Obufihọ kẹ Ahwo nọ Eware Okpẹtu E Via Kẹ Evaọ 2023—“Ma be rọ Ẹro Ruẹ Epanọ Jihova O You Omai Te”

Ebaibol na ọ ta nọ “orẹwho o te kpareso orẹwho,” yọ eware okpẹtu e te via evaọ “oke urere uyero-akpọ na.” (Matiu 24:3, 7) Ma ruẹ nọ eruẹaruẹ nana i rugba evaọ ukpe iruo 2023 na.a Rekọ ghelọ eware okpẹtu nọ e be via evaọ ekwotọ nọ i te enwenọ udhusoi (100) soso na, Isẹri Jihova a be rọ aro kele Jihova dhesẹ uyoyou. Evaọ oghẹrẹ vẹ?

Evaọ ukpe iruo 2023 na, eware okpẹtu nọ e vrẹ egba ivẹ (200) e via kẹ inievo mai, te enọ ahwo a rọ obọ so gbe enọ ahwo a rọ obọ so ho. Isẹri Jihova a rehọ igho nọ i bu vi edọla ima ikpe ($10,000,000)b evaọ usu igho nọ a ro ru unevaze kẹ iruo akpọ-soso na ro fiobọhọ kẹ ahwo nọ eware okpẹtu e via kẹ. Yọ inievo emetẹ gbe emezae sa-sa a rehọ igho obọrai ro fiobọhọ kẹ ahwo nọ a rrọ okegbe rai re. Whọ te ruẹ epanọ a rọ rehọ igho nọ who bi ro ru unevaze fiobọhọ kẹ inievo nọ eware okpẹtu e via kẹ. Joma ta kpahe eware okpẹtu ivẹ jọ ọvo evaọ usu ibuobu nọ e via na.

“Uvi Uyoyou O Ginẹ Rrọ Ukoko Na”

Evaọ kukpe kukpe, u wo eria jọ evaọ Nigeria nọ owhe o re jo ku gaga. Rekọ owhe nọ o ku evaọ eria buobu evaọ orẹwho na evaọ Akpe 2022 ọ mae ga evaọ oware ikpe ikpe nọ e vrẹ na. Owhe na ọ raha idhu ahwo buobu gaga, yọ o le ahwo nọ a bu vi ima ivẹ (2,000,000) no iwou ra. Ababọ oke oraha, uwou ogha Nigeria o tẹ rọ Egbẹgwae Ogbodhẹ mu re a ru epanọ a re ro fiobọhọ kẹ inievo na jẹ tuduhọ ae awọ re a kru ẹrọwọ rai.

Epanọ Eware Inievo Mai E Raha Te

• Iwhowho-uvie idu ihrẹ gbe egba isoi gbe isoi (7,505) a dhẹ no iwou rai

• Iwou egba eree gbe udhosa (860) e raha

• Owhe o ku Egwa Uvie 90 gbe Ọgwa Okokohọ ọvo

Oware nọ A rọ Igho Unevaze Ru

A rọ igho nọ i bu vi edọla idu egba ivẹ gbe udhuvẹ-gbikpe ($250,000) dẹ eware nọ a ro fiobọhọ kẹ inievo na, eware na jọ họ:

• Emuore wọhọ eraese, ibinsi, gbe indomie

• Eware uwou wọhọ ehwa gbe iwou inwe

• A ruẹrẹ iwou nọ e raha, yọ a wariẹ bọ ejọ dede

Ẹvẹ inievo mai na a rọ ruẹ nọ a raha igho unevaze na kufiẹ hẹ? Edhere jọ họ a rri uwou ovuovo mu ziezi re a riẹ sọ a rẹ sae ruẹrẹ iẹe. Nọ o tẹ gwọlọ nọ a rẹ wariẹ bọ uwou jọ, a bọ riẹ omoghẹrẹ nọ a rẹ bọ iwou evaọ okegbe na.

Eva e be were inievo-emezae gbe emetẹ mai nọ a fiobọhọ kẹ na gaga. Oniọvo-ọmọtẹ jọ ọ ta nọ: “Owhe na o ru uzuazọ mai galuzovi keme idhu mai kpobi e raha, yọ ma gbe wo iwou nọ ma rẹ rria ha. Udu u te omai otọ nọ ma ruẹ inievo emezae gbe emetẹ mai nọ e nyabru omai ze ẹdẹdẹ yena jẹ rehọ omai kpohọ oria nọ ọ foma nọ ma rẹ sae rria. Udu u te je te omai otọ viere nọ ma ruẹ emuore nọ a vi no obọ uwou ogha se omai. Akpọ o gbe omai unu nọ ma ruẹ oghẹrẹ nọ eme nọ e rrọ Jọn 13:34, 35 i ro rugba kẹ omai. . . . Uvi uyoyou o ginẹ rrọ ukoko na. Mẹ avọ uviuwou mẹ soso ma be rọ udu mai kpobi yere inievo na nọ a rọ dhogbo ze ti fiobọhọ kẹ omai evaọ ẹruoke.”

Amọfa evaọ ẹwho na a muẹrohọ iruo ogbodhẹ mai na. Oletu ẹwho Sabagreia evaọ Bayelsa State ọ ta nọ: “Ikoko hayo ichọche buobu e rrọ akpọ na, rekọ Isẹri Jihova ọvo i ru oware utiona no. . . . Ukoko rai o rrọ usu ikoko nọ e mai woma evaọ akpọ na.”

“Ma be rọ Ẹro Ruẹ Epanọ Jihova O You Omai Te”

Evaọ Ava 2023, unuẹse nọ o vrẹ egba ene (400) erae e mahe eware raha evaọ Chile. Oria nọ erae na e to o rro gaga yọ emamọ iwou gbe eware orẹwho Chile buobu e to raha. Enwenọ ahwo idu eree (8,000) a dhẹ no iwou rai. Nọ erae na e nwani muhọ ẹto no, uwou ogha nọ ọ rrọ obei u te mu epanọ a re ro fiobọhọ kẹ inievo na họ eru.

Epanọ Eware Inievo Mai E Raha Te

• Iwhowho-uvie egba ivẹ gbe udhegbivẹ (222) e dhẹ no iwou rai

• Iwou udhe e to raha

Oware nọ A rọ Igho Unevaze Ru

A rọ igho nọ i bu vi edọla idu egba ivẹ ($200,000) dẹ eware nọ a ro fiobọhọ kẹ inievo na, eware na jọ họ:

• Emuore gbe ame

• Efuẹle, eware nọ a re ro ru ẹfuọ, gbe imu nọ a rẹ lọ

• A wariẹ bọ iwou nọ e to

Ekpahe i kpe ahwo uviuwou jọ nọ a ruẹ nọ eware rai kpobi e to no, te uwou rai gbe eware nọ a be rọ kọ okọ. Uviuwou na u gbe wo iruo nọ a sae rọ rẹrote omarai hi. Emedẹ jọ nọ erae na e to vrẹ no, o kẹ uviuwou na uye gaga nọ a ruẹ nọ oria nọ uwou rai o jọ vẹre o zihe ruọ ẹkpẹ gheghe no. Rekọ nọ a wariẹ mu uwou na họ ẹbọ kẹ ae no, oma u te mu ai họ ẹsasa ẹmẹrera. Nọ a ruẹ uyoyou nọ inievo nọ e fialoma via jẹ bọ uwou na a dhesẹ kẹ ae, u fiobọhọ kẹ ae thihakọ okpẹtu na. Oware nana u duobọte inievo na gaga te epanọ a ro kuomagbe inievo nọ e fialoma via na wariẹ bọ uwou oniọvo ọfa jọ.

Iruo ogbodhẹ na i duobọte inievo-emezae gbe emetẹ mai buobu. Oniọvo-ọmọzae jọ ọ ta nọ: “A rẹ ruẹ obọ ọruẹrẹfihotọ Egbẹgwae Ogbodhẹ nọ Jihova o ru kẹ omai na ha. Nọ oware na o nwane via no, okiokiọ riẹ inievo na a tẹ nwane nyaze be kẹ omai eware nọ ma gwọlọ. Nọ who te se kpahe epanọ a be rọ dhogbo nyai fiobọhọ kẹ inievo sa-sa evaọ abọfa akpọ na, o rẹ tuduhọ ohwo awọ. Rekọ oware okpẹtu o tẹ via kẹ owhẹ, ẹsiẹe whọ rẹ riẹ epanọ ukoko na u woma te. Whọ rẹ ruẹ epanọ inievo na a be rọ rehọ aro kele iruemu Jihova. A rẹ ginẹ daezọ ra jẹ ruẹ nọ a kẹ owhẹ eware nọ whọ rẹ rọ rẹrote omara, yọ a rẹ jẹ rọ Ebaibol na tuduhọ owhẹ awọ jẹ sasa owhẹ oma. Ma be rọ ẹro ruẹ epanọ Jihova o you omai te.”

Nọ ma bi si kẹle ekuhọ uyero-akpọ nana, eware okpẹtu i ti dhe ẹviẹvia vi epaọ anwẹdẹ. (Luk 21:10, 11) Rekọ Jesu Kristi nọ ọ rrọ Ovie oyoyou mai na ọ be rọ ukoko Ileleikristi na dhesẹ kẹ omai nọ ọ rrọ kugbe omai “edẹ na kpobi rite oke urere uyero-akpọ na.” (Matiu 28:20) Ugho nọ whọ be hae rọ kẹ okẹ unevaze evaọ donate.jw.org gbe idhere efa, avọ oke gbe ẹgba ra nọ who bi ro ru eware ukoko na efa u dhesẹ nọ whọ rrọ abọ Uvie na gbe ovie Oyoyou mai na. Ma bi yere owhẹ gaga rọkẹ unevaze nọ whọ be hai ru ẹsikpobi na.