Ewhowho Emamọ Usi Oware nọ O Mai Woma
1 Anwọ ikpe 117 ze Uwou-Eroro Na ọ be gbodibo wọhọ ọthothọ uzẹme Ebaibol. Obọnana, evaọ ukere ọvuọvo a bi kporo 18,950,000 evaọ evẹrẹ 125. U kri no re nọ Awake! o bi ro whowho Ẹme Ọghẹnẹ, yọ enẹna 15,730,000 a be ghale evaọ evẹrẹ 80.—Wawo Ahwo Kọlọsi 1:23.
2 Emagazini E be Nyate Ẹgwọlọ Ẹzi: Uwou-Eroro Na gbe Awake! e kẹ ima ahwo uduoruọzewọ buobu erere no ẹkwoma ẹnyate ẹgwọlọ ẹzi rai. A kporo izoẹme nọ e rẹ bọ ẹrọwọ ga no. Wọhọ oriruo, evaọ Uwou-Eroro Na ọrọ February 1, 1996, ma wuhrẹ kpahe ẹgwọlọ nọ a re ro fievahọ Jihova gbe Ẹme riẹ. Evaọ ukere ọ March 1, 1996, Uwou-Eroro Na ọ tudu họ omai awọ re abọ ọ se omai ba ẹlọhọ evaọ iruo Jihova gbe nọ ma gbẹ hae rẹro riẹe. Ẹvẹ ẹmeọta kpahe eruaruẹ Zefanaya o fi ọwhọ họ omai oma te! Kẹsena ẹmeọta nọ ọ rẹ bọ ẹrọwọ kpahe uyoyou-evifihọ Oleleikristi ọ tẹ te via evaọ Uwou-Eroro Na ọrọ April 1, 1996. Ukere ọ June 1, 1996, na o fiẹgba họ aghare isase gbe ewuhrẹ Ẹme Ọghẹnẹ kẹse kẹse. Izoẹme enana i ru otoriẹ Ẹme Ọghẹnẹ mai kodo no, yọ ovuhumuo mai kẹ Uvie riẹ o rro haro no re.
3 Fiba oyena, emagazini enana i wo izoẹme ẹruoke kpahe uruemu Ọghẹnẹ nọ u w’iruo, uruemu Oleleikristi, gbe izoẹme efa nọ i wuzou. I duobọhọ uzedhe ẹme-avro nọ i kpomahọ izuazọ mai. Fiki oyena, ma be reawere uzuazọ nọ o mai wo aghare enẹna nọ ma be hẹrẹ erugba eyaa Ọghẹnẹ kẹ oware nọ o mai woma evaọ obaro na.—Aiz. 48:17; 1 Tim. 6:19.
4 Ọkiẹriwo kpẹkpẹ ọrọ oware nọ a kere fihọ ẹwẹ-obe avọ 4 evaọ ukere ọ Awake! kpobi o rẹ k’omai emamọ ẹjiroro nọ ma re ro dhesẹ emagazini na wọhọ obe nọ o mai woma kẹ ahwo evaọ oria kpobi, te emaha te ekpako. Evaọ etẹe o jẹ ta nọ: “Awake! ọ rọ kẹ uwuhrẹ uviuwou na. U re dhesẹ epanọ a re ro thihakọ ebẹbẹ inẹnẹ. O rẹ niyẹrẹ, o rẹ ta kpahe ahwo nọ e rọ ẹkuotọ buobu, o rẹ kiẹ egagọ gbe otọkiẹ-eriariẹ. Rekọ o re ru vrẹ ere. O rẹ kiẹ vrẹ eware gheghe jẹ riobọ kpohọ uzedhe otofa oware nọ o rọ emu ọ eviavia ọgbọna, ghele ẹsikpobi ọ rẹ jọ abọ ọvo ho evaọ esuo-ohrowo yọ ọ rẹ kpare ovioma ahwo jọ kpehru vi ọrọ amọfa ha. Maero, emagazini ọnana ọ rẹ bọ udufihọ eyaa Ọnọma na ọrọ akpọ udhedhẹ gbe ufuoma nọ o be te rehọ ẹta ọ eyero omuomu ọ siuziba-ekoko ọnana kẹle na.”
5 Ghale Emagazini na Kugbe Amọfa: Rovie obọ evaọ ẹghale Uwou-Eroro Na gbe Awake! (Wawo 1 Timoti 6:18.) Wo ejọ fihọ obọ re whọ sai fi ai họ ada kẹ ohwo kpobi nọ whọ nyaku. (Ọtausi. 11:6) Mai kpobi, kugbe iwhowho-uvie eboba gbe ekpokpọ, a rẹ sai w’abọ evaọ a ru ahwo vi ebe evaọ amara ọnana. Oria nọ a jọ sai vi ebe he, rehọ idhesẹvia ekpẹkpẹ nọ a re ro ruiruo nọ a rehọ no izoẹme ẹruoke nọ a dhesẹ evaọ ikere kpokpọ na ze. Riẹ eware nọ e rọ eva rai ziezi, je fi ai họ ada avọ evezi gbe imuẹro.
6 Uwou-Eroro Na gbe Awake! i wo evuẹ nọ ahwo kpobi a gwọlọ. Ẹghale rai họ emamọ edhere jọ nọ ma re ro fiobọhọ kẹ amọfa wuhrẹ emamọ usi na inọ oware jọ nọ o mai woma o be tha kẹle!