Fiẹro h’Otọ Ziezi kẹ Oghẹrẹ nọ Whọ be rọ Oke Ra Ruiruo
1 Evaọ oge nana nọ ma jọ wo ekwakwa nọ i re ru eware vẹrẹ jẹ lọhọ na, eware nọ ahwo buobu a bi ru i bi bu viere, yọ oke nọ a re ro ru ai o be kawo viere. Kọ o be jọ bẹbẹ k’owhẹ re whọ nya lele emamọ omaa iruẹru abọ-ẹzi? Kọ o rrọ owhẹ oma inọ dodo kọ who wo oke viere kẹ odibọgba na? Ẹvẹ ma sae rọ rehọ oke mai ruiruo ziezi?—Ol. 90:12; Fil. 1:9-11.
2 Vuhu Eware nọ I bi Mi Owhẹ Oke Mu: U re woma re n’oke ruoke, mai kpobi ma kiẹ epanọ ma be rehọ oke mai ruiruo riwi. Ebaibol e kẹ uduotahawọ nọ: “Wha fiẹrohọ otọ enẹna eva onya rai, o jọ wọhọ igheghẹ hẹ rekọ iwoareghẹ, wha raha oke he, keme edẹ na i re yoyoma.” (Ẹf. 5:15, 16) Roro kpahe ebẹbẹ nọ ẹnyaharo ikuaku eware nọ a rẹ rọ wha evuẹ ọ wha ze no. Dede nọ kọmputa gbe ekwakwa ikporakporo i re fi obọ họ, e rẹ sai zihe ruọ agbefẹ ma gbe muẹrohọ oghẹrẹ nọ ma be rehọ oke mai ruiruo ho.—1 Kọr. 7:29, 31.
3 U fo re mai omomọvo ma nọ oma mai nọ: ‘Kọ mẹ be raha oke kẹdẹ kẹdẹ ro se jẹ za evuẹ kọmputa nọ i fioka ha? Kọ mẹ be hae rehọ ifonu se ahwo hayo rehọ ifonu nọ i wo ufi hi vi evuẹ nọ i wuzou hu ẹsikpobi? (1 Tim. 5:13) Kọ me re mu kiẹ Itanẹte hayo nwene no oria etẹlivisiọno jọ kpohọ ọfa gheghe gheghe? Kọ erozaha kọmputa hayo erozaha efa, wọhọ ọludo gbe ebọro-efa, i bi mi omẹ oke nọ me re ro wuhrẹ Ẹme Ọghẹnẹ? Kọ mẹ be raha enwenọ urere-oka kpobi ro kpohọ ehaa-orọo hayo ehaa efa?’ Eware itieye na e rẹ sae rehọ ẹmẹrera raha edikihẹ abọ-ẹzi mai no.—Itẹ 12:11.
4 Oke U ro Ruiruo avọ Areghẹ: Ekwakwa ikporakporo gbe eware arozaha efa e rẹ rehọ oke gbe iroro mai. Uzoge jọ nọ o du oma le no vẹre evaọ ezaharo kọmputa ọ ta nọ: “Ẹsejọ nọ mẹ tẹ zaro kọmputa taure me te ti kpohọ odibọgba na hayo ewuhrẹ Ileleikristi, o jẹ hae jọ bẹbẹ re me fi iroro họ odibọgba hayo ewuhrẹ na. Oware nọ mẹ jẹ hẹ mai roro kpahe họ epanọ mẹ te rọ zaro na woma viere nọ me te zihe te obọ uwou. Uwuhrẹ omobọ mẹ gbe isase Ebaibol ẹsikpobi e rioja gaga. Oghọghọ mẹ evaọ egagọ Ọghẹnẹ u te muhọ ekie kpo.” Nọ o vuhumu nnọ u fo re o ru inwene, o te si erozaha kọmputa kpobi no kọmputa riẹ. Ọ ta nọ: “O jọ bẹbẹ k’omẹ gaga. Me duoma họ erozaha na vi epanọ me roro vẹre. Rekọ eva e were omẹ nnọ mẹ sai si erozaha na no kọmputa mẹ keme mẹ riẹ nnọ me ru ei kẹ erere mẹ.”—Mat. 5:29, 30.
5 O rẹ sai kiehọ re ohwo o ru epanọ uzoge nana o ru na otẹrọnọ eria jọ e riẹ nọ who roro nọ whọ jọ gwọlọ inwene. Kọ whọ sae dẹ ubro auwa no iruẹru nọ e roja ha ze kẹdẹ kẹdẹ? Ẹkwoma ere oruo, whọ rẹ sai se Ebaibol na re evaọ ẹgbukpe. Irere abọ-ẹzi nọ who re wo i ti bu kẹhẹ! (Ol. 19:7-11; 119:97-100) Fi uzedhe oke họ kẹ isase Ebaibol, oma o ruẹrẹ họ kẹ iwuhrẹ, gbe iruo odibọgba na. (1 Kọr. 15:58) Enẹ oruo u ti fi obọ họ k’owhẹ kpọ eware nọ i re mi ohwo oke je fi obọ họ k’owhẹ “riẹ otọ epanọ oreva Ọnowo na o rọ.”—Ẹf. 5:17.
[Study Questions]
1. Didi use-abọ ahwo a be rẹriẹ ovao ku nẹnẹ evaọ oria kpobi?
2, 3. Didi ebẹbẹ ẹnyaharo ikuaku eware nọ a rẹ rọ wha evuẹ ọ wha ze no, kọ ẹvẹ omomọvo mai ọ sae rọ kiẹ oma riẹ riwi?
4. Didi enwene uzoge jọ o ru, kọ fikieme?
5. Ẹvẹ ma sae rọ dẹ oke kẹ ilale abọ-ẹzi, kọ ẹvẹ ma re ro wo erere no ere oruo ze?