Ẹruọsa Ẹgwọlọ Ẹzi Enọ I Diezọ Na
1 Unu ahwo nọ i diezọ nọ i bi viharo a bi bru Othuru-Igodẹ Owoma na ze yọ a be ze ọ usu omarọkẹ kugbe Jihova Ọghẹnẹ. (Jọn 10:3, 11) Amọfa evaọ ukoko na, maero kọ ekpako na, a rẹ jaja aro vi hrọ kẹ ẹgwọlọ inievo emezae gbe inievo emetẹ mai nọ i diezọ.
2 Ẹnyate Ẹgwọlọ Enọ I Diezọ Na: A ru ọruẹrẹfihọ re a wariẹ iwuhrẹ ukoko na ta fihọ ẹvẹrẹ obọ o rọ t’ẹme evaọ oria kpobi nọ etota nọ i te e jẹ riẹ. Otẹrọnọ ohwo ọvo evaọ ukoko na ọ riẹ ẹvẹrẹ obọ o rọ t’ẹme he, o rẹ sai fo re a dhesẹ ukoko nọ o kẹle riẹ kẹ ahwo nọ a diezọ nọ o rẹ sae kẹ obọfihọ ọnana. Dede, otẹrọnọ ọruẹrẹfihọ otiọye na ọ rọ oria ra ha, o rẹ sae lọhọ re iwhowho-uvie nọ a vi a rehọ u n’ọjọ u t’ọjọ keria gba ahwo nọ a diezọ a ve dhesẹ okerefihotọ kẹ ae kpahe igogo-eme nọ a t’ẹme kpahe.
3 Ọruẹrẹfihotọ Okogho gbe Ukoko: Ọsẹro okogho na ọye ọ rẹ rẹro te ọruẹrẹfihotọ ọtota ẹvẹrẹ ọ obọ o rọ t’ẹme evaọ okokohọ okogho gbe edẹ okokohọ obọdẹ. A rẹ sae salọ ọkpako ukoko hayo odibo oruiruo nọ o te wọhọ ọsẹro. A rẹ sae kẹ inievo emezae gbe inievo emetẹ oriruo nọ i te re a w’abọ evaọ etata ọruẹrẹfihotọ okokohọ na. A rẹ sae lele ehri uzi ọvona evaọ ukoko na, avọ imuẹro inọ a rẹro te ẹgwọlọ enọ i diezọ na ziezi.
4 O rẹ mai woma re a fi enọ i diezọ na họ oria nọ a sae jọ ruẹ ọnọ ọ be r’obọ t’ẹme na gbe platfọmo na evaọ okiọvo na. Onana o rẹ jọ erei evaọ ukoko na gbe eva okokohọ ikogho. Evaọ iwuhrẹ ukoko o rẹ mai woma re ọnọ ọ be r’obọ t’ẹme na ọ keria otẹrọnọ enọ i diezọ nọ e nyaze a re kakao. O tẹ lọhọ, ma tudu họ ekpako na awọ re a nọ mi oniọvo nọ ọkpako no evaọ ikpe nọ o diezọ rọkẹ uzedhe ezọhọfihọ kpahe ọruẹrẹfihọ ẹkeria nọ u fo.
5 Otẹrọnọ ọnọ ọ rẹ r’obọ t’ẹme nọ o te nọ o bi ruiruo wọhọ ọkpako ukoko hayo odibo oruiruo ọ riẹ yọ unu ọ inievo emezae gbe inievo emetẹ nọ e riẹ o gwọlọ e riẹ, ekpako na a rẹ sae jiroro na nọ a ru iwuhrẹ jọ kpobi evaọ ẹvẹrẹ obọ o rọ t’ẹme. Obe Uwuhrẹ Ukoko na o rẹ sae jọ ewuhrẹ ẹkpoka ọsosuọ nọ a rẹ ruẹrẹhọ evaọ oghẹrẹ nana. Otẹrọnọ ukoko na o gwọlọ ru uwuhrẹ ọfa evaọ udevie iwuhrẹ isoi ẹkpoka na evaọ ẹvẹrẹ obọ o rọ t’ẹme (hayo evaọ ẹvẹrẹ ọfa u te no Oyibo no), u fo re ekpako ukoko na a vuẹ se Ukoko-Ulogbo kpahe ẹgwọlọ rai. U fo re a muẹrohọ nọ Ẹvẹrẹ Obọ o rọ T’ẹme Amerika ọye họ ẹvẹrẹ nọ ọ mae were ahwo buobu nọ e kpako no nọ i diezọ evaọ orẹwho na.
6 Dede nọ ẹmeọta-kugbe evaọ udevie enọ i diezọ gbe enọ i bi yoẹme o sae gwọlọ obọdẹ omodawọ evaọ ẹko ivẹ na, ahwo ukoko na kpobi a rẹ daoma re a riẹ ohwohwo re obọdẹ ọbọga ohwohwo o ja riẹ. (Hib. 10:24) Ẹzi ọnana evaọ udevie inievo na u re fi odederehọ họ ahwo ọkpokpọ na oma.