Edhesẹvia Emamọ Usi na Avọ Irẹro Ewoma
1 Mai kpobi ma rẹ gwọlọ duku oghọghọ gbe emamọ erugba evaọ oware nọ ma bi ru, maero evaọ iruo aru-ilele na. Kọ eme o rẹ wha edẹro yena se omai? U re muhọ kugbe ẹyọrọ irẹro ewoma nọ iruo obufihọ k’amọfa i te bu omai abọ. (Itẹ 11:25) U fo nọ uruemu mai evaọ edhesẹvia emamọ usi na u dhesẹ inọ ma rọwo oware nọ ma be ta na. Otẹrọnọ ma rẹ t’ẹme no udu mai ze, kẹsena unevaze gbe imuẹro omobọ mai u je lo via. (Luk 6:45) Ẹkwoma ẹwẹwariẹ odhesẹvia mai, ma je kru-udu-ga evaọ okenọ ma tẹ be t’ẹme kẹ ahwo na evaọ ẹkwotọ na. Onana o te mai wo aghare evaọ etoke ọ September okenọ ma ti ro ru obọdẹ usi ovravra ẹkwoma efihọ ada obe ọ Whọ Sae Ria Bẹdẹ Bẹdẹ eva Aparadase ọ Otọakpọ evaọ ẹvẹrẹ Isoko evaọ unu azọhọ nọ a sikpotọ eva ₦50. Ghele na, a fi obe ọ Ria Bẹdẹ Bẹdẹ na evaọ ẹvẹrẹ Oyibo kugbe enọ a si unu azọhọ rai kpotọ na ha, rekọ o gbẹ rọ ₦120 unu azọhọ riẹ vẹre. Whọ rẹ sae ruẹ nọ ezọhọfihọ enana i ti fiobọhọ eva edhesẹvia emamọ usi na avọ irẹro ewoma.
2 Okenọ who te bi fi obe ọ “Ria Bẹdẹ Bẹdẹ” na họ ada, whọ rẹ sae ta onana evaọ iweze ọsosuọ:
◼ “Nọ ma be t’ẹme kugbe erivẹ mai na, ma ruẹ nọ otunyẹ uzuazọ okpẹdẹ u fi ọyawọ ologbo họ iviuwou buobu no nẹnẹ. Ahwo buobu a be ruẹ nọ o re bẹbẹ re a rria kugbe wọhọ uviuwou. Diẹse a je duku obufihọ? [Kuvẹ kẹ uyo.] Ebaibol na ọ rẹ sae jọ obọdẹ obufihọ k’omai. [Se 2 Timoti 3:16, 17.] Ikereakere na e kẹ ekpọvio nọ e rẹ kẹ irere nọ i re fiobọhọ kẹ iviuwou zọ. Muẹrohọ ẹme nọ a ta evaọ edhe-ẹme avọ 3 evaọ ẹwẹ-obe avọ 238 eva obe na Whọ Sae Ria Bẹdẹ Bẹdẹ eva Aparadase ọ Otọakpọ.” Se edhe-ẹme avọ 3 na, je fi obe na họ ada.
3 Okenọ who te bi zihe bru ahwo nọ whọ t’ẹme kugbe no kpahe ẹvohẹ nọ ọ rọ ọruẹrẹfihotọ uviuwou, whọ rẹ sae ta onana:
◼ “Evaọ iweze mẹ nọ o vrẹ no, ma t’ẹme te areghẹ ẹnya lele ohrẹ Ebaibol re a sai wo uzuazọ uviuwou evawere. Eme who roro nọ o rọ usiavẹ okugbe uviuwou nẹnẹ?” Kuvẹ kẹ uyo. Rovie kpohọ edhe-ẹme avọ 27 eva ẹwẹ-obe avọ 247, je se Ahwo Kọlọsi 3:12-14. Ru ọkpahe-fihọ efa ro dhesẹ epanọ obọdẹ uyoyou o rẹ sae gba uviuwou kugbe. Dhesẹ epanọ ewuhrẹ owowa obe ọ Ria Bẹdẹ Bẹdẹ na o sae ro fiobọhọ ku ebẹbẹ họ. Otẹrọnọ a rehe riẹ, dhesẹ epanọ a rẹ rọ rehọ obe ọ Ria Bẹdẹ Bẹdẹ na ru uwuhrẹ Ebaibol.
4 Whọ sae dawo odhesẹvia ọnana okenọ who te bi fi obe ọ “Ria Bẹdẹ Bẹdẹ” na họ ada:
◼ “Evaọ ẹmeọta mẹ kugbe ahwo nọ e be rria okogho na, me muẹrohọ no nọ ahwo buobu a wo isiuru ọ okegbe nọ ozọ o rọ họ gbe akpọ udhedhẹ. Eme họ ẹjiroro ra kpahe oware nọ o soriẹ nọ ohwo-akpọ o gbe ri wo eyero ọyena t’obọ họ? [Kuvẹ kẹ uyo.] Isu jọ a sai wo evezi a ve ru eware iwoma jọ, rekọ muẹrohọ ohrẹ areghẹ nọ Ebaibol ọ kẹ.” Se Olezi 146:3, 4; jẹ nọ inọ: “Kọ ohwo jọ ọ riẹ nọ ọ rẹ sae ru ẹgwọlọ ohwo-akpọ gba?” Se owọ avọ 5 gbe 6. Dhesẹ ifoto nọ e rọ ewẹ-obe avọ 12 gbe 13 ọrọ obe ọ Ria Bẹbẹ Bẹdẹ na, je si isiuru kpohọ irere esuo Ọghẹnẹ. Fi obe na họ ada eva unu azọhọ ₦50.
5 Otẹrọnọ esuo Ọghẹnẹ wha t’ẹme kpahe evaọ oke ọsosuọ, whọ rẹ sae dawo ọzọhọfihọ ọnana evaọ ozihebro:
◼ “Okenọ me te etenẹ evaọ umutho edẹ nọ e vrẹ, ma t’ẹme kpahe e kie ohwo-akpọ nọ ọ rẹ rọ wha uvi udhedhẹ ze akpọ. Whọ sae kareghẹhọ nọ ma vuhu oware nọ Ebaibol ọ ta nọ o wha ekie ọyena ze. [Wariẹ se Olezi 146:3.] Kọ who muẹrohọ oware nọ o soriẹ nọ Ọghẹnẹ ọ rọ k’omai ohrẹ nọ ma fi ẹruore mai họ ohwo-akpọ họ? [Kuvẹ kẹ uyo.] Ẹsejọhọ whọ rọwo nọ ẹruore kẹ ifue gbagba u re no obọ Ọghẹnẹ ze. A dhesẹ oware nọ o soriẹ nọ ma je wo udufihọ ọnana eva Olezi 146:10. [Sei.] Otẹrọnọ ma gwọlọ jọ otọ Uvie Ọghẹnẹ, eme ma re ru hrọ?” Rovie kpohọ ẹwẹ-obe avọ 15 eva obe ọ Ria Bẹdẹ Bẹdẹ na, se edhe-ẹme avọ 19, je ru Jọn 17:3 vevẹ. Dhesẹ epanọ, ẹkwoma ewuhrẹ Ebaibol ze, ima ahwo buobu a ro wo eriariẹ nọ i re su kpohọ uzuazọ ebẹdẹ bẹdẹ no. Otẹrọnọ a k’owhẹ uvẹ, dhesẹ obe ọ Eriariẹ na je mu uwuhrẹ na họ.
6 Nọ who te bi ru n’uye-eki ruọ uye-eki gbe evaọ eki, whọ rẹ sae rehọ obe ọ “Ria Bẹdẹ Bẹdẹ” na ruiruo avọ ẹme ọnana:
◼ “Nẹnẹ na ma bi ru obọdẹ iruo kẹ ahwo nọ e be thueki evaọ okegbe na. Mai kpobi a be ruawa evihọ emuemu gbe ozighi evaọ eria mai. Kọ who roro nọ ohwo jọ o wo ifue kẹ ẹbẹbẹ na? [Kuvẹ kẹ uyo.] Ọghẹnẹ o wo ifue na.” Rovie kpohọ ẹwẹ-obe avọ 157 eva obe ọ Ria Bẹdẹ Bẹdẹ na; se jẹ kpahe ẹme fihọ Itẹ 2:22 nọ a re duku evaọ ẹwẹ-obe na. Dhesẹ uzoẹme nọ o rọ uzou avọ 19, je fi obe na họ ada.
7 Okenọ who te bi zihebru ohwo nọ ọ rẹ zẹ eki nọ who fi obe ọ “Ria Bẹdẹ Bẹdẹ” na họ ada kẹ, whọ rẹ sae ta onana:
◼ “Evaọ iweze uwhremu mẹ, mẹ fodẹ nọ Ọghẹnẹ ọvo họ ohwo nọ o ghine wo ifue kẹ emuemu gbe ozighi. Wọhọ epaọ eyaa riẹ, ma rẹ sae fievahọ nọ akpọ udhedhẹ ọ te jọ. Muẹrohọ erarọ nọ a fihọ aro ohwo kpobi.” Se edhe-ẹme avọ 4 evaọ ẹwẹ-obe avọ 159 evaọ obe ọ Ria Bẹdẹ Bẹdẹ na, kugbe Olezi 37:35-38. T’ẹme kpahe ifoto nọ o rọ ẹwẹ-obe avọ 161 na, je se uzoẹme nọ o rọ obehru ẹwẹ-obe na. Dhesẹ uwuhrẹ Ebaibol ọvọvẹ kẹe, nọ a rẹ sae ru evaọ oria ekiọthuọ riẹ hayo evaọ obọ uwou riẹ.
8 Wọhọ ‘ibe iruiruo Ọghẹnẹ,’ ma wo ẹjiroro kpobi nọ ma re ro rẹro-ewoma okenọ ma tẹ be ta emamọ usi na. (1 Kọr. 3:9) Ma tẹ yọrọ uruemu nana o rẹ wha eghale Jihova buobu ze.