Fi Arozaha Eriosehọ Họ Oria nọ U Fo
1 Evaọ edẹ ebẹbẹ enana, u fo nọ mai kpobi ma re s’oma họ n’oke ruoke. Umutho arozaha jọ u kiehọ. Rekọ, a tẹ be raha oke bu hrọ fihọ arozaha eriosehọ, ugheriwo, gbe omawere o sai ru nọ ohwo ọ rẹ rọ rehọ ẹmẹrera ro bru oke nọ ọ rẹ raha fihọ ilale abọ-ẹzi kpotọ. Ma re fi arozaha eriosehọ họ oria nọ u fo hrọ. (Mat. 5:3) Ẹvẹ onana o rọ lọhọ? Ẹkwoma elele ohrẹ nọ o rọ Ahwo Ẹfẹsọs 5:15-17.
2 Fi Umuo Họ: Pọl o kere nọ u fo re Ileleikristi a “fiẹrohọ otọ” evaọ oghẹrẹ nọ a re ro yere izuazọ rai avọ areghẹ. O gwọlọ owowa gbe oma-oriẹsuo re a bru oke arozaha eriosehọ kpotọ te umuo nọ u fo. U woma re ma roro gaga kpahe oghẹrẹ nọ ma rẹ rehọ oke uvẹ mai ro ruiruo. U fo re arozaha eriosehọ ọ kẹ erere viukpenọ u re ru omai roro nọ ma raha oke mai kufiẹ hayo ru oma rrọ omai. Otẹrọnọ ma wo iroro abe-ọriọ nọ ma tẹ raha oke fihọ iruẹru eriosehọ jọ no, onana u re dhesẹ nọ u fo re ma ru inwene jọ evaọ eroruiruo oke mai.
3 Dhesẹ Iroro: Pọl ọ kẹ ohrẹ kpahe ‘ẹdẹ oke uvẹ na’ rọkẹ eware nọ e mae r’oja evaọ uzuazọ, re ma se “igheghẹ” ba ẹjọ. Ileleikristi nọ e rehọ oma mudhe no a rẹ bọ izuazọ rai wariẹ arozaha eriosehọ vievie he. Dede nọ eriosehọ ọ sai ru omai jọ jajaja evaọ ugboma, ehri ẹgba abọ-ẹzi họ ogaga iruo Ọghẹnẹ. (Aiz. 40:29-31) Ma re wo ẹzi na ẹkwoma iruẹru Uvie—ewuhrẹ Ebaibol na, ekpohọ iwuhrẹ ukoko, abọ-owo evaọ usiuwoma ota—orọnikọ ẹkwoma arozaha eriosehọ họ.
4 Fi Eware nọ E Mae r’Oja Haro: Pọl ọ hrẹ Ileleikristi re a “riẹ otọ epanọ oreva Ọnowo na o rọ.” Jesu o wuhrẹ nọ Uvie Ọghẹnẹ o rẹ karo evaọ iruẹru uzuazọ mai kpobi. (Mat. 6:33) O r’oja nọ ma rẹ kaki ru eware nọ e rẹ k’omai uvẹ re ma rria te omaromudhe mai kẹ Jihova. Kẹsena, ma rẹ sai fi oke arozaha eriosehọ họ oria nọ u fo. Ma te ru ere, eriosehọ o re wo omamọ okpomahọ, yọ ma te reawere riẹ viere.—Ọtausi. 5:12.