

18. Fikieme amọfa a je fi obọ họ kẹ ibe Ileleikristi nọ e kpako no gbe enọ e be rẹrote ai?

¹⁸ Iriruo buobu evaọ oke mai na i dhesẹ inọ enọ e kpako no a rẹ gbẹ sae “jọ bọbọbọ.” Rekọ ebẹbẹ nọ ẹyao gbe owho e rẹ wha ze e rẹ wha idhọvẹ ze, makọ rọ kẹ enọ i wo ahwo uviuwou nọ e be rẹrote ai. Oma o rẹ sae jẹ lọhọ enọ e be rẹrote ekpako. Ukoko na soso a wo uvẹ-ọghọ gbe owha-iruo nọ a re ro dhesẹ uyoyou kẹ enọ e who no gbe enọ e be rẹrote ai. (Gal. 6:10) Obufihọ otiọye na o re dhesẹ inọ ma bi gine ru oware jọ ro fi obọ họ, orọnikọ ma be rehọ unu ọvo ta kẹ ae nọ “wha sasa oma jẹ re eva vọ” họ.—Jem. 2:15-17.

19. Fikieme uvi Ileleikristi nọ e kpako no a gbẹ rọ ruawa kpahe obaro ho?

¹⁹ Oleleikristi ọ rẹ sai ru te epanọ o je ru vẹre he nọ ọ be kpako na, rekọ uyoyou nọ Jihova o wo kẹ uvi idibo riẹ o re kie kpotọ họ nọ a be kpako na. Wo ohẹriẹ, uvi Ileleikristi nana kpobi a rrọ ghaghae kẹe, yọ o re vu ai wa vievie he. (Ol. 37:28; Aiz. 46:4) Jihova ọ te rẹrote ai bọwo ẹdẹ uwhu rai.—Ol. 48:14.

[Oruvẹ-obotọ]

Ẹvẹ Whọ te k’Uyo?

• Fikieme who re ro rri uvi Ileleikristi nọ e kpako no ghaghae?

• Ẹvẹ ma sai ro dhesẹ ọdawẹ kẹ ibe Ileleikristi nọ e kpako no?

• Eme o rẹ sai fi obọ họ kẹ idibo Jihova nọ e kpako no whaha awaọruọ kpahe obaro?

[Iwoho nọ e rrọ ẹwẹ-obe avọ 18]

Ahwo ukoko na a re rri enọ e kpako no na ghaghae