Epanọ Ma Sai ro Fiobọhọ nọ Oware Okpẹtu O tẹ Via

Eware okpẹtu i bi dhe ẹviẹvia evaọ oke mai na. Nọ oware okpẹtu o tẹ via, u fo nọ inievo na a rẹ ma omaa jẹ ruẹrẹ eware họ ziezi re a sae riẹ ogbo na dhẹ. Re a sai ru onana, Utu Ẹruorote na o ta nọ jọ uwou ogha kpobi u wo ẹko-iruo okpokpọ nọ a re se Ẹko-Iruo Ogbodhẹ.

Nọ inievo nọ e rrọ ẹko-iruo nana a tẹ nwani yo nọ oware okpẹtu o via kẹ inievo mai, a ve se ekpako ukoko nọ e rrọ oria nọ oware na o jọ via ababọ oke oraha, re a riẹ oghẹrẹ nọ a sai ro fiobọhọ kẹ ae. Otẹrọnọ ẹbẹbẹ na ọ rrọ vi inievo nọ e be rria oria na abọ, uwou ogha o vẹ rọ inievo-emezae nọ i te mu re a kobaro evaọ iruo ogbodhẹ na. Inievo nọ uwou ogha u ro mu na a sae rehọ inievo efa nọ e fialoma via gboma re a gbe ru iruo na. Hayo a sae vuẹ inievo sa-sa re a zọhọ eware jọ dẹẹ ze, nọ inievo nọ oware na o via kẹ na a gwọlọ. Hayo a sae jẹ dẹ eware nana, a vẹ ghale ae kẹ inievo nọ oware na o via kẹ na.

Irere buobu i re noi ze nọ a te ru eware kpatiẹ ere. U re ru nọ iruo ogbodhẹ na i re ro koko oma họ ziezi, nọ a gbẹ rọ raha igho hayo eware kufiẹ hẹ, u re je ru nọ a gbe ro gbabọkẹ inievo jọ họ. Ebẹbẹ nana e rẹ sae romavia nọ inievo sa-sa a tẹ be rọ udu obọrai dhẹ ogbo na.

Inievo nọ uwou ogha u ro mu na a rẹ daoma riẹ unuigho nọ a te rọ dhẹ ogbo na, gbe unu ahwo nọ a gwọlọ kẹ ogbodhẹ na. Inievo nana a sai je lele ahwo egọmeti nọ e rrọ oria nọ oware na o jọ via na ta ẹme, keme ẹsibuobu ahwo nana a re fiobọhọ evaọ ogbodhẹ na. Fikiere, u fo vievie he re omomọvo ọ rọ udu obọriẹ mi igho hayo vi eware se ahwo nọ oware okpẹtu o via kẹ. Yọ u fo ho re ma kpohọ obonọ oware okpẹtu o jọ via re ma nyai fiobọhọ, ajokpanọ inievo nọ uwou ogha u ro mu na a vi omai.

O make rrọ ere na, nọ oware okpẹtu o tẹ via, ma rẹ gwọlọ fiobọhọ. (Hib 13:16) Ma you inievo mai gaga. Kọ eme ma rẹ sai ru? Oware nọ o mai wuzou họ, ma rẹ lẹ roro inievo nọ oware okpẹtu o via kẹ na gbe enọ e be dhẹ ogbo na. Ma sae jẹ rọ ugho ru unevaze fihọ etehe nọ ọ rrọ rọkẹ iruo akpọ-soso na hayo jọ itanẹte ru unevaze. Iwou ogha ae a mae riẹ oware nọ u fo nọ a rẹ rọ igho nana ru gbe oria nọ a mae jọ gwọlọ obufihọ, yọ Utu Ẹruorote ae a rẹ vuẹ ae oghẹrẹ nọ a re ru onana. Whọ tẹ gwọlọ fialoma via kẹ iruo ogbodhẹ, whọ sai fili efọmo Local Design/Construction Volunteer Application (DC-50), re uwou ogha o riẹ nọ whọ gwọlọ fiobọhọ.

WHA RRI IVIDIO NA OWHE NỌ Ọ RAHA EWARE GAGA EVAỌ BRAZIL, KẸSENA WHA VẸ KUYO ONỌ NANA:

Nọ owhe ọ raha eware evaọ Brazil evaọ ukpe 2020, eme Isẹri Jihova nọ e dhẹ ogbo na a ru nọ o were owhẹ gaga?