Ẹvẹ Ma Sai Ro Fi Obọ Họ?
1 Ẹsibuobu Isẹri Jihova e rẹ nọ onọ na “Ẹvẹ ma sai ro fi obọ họ?” nọ a te yo kpahe okpẹtu nọ ọ jọ abọjọ akpọ na via. Wọhọ epanọ iku nọ a kere fihọ Iruẹru Ikọ 11:27-30 i dhesẹ, Ileleikristi ikpe udhusoi ọsosuọ a fiobọhọ kẹ inievo nọ e jẹ ria Judia fiki ohọo nọ u je mu.
2 Evaọ oke mai na, uzi egọmeti o kẹ ukoko na uvẹ inọ ma sae rọ ugho ro ru iruẹru obufihọ kẹ ahwo nọ okpẹtu nọ ohwo ọ rọ obọ so ho hayo ọnọ ahwo a rọ obọ so ọ via kẹ gbe etoke ofa nọ ẹgwọlọ ọ tẹ roma via.
3 Wọhọ oriruo, evaọ ukpe nukpo, inievo buobu i ru unevaze nọ a ro fiobọhọ kẹ ahwo nọ otọ nọ o jọ abade nuhu ọ raha eware rai evaọ South Asia. Uvi owojẹ nana evaọ edhere nọ a ro ru unevaze ugho fihọ ẹkpa-ugho nọ a rẹ rọ dhogbo evaọ ukoko na u woma kẹhẹ. Rekọ nọ a te ru unevaze kẹ ugogo okpẹtu jọ, o rọ oware uzi evaọ erẹwho jọ re a rọ ugho na ruiruo lele oke nọ ohwo nọ o ru unevaze na o fihọ gbe epanọ ọ ta nọ a rọ ugho na ru, te a rọ ẹro te ẹgwọlọ inievo na no hayo a re rọ ẹro te ei hi.
4 Fikiere, ma jiroro kẹ ahwo kpobi inọ unevaze nọ a bi ru ro fiobọhọ kẹ ahwo nọ okpẹtu ọ via kẹ jọ a ru ie fihọ unevaze kẹ iruo akpọ soso na. A rẹ rọ igho nana ruiruo ogbodhẹ gbe ẹwhaharo ẹgwọlọ abọ-ẹzi okugbe-inievo Ileleikristi na. Otẹrọnọ ohwo ọ gwọlọ ru unevaze kẹ ogbodhẹ jọ sa hẹrioma no unevaze kẹ iruo akpọ soso na, ma rẹ jẹe rehọ jẹ rehọ iẹe ruiruo nọ ẹgwọlọ obufihọ o tẹ rọ oma via. Dede na, o te mai woma nọ a te ru unevaze itieye na ababọ oware nọ ohwo nọ o ru unevaze na ọ rẹ ta nọ a rọ ugho na ru gbe oke nọ a rẹ rehọ iẹe ruiruo.
5 Nọ ugogo ẹjiroro nọ ma ro ru unevaze ọ tẹ rrọ rọkẹ iruo akpọ soso na, u re ru nọ igho e jẹ jariẹ nọ a rẹ sai ro ruiruo evaọ kabọ kabọ iruo Uvie na viukpe nọ a re koko igho na họ hẹrẹ eware okpẹtu nọ e te via. Onana o rọwo kugbe eme nọ e rrọ Ahwo Ẹfẹsọs 4:16 na, inọ ma ruiruo kugbe re ma rehọ oware nọ o gwọlọ “kẹ oma na oro gbe ekokohọ eva uyoyou.”