Rehọ Oke Ra Ruiruo Avọ Areghẹ
1 Isiuru nọ ma gwọlọ ro ru Jihova eva were o rẹ wọ omai tọ uzuazọ mai vi eware abọ-ẹzi. Ẹme riẹ ọ hrẹ omai nọ ma “kake guọlọ uvie riẹ” re ma je ‘muẹrohọ eware nọ e mae roja.’ (Mat. 6:33; Fil. 1:10) Ẹvẹ ma sae rọ dẹ uvẹ kẹ isiuru Uvie na jẹ whaha eware nọ i wuzou tere he nọ ma rẹ rọ karo?—Ẹf. 5:15-17.
2 Rehọ Iruẹru Uvie na Karo: Ma omaa oke ra fihọ re eware nọ e roja ha e se oke ra ba ẹrehọ. Ahwo jọ a re mu kamara kamara họ avọ edẹ jọ nọ a rẹ jọ ukeledẹ rai kpoka họ nọ a re ro kpohọ usiuwoma ota. A vẹ yọrọ oma gaga re eware efa e se omaa rai na ba ekpomahọ. Ma rẹ sai ru epọvo na rọ dẹ uvẹ kẹ iwuhrẹ ukoko, ewuhrẹ omobọ-ohwo, gbe ikokohọ. Ahwo buobu a wo omaa okpẹdẹ nọ u re muhọ hayo kuhọ avọ isase Ebaibol. Fi ugogo oke jọ họ kẹ eware nọ i wuzou ọvuọvo, yọ whọ kuvẹ re eware efa i kpomahọ ai hi.—Ọtausi. 3:1; 1 Kọr. 14:40.
3 Whọ Rehọ Oma Kpobi kẹ Iruẹru Akpọ na Ha: Evaọ ekwotọ jọ, aruọzaha, ẹkeriotọ omaweromẹ, gbe ilale efa e vọ riẹ buobu. Ahwo buobu a be raha oke gaga ro rri etẹlivisiọno hayo ekọmputa. Dede na, oma kpobi nọ ma rẹ rọ kẹ iruẹru erozaha gbe ekwakwa ẹlẹtriki ekpokpọ nọ akpọ na o bi siobọno i re su kpohọ idhọvẹ. (1 Jọn 2:15-17) Fikiere, Ikereakere na e tuduhọ omai awọ nọ ma rehọ akpọ na ruiruo vọvọ họ. (1 Kọr. 7:31) Ẹkwoma uthubro areghẹ yena nọ whọ rẹ jẹ rehọ, whọ rẹ sai dhesẹ kẹ Jihova inọ egagọ riẹ họ oware nọ whọ rọ karo evaọ uzuazọ ra.—Mat. 6:19-21.
4 Oke nọ u kiọkọ re eyero nana o kuhọ u tulo ho. Ahwo nọ a rọ isiuru Uvie na karo a te ghọghọ je wo aruoriwo Ọghẹnẹ. (Itẹ 8:32-35; Jem. 1:25) Fikiere, joma rehọ oke mai nọ o rẹ ghaghae na ruiruo ziezi.