Epanọ A Re Ro Ru Uvẹ
1 Re ma wo eware buobu nọ ma re ru evaọ iruo Jihova u re ru omai wo iruo buobu! (1 Kọr. 15:58) Ma vuhu ẹgwọlọ nọ ma re ro ru uwuhrẹ obọ ohwo mu gbe wọhọ uviuwou, re a se Ebaibol na kẹdẹ kẹdẹ, re a ruẹrẹ oma kpahe je kpohọ iwuhrẹ ukoko na, je w’abọ kẹse kẹse evaọ usiuwoma ota. Esẹro a wo ewha-iruo ẹruorote, yọ a rẹ rẹro te iruo efa ukoko na. Ahwo jọ a wo ewha-iruo egbẹgbẹdẹ uviuwou hayo owha-iruo sa-sa nọ a re ru kẹ amọfa. Re a ru eware kpobi ziezi, ahwo kpobi a gwọlọ omakpọmu gbe ọruẹrẹhọ omobọ ohwo.
2 Ma-Oma Eware nọ E Mai Wuzou: Obokparọ evaọ ‘uvẹ ru kẹ omobọ mai’ o r’oma hwa orimuo gbe areghẹ mai. (Ẹf. 5:15, 16) Ma re ‘vuhu eware nọ e mai wuzou’ hrọ ma vẹ rehọ ae karo. (Fil. 1:10) Imava-orọo jọ a dhesẹ uviuwou Ọghẹnẹ rai enẹ: “Ma be rehọ uzẹme na vọ izuazọ mai . . . Uzẹme na yọ abọ jọ uzuazọ mai hi, oye họ uzuazọ mai. Eware efa kpobi e rẹ wariẹe họ.” Re a fi egagọ Jihova gbe iruo riẹ họ obaro evaọ uzuazọ mai u wuzou.
3 Vuhu Eware nọ E rẹ Re-Oke Mai: Euwa 168 eye erọ ẹkpoka, yọ u fo re ma rehọ oke nọ ma wo ruiruo avọ areghẹ. Re ma sai wo emamọ oke kẹ iruo Ọghẹnẹ, u fo re ma vuhu jẹ whaha eware nọ e rẹ re-oke. Ọkiẹriwo jọ u dhesẹ nọ ohwo nọ o te ohwo no evaọ obọ United States ọ rẹ raha bu vi euwa 30 evaọ ẹkpoka ro riwi TV! Rọkẹ amọfa, a rẹ raha oke buobu ro se ebe obọ akpọ. Ahwo jọ a rẹ sae muẹrohọ nọ a rẹ raha oke nọ u fo ho kẹ iruo uyerakpọ, isiuru-ohwo, arozaha, hayo oghẹrẹ arozaha uwou jọ. U fo re ma wariẹ kiẹ edhere ekẹdẹ kẹdẹ mai re ma ruẹ epanọ ma sae rọ rehọ oke mai ruiruo woma viere. Areghẹ o gwọlọ re ma fi uwhru họ oke nọ ma be rọ kẹ eware nọ erọ oja ha.
4 Bọ Emamọ Iruẹru Ekẹdẹ Kẹdẹ: Oghẹrẹ kpobi nọ eyero mai ọ rọ, mai omomọvo a rẹ sai ru uvẹ kẹ ilale ẹzi. Ahwo jọ a ruẹ no nọ a tẹ kaki mu iruo họ kẹdẹ kẹdẹ u re fiobọhọ kẹ ae ru eware buobu. Otẹrọnọ ma be raha oke buobu ro kpohọ oria iruo hayo hẹrẹ amọfa, ma rẹ sae rehọ oke oyena jọ ru isase Ebaibol, ruẹrẹ oma họ kẹ iwuhrẹ, hayo gaviezọ kẹ ikporakporo nọ Ukoko-Ulogbo na o ru fihọ ekasẹte. Iviuwou a re wo erere gaga ẹkwoma uzedhe oke nọ a re fihọ ro ru ewuhrẹ kugbe kẹse kẹse. Otẹrọnọ omomọvo uviuwou na ọ rẹ nya lele oke nọ a be rọ nyaze uwuhrẹ uviuwou na, o rẹ kẹ ahwo kpobi erere keme a gbẹ raha oke ohwo ọvo ho.
5 Nọ okpẹdẹ o be vrẹ na, u fo re ma mae riẹ nọ ‘oke nọ ukiọkọ o rẹ kpẹkpẹe.’ (1 Kọr. 7:29) Izuazọ mai o roma hwa epanọ ma rehọ oke oghaghae nọ u kiọkọ na ruiruo te. Ma ti wo oghale otẹrọnọ ma re ru uvẹ re ma rehọ isiuru Uvie karo!—Mat. 6:33.