A Rehọ Unevaze Ra Fiobọhọ nọ Okpẹyao O Du Lahwe Evaọ Akpọ na Soso

Nọ ukoko nọ a re se World Health Organization o ta evaọ Asa 2020 inọ ẹyao COVID-19 na yọ okpẹyao, ahwo buobu a roro nọ ẹyao na o ti kri otọ vrẹ ukpe ọvo soso ho. Okpẹyao nana ọ lẹliẹ ima ahwo buobu mọ, o wha ẹyao iroro fihọ ahwo oma, yọ o lẹliẹ ahwo raha ugho gaga. Yọ Isẹri Jihova jọ a ruẹ uye eware nana re. Ẹvẹ Isẹri Jihova a ro fiobọhọ evaọ etoke idhọvẹ nana?

A Kẹ Rai Eware nọ A Ginẹ Gwọlọ

Ẹko-iruo Ogbẹgwae Utu Ẹruọsa ọrọ Utu Ẹruorote Iruẹru Isẹri Jihova, o rehọ Egbẹgwae Obufihọ kẹ Ahwo nọ Eware Okpẹtu E Via Kẹ (DRC) ro mu. Egbẹgwae nọ a ro mu evaọ akpọ na soso fiki ẹyao COVID-19 na, i bu vi egba izii gbe udhuvẹ gbe ikpe (950). Evaọ eria jọ, a ru ọruẹrẹfihotọ nọ inievo na a sai ro fiobọhọ kẹ ohwohwo, yọ evaọ eria efa, Isẹri Jihova a wo erere no obufihọ nọ ahwo egọmeti a be kẹ ze. Egbẹgwae obufihọ nana, a daoma fiobọhọ kẹ ahwo buobu.

Wọhọ oriruo, joma ta kpahe epanọ eware e jọ evaọ orẹwho Paraguay. Obe-usi jọ o ta nọ ẹbẹbẹ ugho nọ okpẹyao nana o wha ze u ru nọ, “ohọo u bi ro kpe ahwo Paraguay buobu keme a wo ugho nọ a be rọ dẹ emu hu.” Rekọ taure eware i te ti yoma te ere, yọ egbẹgwae obufihọ evaọ Paraguay a mu emu gbe eware orufuọ họ ẹghale no rọkẹ inievo na. Eware na i re te uviuwou nọ imane e rrọ re te eka ivẹ. Unuigho eware nana i bu te oware wọhọ enaera idu ikpegbivẹ gbe egba esa gbe udhosa (₦12,360).

Ẹvẹ inievo nana nọ e jẹ dhogbo na a rọ thọ omarai gbe amọfa re ẹyao COVID-19 na o gbe vo ruọ ae oma ha? A je ku oware họ ruru inwe gbe unu rai, yọ a jẹ kẹle ohwohwo ho. Yọ a jẹ daoma ruẹ nọ ekọmpene nọ e be zẹ emu kẹ ae na a bi there emu rai evaọ eria nọ e rrọ fuafo, yọ a be jẹ daoma ru eware nọ a sae rọ thọ omarai. Oghẹrẹ nọ a ro ru onana họ, a jẹ ta kẹ ahwo kpobi nọ a jẹ ghale eware na re a ku eware họ abọ je ruru ovao rai, re a jẹ rọ eware nọ i re kpe emerae nọ e rẹ wha ẹyao ze ro ririe imoto rai gbe eria nọ a te wọ eware na fihọ. Ofariẹ, ahwo nọ a jẹ zẹ eware na kẹ ae na, a jẹ kẹle inievo mai nọ e jẹ wọ eware na mi ai hi.

A jẹ Raha Igho Unevaze na avọ Areghẹ

No umuo oke nọ iruo obufihọ na o ro muhọ rite amara Ọvo 2021, Ogbẹgwae Utu Ẹruọsa ọrọ Utu Ẹruorote Iruẹru Isẹri Jihova o kuenu kẹ araha nọ u bu te enwenọ enaera ima-idu ikpe gbe ima egba esa (₦10,300,000,000) no fiki ẹyao COVID-19 na. Iwou ogha gbe egbẹgwae obufihọ sa-sa a be raha igho unevaze na avọ areghẹ. A rẹ thuọ eware nọ a gwọlọ dẹ ziezi re a ruẹ nọ unuigho rai u kpotọ. Wọhọ oriruo evaọ orẹwho Chile, inievo mai nọ e be rẹrote iruo obufihọ na, a jẹ gwọlọ dẹ ezae buobu nọ e gbẹdẹ te ekpa isimeti ikpegbisoi (750kg). Rekọ evaọ amara ọvuọvo, unuigho ezae e tẹ rọ akuava ghare vi epanọ e jọ! A tẹ rọwo nọ a rẹ dẹ ezae na ghele dede nọ e ghare no. Rekọ nọ euwa ivẹ e vrẹ no, ohwo nọ ọ be zẹ ezae na o te se ae inọ ohwo jọ nọ ọ dẹ ezae vẹre o zihe i rai ze. Fikiere ukpenọ a rẹ dẹ ezae na evaọ unuigho okpekpehru nọ a rọwo fihọ vẹre na, ohwo na ọ tẹ rọwo nọ ọ rẹ zẹ ezae nọ a zihe ze na kẹ inievo mai evaọ unuigho nọ o kpotọ nọ a jẹ rọ zẹ evaọ amara nọ ọ vrẹ na!

Rekọ nọ inievo mai a nyae wọ ezae nọ a dẹ na, ohwo nọ ọ be zẹ ae na ọ tẹ gwọlọ nọ ọ rẹ gbẹ zẹ kẹ ae he. Ọ jẹ fo inievo mai inọ a bi dhesẹ ọriẹwẹ wọhọ itu efa nọ e be ghale eware kẹ ahwo, keme eware nọ a be ghele na ejọ i bu vi ejọ. Nọ oniọvo mai jọ ọ lẹ fihọ eva no, ọ tẹ ta kẹ ohwo nọ ọ be zẹ eware na inọ, a kiẹ ikoko na ọvuọvo riwi re a riẹ ahwo nọ a ginẹ gwọlọ obufihọ. Inievo na a tẹ jẹ ta kẹe nọ, fikinọ ahwo nọ a be te ghale eware na kẹ na a no eria sa-sa ze, eware nọ a ti fihọ evaọ ẹkpa ọvuọvo e te jọ eware nọ i re kiehọ kẹ uviuwou ovuovo. Ofariẹ, a tẹ jẹ ta kẹ ohwo na nọ, ahwo a rẹ rọ ugho ru unevaze kẹ Isẹri Jihova, yọ unevaze ahwo a be rọ fialoma ze ti ru eware na. Ẹme nọ inievo na a ta na o duobọtei udu. Fikiere ọ tẹ rọwo nọ a rọ unuigho nọ o kpotọ na dẹ eware na, yọ evaọ oke ofa nọ inievo na a wariẹ zihe nyae dẹ ezae, ọ tẹ rehọ ekpa ezae nọ e gbẹdẹ te ekpa isimeti eree (400kg) ro ru unevaze kẹ ae.

“A Gine You Ohwohwo”

Aye-uku jọ nọ a re se Lusu nọ ọ kpako gaga no, ọ be rria kugbe ọmọtẹ riẹ avọ ọzae riẹ gbe emọ esa rai evaọ orẹwho Liberia. Evaọ ohiohiẹ ẹdẹjọ nọ a se isase okpẹdẹ no jẹ be re emu, ọmọ-uruọmọ Lusu nọ ọ rrọ ikpe ihrẹ o te muẹrohọ nọ emu ọ gbẹ rrọ uwou na ha. Ọ tẹ nọ nọ, “Eme ma be te re enẹna?” Lusu ọ tẹ ta kẹe nọ ọye omariẹ ọ lẹ se Jihova no, yọ u mu rie ẹro inọ Jihova ọ te rẹrote ae. Evaọ uvo ẹdẹ yena, ekpako ukoko a tẹ rọ ifonu se Lusu re ọ nyae rehọ emu nọ a ghale kẹ ae. Lusu ọ ta nọ: “Ọmọ-uruọmọ mẹ ọ tẹ ta nọ obọnana u mu rie ẹro inọ Jihova o re gine yo elẹ keme Jihova ọ kuyo olẹ mẹ.”

Aye jọ evaọ orẹwho Democratic Republic of Congo ọ be rria kẹle uviuwou Isẹri Jihova jọ. Nọ aye na ọ ruẹ nọ Isẹri Jihova efa a rehọ emu se uviuwou Isẹri Jihova na, ọ tẹ ta nọ, “Nọ okpẹyao na o te no otọ no, ma ti kurẹriẹ ruọ Isẹri Jihova, keme a be rẹrote ahwo rai ziezi evaọ etoke obẹbẹ nana.” Ọzae riẹ ọ tẹ nọe nọ, “Kọ whọ gwọlọ kurẹriẹ ruọ Isẹri Jihova fiki ẹkpa eraese?” O te yo kẹe nọ, “Ijo, orọnikọ fiki ere he, rekọ ẹkpa eraese nọ a kẹ rai na u dhesẹ nọ a gine you ohwohwo.”

Mai Isẹri Jihova ma be sai fiobọhọ kẹ inievo mai vẹrẹ vẹrẹ evaọ etoke okpẹyao nana fiki unevaze nọ who bi ru. Ma yere owhẹ nọ whọ be rọ rehọ idhere sa-sa ru unevaze evaọ donate.jw.org.