Ogbo nọ Ma Dhẹ Evaọ 2021—Ma Dhogbo Bru Inievo Mai nọ E Gwọlọ Obufihọ

Evaọ ukpe iruo 2021 na,a yọ ẹyao COVID-19 na o gbe bi siotọ. Ma raha igho buobub rọ dhogbo bru inievo mai fiki ẹyao na wọhọ epanọ ma ta evaọ uzoẹme na “A Rehọ Unevaze Ra Fiobọhọ nọ Okpẹyao O Du Lahwe Evaọ Akpọ na Soso.” Yọ Egbẹgwae Ogbodhẹ nọ ma ro mu no i bu vi egba izii gbe udhuvẹ-gbikpe (950).

Ghelọ okpẹyao COVID-19 na nọ ọ rrọ otọ na, eware okpẹtu efa e via kẹ inievo mai no evaọ eria sa-sa akpọ na, te enọ ahwo a rọ obọ so, te enọ a rọ obọ so ho. Eware okpẹtu itieye na nọ e via i bu vi egba ivẹ (200). Fikiere Ogbẹgwae Otu Ẹruọsa ọrọ Utu Ẹruorote na o tẹ kuvẹ nọ ma raha igho nọ i bu vi edọla 8 million koyehọ ₦3,322,320,000 ro fiobọhọ kẹ inievo mai na. Onana o rrọ usu igho nọ a raha fiki ẹyao COVID-19 na ha. Joma ta kpahe epanọ a rọ rehọ okẹ unevaze ra fiobọhọ kẹ inievo mai evaọ erẹwho ivẹ jọ.

Ugbehru Nyiragongo nọ O Sa Zue

Evaọ edẹ udhegbivẹ Asoi ọrọ ukpe 2021, ugbehru jọ nọ a re se Nyiragongo evaọ obọ Democratic Republic of the Congo, o tẹ sa zue. Ọloho ọrrorro o te bi hwẹ no eva riẹ ze. Ọloho na o raha iwou, isukulu gbe oria jọ nọ a rẹ jọ sẹro ame. U te no ere no, oghẹrẹ enwo ọrrorro jọ o te je hwẹ no ugbehru na ze evaọ ẹwho jọ nọ a re se Goma, yọ o hwẹ evaọ edẹ buobu. Otọ u je nuhu ẹsibuobu re. A tẹ ghale ahwo nọ a rrọ ẹwho na kpohọ abava, ahwo nọ a ta kẹ nọ jọ a kwa no iwou rai a bu vi abọvo. Ahwo buobu gbidi gbidi a dhẹ, ejọ e tubẹ dhẹ no orẹwho na kpobọ Rwanda dede.

Isẹri Jihova nọ e kwa no uwou rai a bu te oware wọhọ idu isoi (5,000). Ọloho ọrrorro na ọ raha iwou inievo na jọ, efa kọ ahwo a kwa eware rai nọ a dhẹ seba rehọ. Inievo nọ e jọ egbẹgwae ogbodhẹ evaọ Rwanda avọ Democratic Republic of the Congo a fiobọhọ kẹ inievo na. Uwou ogha Congo (Kinshasa) o ta kpahe ogbẹgwae ogbodhẹ jọ inọ: “Inievo nọ e jọ ogbẹgwae na a jẹ ghale emu, ame, ehwa nọ a re kiẹzẹ, gbe iwu kẹ inievo na dede nọ ẹwho na ọ jọ zighi zighi. Yọ taure a tẹ te ta kẹ ahwo nọ jọ a kwa no iwou rai dede, yọ ogbẹgwae na a mu eware na họ ẹghale no.” Evaọ ẹwho jọ nọ inievo nọ i bu vi idu ivẹ (2,000) a kokohọ, ogbẹgwae na o kẹ rai imiwou nọ a rẹ sae gha họ, gbe emaske. A te je wuhrẹ ae oware nọ a re ru re a gbe wo ẹyao COVID-19 hayo ekọlẹra ha.

Inievo nọ e rrọ egbẹgwae ogbodhẹ na a ghale eware buobu kẹ inievo na. Eware nọ a ghale na họ, ekpa erase nọ e gbẹdẹ vi ekpa isimeti ẹgba ọvo gbe eree (108), ekpa eflawa nọ a rọ eka ru nọ e gbẹdẹ vi unu ekpa isimeti itieye, egalọno ewhri nọ o re te ilita idu eree, egba ene gbe udhone gbe ikpegbisoi (8,495) gbe ame nọ ọ rẹ vọ unu egalọno itieye ọvona. Yọ evaọ emerae esa ọvo a rọ ghale edele eware nana kpobi kẹ ae. Re a siọ ugho ba ẹraha ga hrọ, uwou ogha o tẹ ta nọ jọ a jọ orẹwho na dẹ eware na, yọ a dẹ rai buobu.

Oware nọ o via na o raha uwou okpokpọ oniọvo-ọmọtẹ jọ. Ọ ta nọ: “Oware na o kẹ omai uye gaga.” Rekọ inievo na a fiobọhọ kẹ ọyomariẹ avọ uviuwou riẹ jẹ tuduhọ ae awọ. Uwhremu na ọ tẹ ta nọ: “Jihova o bi fiobọhọ kẹ omai gaga, ọ be kẹ omai eware nọ ma gwọlọ. Jihova ọ rẹ ginẹ rẹrote omai nọ uye u te te omai oma, yọ onana o rẹ lẹliẹ udu te omai otọ.”

Ẹgaga nọ Ọ Rrọ Inievo Mai Oma Evaọ Obọ Venezuela

Anwọ ikpe jọ ze na, eware e rrọ gaga evaọ Venezuela. Eware e lọhọ kẹ inievo mai nọ e rrọ obei he. Re a sae re eva vọ, okolo ho, yọ ekpehre ahwo a da orẹwho na fia. O make rrọ ere na, ukoko Jihova u bi fiobọhọ kẹ ae.

Evaọ ukpe iruo nọ o vrẹ na, ukoko na o raha ugho nọ u bu vrẹ edọla 1.5 million koyehọ ₦622,935,000 rọ dẹ emu gbe odha vi se inievo mai. Uwou ogha obọ Venezuela o ta nọ: “Re a sae wọ emu nọ ọ rẹ vọ enwenọ itrela ene ro se inievo nọ e rrọ eria sa-sa evaọ Venezuela kamara kamara jẹ ghale emu na kẹ ae, o lọhọ họ. Ukoko u re vi emu nọ o rẹ kake raha ha se inievo na re e gbẹ raha no taure i te ti te ae obọ họ. Uwou ogha na o tẹ jẹ ta nọ: “Ma rẹ dẹ emu na buobu fihọ obei evaọ ezi nọ eware emuore e rẹ rọ ghare tere he. Yọ oghẹrẹ nọ ma riẹ nọ o te lẹliẹ omai raha ugho ga hrọ họ ma rẹ rọ wọ emu na se inievo na.”

Oniọvo jọ nọ a re se Leonel ọ rrọ Ogbẹgwae Ogbodhẹ evaọ obọ Venezuela yọ eva e be were iẹe gaga inọ o bi fiobọhọ kẹ inievo na. Ọ ta nọ: “Iruo ogbodhẹ na, a rẹ ruẹ obọ riẹ hẹ. Anwẹnọ ẹyao COVID-19 o ro kpe aye oyoyou mẹ na, iruo ogbodhẹ na e be hai ru oma sasa omẹ. U bi ru nọ mẹ gbẹ be rọ jọ ọkọkora ha yọ mẹ riẹ nọ iruo na e be wha erere se inievo na. Mẹ ruẹ vevẹ nọ Jihova ọ be ginẹ nyasiọ idibo riẹ ba ha wọhọ epanọ ọ ta nọ o ti ru.”

Oniọvo jọ nọ ogbẹgwae ogbodhẹ na a fiobọhọ kẹ ọ jọ ogbẹgwae ogbodhẹ vẹre. Ọ ta nọ: “Obọnana kọ omẹ a bi fiobọhọ kẹ. Orọnọ emu ọvo inievo na a kẹ omai hi. Rekọ a tuduhọ omẹ avọ aye mẹ awọ re ma gbẹ ruawa ga hrọ họ. A fiobọhọ kẹ omai yọ a ta ẹme nọ u ru udu te omai otọ.”

Ẹsejọ eware okpẹtu e rẹ via kpregede. Ghele na, ukoko Jihova o be hae daoma fiobọhọ vẹrẹ vẹrẹ. A be sai fiobọhọ kẹhẹ na, fiki unevaze nọ who bi ru rọkẹ iruo akpọ-soso na. A fodẹ idhere jọ nọ whọ sai ro ru unevaze evaọ donate.jw.org. Unevaze nọ wha bi ru o da omai ẹro fia.