Eme Whọ Rọ Karo?
1 Ẹvẹ whọ rẹ kuyo onọ yena? Evaọ uzẹme, mai kpobi ma gwọlọ nọ ma rẹ rọ isiuru Uvie na karo. (Mat. 6:33) Rekọ ma sae nọ oma mai nọ: ‘Kọ iroro-ejẹ mẹ gbe eware nọ me bi ru i dhesẹ nọ me bi ru ere?’ Ebaibol na e tuduhọ omai awọ inọ ma hai dhesẹ oghẹrẹ ohwo nọ ma rrọ via. (2 Kọr. 13:5) Oghẹrẹ vẹ ma sai ro dhesẹ nọ ma be rọ Uvie na karo?
2 Oke Mai: Ma rẹ sae rehọ ẹkiẹriwi oghẹrẹ nọ ma be rehọ oke mai ruiruo ro muhọ. (Ẹf. 5:15, 16) Ẹvẹ ma be raha oke te evaọ ẹkpoka rọkẹ omawere, etẹlivisiọno iriwo, Itanẹte, hayo arozaha? Ma tẹ rehọ oke nọ ma be raha rọkẹ eware nana rọ wawo oke nọ ma be raha kẹ eware abọ-ẹzi, o rẹ sai gbe omai unu. Kọ ma be raha oke gaga kẹ iruo mai je gbabọkẹ eware abọ-ẹzi re ma ruẹse ruẹ ugho ro ru ikpeware? Brẹse ma be hai gbabọkẹ iwuhrẹ hayo usiuwoma ota ma vẹ rehọ oke na nyai ru eware efa?
3 Rọ Eware nọ I Wuzou Karo: Rọ k’omai e jọ buobu, oke o riẹ tere nọ ma re ro ru eware kpobi nọ ma gwọlọ ru hu. Fikiere, re ma sae rọ isiuru Uvie na karo, u fo re ma kiẹ eware nọ ma rọ karo riwi, kẹsena ma ve fi oke họ kẹ ‘eware nọ e mae r’oja.’ (Fil. 1:10) Enana e kẹre te Ebaibol na nọ ma re se je roro kpahe, kpohọ usiuwoma ota, ẹruorote uviuwou mai, gbe ekpohọ iwuhrẹ Ileleikristi. (Ol. 1:1, 2; Rom 10:13, 14; 1 Tim. 5:8; Hib. 10:24, 25) Eware efa wọhọ erozaha nọ a re ro ru oma sasa nọ e rrọ umumuo e rẹ kẹ erere. (Mak 6:31; 1 Tim. 4:8) Rekọ u fo ho re eware nana nọ e roja tere he na i mi omai oke nọ ma re ro ru iruo Uvie na.
4 Uzoge oniọvo-ọmọzae jọ ọ ha inọ ọ rẹ rọ isiuru Uvie na karo ẹkwoma emuhọ iruo ọkobaro oke-kpobi viukpenọ o re le isukulu ikpehru nọ e rẹ sai fiobọhọ kẹe ruẹ iruo nọ o re ro wo igho. O wuhrẹ ẹvẹrẹ ọfa, jẹ kwa kpohọ oria nọ ẹgwọlọ kẹ iwhowho-uvie ọ jẹ mae rro. Ọ ta nọ: “Me bi wo omawere uzuazọ evaọ obonẹ. Iruo odibọgba na e be kẹ omẹ omosasọ kẹhẹ! Dodonikọ uzoge kpobi o re ru oware nọ o wọhọ onana re o wo oghẹrẹ omawere nọ me bi wo na. Oware ovo nọ u woma vi Jihova nọ ma rẹ gọ avọ onọ ma wo kpobi o rrọ họ.” Ẹhẹ, isiuru Uvie nọ ma rẹ rọ karo o rẹ wha eghale ze, rekọ mai wuzou, o rẹ lẹliẹ eva were Ọsẹ obọ odhiwu mai, Jihova.—Hib. 6:10.