Eroruiruo Itanẹte—Muẹrohotọ kẹ Enwoma Na!

¹ Ahwo Jihova a be reawere usu ọbọga kugbe ohwohwo. A rẹ reawere ikuigbe eware nọ e via no usiuwoma ota ze je dhesẹ ovuhumuo kẹ eyo kpahe eware nọ e via kẹ Isẹri Jihova gbe iruo Uvie na wariẹ akpọ na họ. A rẹ gwọlọ riẹ kpahe oware ulogbo kpobi nọ o rẹ sae via kẹ inievo rai, wọhọ ozighi hayo okpẹtu emama, yọ a gwọlọ riẹ sọ oware jọ o riẹ nọ a rẹ sai ru ro fiobọhọ. Isiuru itieye na i dhesẹ okugbe usu-inievo na, bi dhesẹ nọ ma ghine you ohwohwo.—Jọn 13:34, 35.

² Nẹnẹ na, ma re yo kpahe eware nọ e be via evaọ akpọ vẹrẹ vẹrẹ. Ovuẹ-usi ọ irediyo gbe etẹlivisiọne e rẹ vuẹ ahwo kpobi wariẹ akpọ na họ kpahe eware nọ e be via kpobi ẹsiẹsiẹe. Ifonu i te je ru ei lọhọ re a t’ẹme kugbe ahwo wariẹ akpọ na họ ababọ oke oraha. Oware jọ nọ o be via kpahe ovuẹ ugbothabọ nọ o be daruọ akpọ na họ Itanẹte.—Rri Awake! ọrọ July 22, 1997.

³ Ifonu nọ a ku ze na u rovie edhere fihọ nọ ohwo ọ rẹ rọ t’ẹme kpohọ oria kpobi evaọ akpọ na soso. Dede nọ ifonu i w’iruo gaga, o gwọlọ areghẹ evaọ edhere nọ a rẹ rọ rehọ iẹe ruiruo, keme o rẹ sae jọ okwakwa kẹ ekpehre usu hayo iruẹru, yọ ifonu na nọ a re ro ruiruo vrẹta o rẹ raha igho gaga. Etẹlivisiọne gbe irediyo i wo ẹgba obufihọ evaọ abọ ewuhrẹ-obe-oriẹ. Rekọ yoma na, abọ ologbo ọ iruẹru na e rrọ ogbekuo uruemu, oma nọ a rẹ rọ kẹ ae o rẹ rehọ oke. Areghẹ o re ru omai ru ẹsalọ evaọ eroruiruo etẹlivisiọne gbe irediyo.

⁴ Itanẹte na e rẹ lẹliẹ ohwo t’ẹme kugbe ima ọ amọfa wariẹ akpọ na họ ababọ ugho oraha buobu, yọ u re rovie ẹthẹ kpohọ evuẹ buobu. (Awake! ọrọ January 8, 1998) Rekọ eroruiruo Itanẹte na ababọ oma oyọrọ o rẹ sai ru ohwo kp’oma fihọ kẹ enwoma ilogbo abọ-ẹzi gbe uruemu. Ẹvẹ onana o rọ rrọ ere?

⁵ Ahwo buobu a be ruawa kpahe evuẹ nọ e riẹ nọ i bi dhesẹ epanọ a rẹ rọ bọ ekwakwa ẹmo, kugbe ebọmbo. Iwou-iruo i bi bo kpahe unu oke nọ iruiruo e be raha kufiẹ fihọ eroruiruo Itanẹte. Ma jọ ebe mai t’eme buobu no kpahe enwoma abọ-ẹzi nọ a rẹ rẹriẹ ovao dhe evaọ Itanẹte na. Evie evuẹ ọ Itanẹte buobu i re dhesẹ ozighi gbe ifoto ẹbẹba, eware nọ i kiehọ kẹ Ileleikristi vievie he. (Ol. 119:37) Fiba enwoma enana, enwoma ototọ efa e riẹ nọ o gwọlọ nọ Isẹri Jihova a rẹ mae yọrọ oma kẹ. Kọ eme họ enwoma enana?

⁶ Kọ whọ rẹ sai zizie ọrara ruọ uwou ra ababọ ẹkake gwọlọ riẹ ohwo nọ ọ rrọ? Kọ ẹvẹ otẹrọnọ uvumọ edhere ọ riẹ nọ whọ rẹ rọ riẹ hẹ? Kọ whọ rẹ kuvẹ re ọrara otiọye na ọvo ọ jọ kugbe emọ ra? Onana yọ oware nọ o rẹ via evaọ Itanẹte na nọ a rẹ sae vro kpahe he.

⁷ A rẹ sai vi ileta ọ ekọmputa bru ahwo je wo mi ahwo nọ whọ riẹ hẹ. Epọvo na o rrọ re evaọ okenọ whọ tẹ be rehọ ekọmputa t’ẹme evaọ ẹgwa otu hayo chat room (oria ẹmeọta-kugbe evaọ Itanẹte). Ẹsejọ ahwo nọ a bi w’obọ na a rẹ sae ta nọ ae yọ Isẹri Jihova, rekọ ẹsibuobu a rrọ ere he. Ohwo jọ ọ sae ta nọ ọye yọ uzoge yọ o rrọ ere he. Hayo ohwo jọ ọ sai gu erue nọ ọye yọ ọzae hayo aye.

⁸ Evuẹ nọ a re vi se owhẹ e sae jọ ikuigbe eware nọ e via hayo eme kpahe orọwọ mai. A rẹ sai vi ovuẹ onana se amọfa, ohwo ọyena o ve je vi ei se amọfa. Ovuẹ na u wo imuẹro ho fikiere o sae jọ ọrue. Eme na e sae jọ oria nọ a siomano fihọ be jọ vaha iroro ikọ erue.—2 Tẹs. 2:1-3.

⁹ Nọ who te roro kpahe enwoma enana, otẹrọnọ whọ be rehọ Itanẹte ro ruiruo, nọ oma ra nọ: ‘Eme mẹ be rehọ iẹ ro ru? Kọ o sae lọhọ re o nwa omẹ oma evaọ abọ-ẹzi ẹkwoma oghẹrẹ nọ mẹ be rehọ iẹ ruiruo? Kọ o sae jọnọ mẹ be zọhọ fihọ enwoma abọ-ẹzi amọfa?’

¹⁰ Evie Evuẹ Itanẹte ọ “Isẹri Jihova”: Wọhọ oriruo, roro kpahe oria Itanẹte jọ nọ ahwo jọ nọ a se oma rai Isẹri Jihova a fihọ. A re zizie owhẹ re who rri kpohọ oria evuẹ rai nyai se eware nọ e via nọ amọfa nọ a se oma rai Isẹri a fihọ iẹ. A rẹ tuduhọ owhẹ awọ re whọ ghale iroro gbe eriwo ra kpahe ebe Society na. Otujọ a rẹ sae jiroro ọ edhere ẹmeọta nọ a sai ro ruiruo evaọ usiuwoma ota na. Eria-evuẹ enana i ru uvẹ ọ oria ẹmeọta-kugbe kẹ ahwo, be kuvẹ ẹmeọta kugbe amọfa, wọhọ epanọ a rẹ t’ẹme evaọ ifonu na. A rẹ sae riobọhọ eria-evuẹ efa nọ whọ jẹ ruọ usu kugbe Isẹri Jihova wariẹ akpọ na họ. Rekọ whọ sae ta avọ imuẹro nnọ enana yọ ahwo nọ ikọ-erue e ruẹrẹfihọ họ?

¹¹ Usu nọ a re mu ẹkwoma Itanẹte o rẹ sae rọwokugbe iroro nọ a jẹ eva Ẹfẹsọs 5:15-17 na ha. Pọl ukọ na o kere nọ: “Wha fiẹrohọ otọ enẹna eva onya rai, o jọ wọhọ igheghẹ hẹ rekọ iwoareghẹ, wha raha oke he, keme edẹ na i re yoyoma. Fikiere wha jọ wọhọ igheghẹ hẹ, rekọ wha riẹ otọ epanọ oreva Ọnowo na o rọ.”

¹² Ukoko Ileleikristi na họ edhere esuo Ọghẹnẹ nọ a be rọ kuomai evaọ abọ-ẹzi ẹkwoma ‘ọrigbo nọ o wo ẹrọwọ avọ areghẹ.’ (Mat. 24:45-47) Evaọ udevie ukoko Ọghẹnẹ, ma re duku ọkpọvio gbe ọthọwẹ nọ i re ru omai hẹriẹ-oma no akpọ na gbe isiuru nọ ma rẹ rọ ruabọhọ iruo Olori na. (1 Kọr. 15:58) Ọso-ilezi na o dhesẹ nọ o re wo oghọghọ je wo iroro ọ omofọwẹ evaọ udevie ahwo Ọghẹnẹ nọ a kokohọ. (Ol. 27:4, 5; 55:14; 122:1) Ukoko na o rẹ jẹ rehọ uketha gbe obufihọ abọ-ẹzi kẹ ahwo nọ a riẹe eva. Evaọ etẹ, whọ rẹ sae ruẹ utu egbẹnyusu iyoyou, enọ i re dhesẹ ọdawẹ, gbe ẹruorote—ahwo nọ whọ riẹ dẹẹ nọ a ruẹrẹ oma kpahe je wo unevaze re a fiobọhọ jẹ sasa amọfa oma evaọ etoke uye. (2 Kọr. 7:5-7) Ahwo ukoko na a bi wo ọthọwẹ ẹkwoma ọruẹrẹfihotọ Ikereakere kẹ esino ukoko ọrọ irumuomu nọ e kare ekurẹriẹ hayo ahwo nọ a rẹ wha iroro ikọ-erue haro. (1 Kọr. 5:9-13; Taitọs 3:10, 11) Kọ ma sai rẹro nọ ma rẹ ruẹ eruẹrẹfihotọ iyoyou evo nana evaọ okenọ ma tẹ be nyusu kugbe amọfa ẹkwoma Itanẹte na?

¹³ U re vevẹ inọ abọdekọ riẹ ọ be via. Evie evuẹ ọ Itanẹte jọ yọ idhere kpohọ ẹvaha evuẹ ikọ erue. Evie evuẹ ọ Itanẹte itieye na e rẹ sae rọwo ere he, yọ enọ e rẹ tha eria-evuẹ uke na a rẹ sae kẹ edhesẹ okokodo jọ rọ k’imuẹro nnọ a ghinẹ rrọ Isẹri Jihova. A rẹ sae tubẹ yarọ ovuẹ no obọ ra ze re a ruẹse kiẹ vuhumu inọ whẹ yọ omọvo Isẹri Jihova.

¹⁴ Jihova ọ gwọlọ nọ who dhesẹ orimuo. Fikieme? Fikinọ ọ riẹ nnọ o te th’owhẹ no enwoma sasa. Itẹ 2:10-19 u muhọ evaọ eme enana: “Keme areghẹ ọ te ruọ eva ra, gbe eriariẹ e tẹ were [ẹzi ra]; who re ti wo ovuhumuo, otoriẹ u re ti su owhẹ.” Su owhẹ no eme? Rono eware wọhọ “edhere oyoma,” enọ e nya siọ idhere egbagba ba, gbe ahwo nọ a bi yeri uzuazọ ọfariẹ gbe eviẹhọ evaọ idhere rai kpobi.

¹⁵ Okenọ ma te kpohọ Ọgwa Uvie na, avro ọ riẹ hẹ inọ ma rrọ kugbe inievo mai. Ma riẹ rae. Ohwo ọvo ọ gwọlọ oka imuẹro ho keme uyoyou inievo nọ a bi dhesẹ via u ru rie vevẹ. U du gwọlọ mi omai omomọvo re ma dhesẹ eware ọ ete rọ k’imuẹro nnọ mai ghinọ omọvo ọ Isẹri Jihova ha. Etenẹ ma je duku uvi uduotahawọ ohwohwo nọ Pọl ọ t’ẹme kpahe eva Ahwo Hibru 10:24, 25 na. A rẹ sae rẹro so Evie evuẹ ọ Itanẹte nọ e tuduhọ usu onyakugbe ọ ekọmputa evaọ onana ha. Nọ ma te wo eme ọ Olezi 26:4, 5 fihọ iroro o rẹ sae lẹliẹ omai jaja aro vi kẹ enwoma nọ ma rẹ sae rẹriẹ aro dhe evaọ okenọ ma tẹ be rehọ Evie evuẹ jọ ruiruo evaọ Itanẹte.

¹⁶ Evuẹ nọ ahwo nọ a be rehọ Itanẹte ruiruo a rẹ rawo je se i wo umuo ho. Ẹsibuobu, emaha gbe izoge a re kie ruọ ozighi gbe eviẹhọ evaọ abọ nana. Emaha i re fievahọ ahwo, avọ okpakpa kẹ ẹriẹ eware, jẹ gwọlọ kiẹ oware nọ o wọhọ akpọ ọkpokpọ ọrọ afe ọ ohwekugbe ekọmputa akpọ soso. Fikiere o gwọlọ re esẹ gbe ini a rẹrote emọ rai jẹ kẹ ae obọdẹ ọkpọvio Ikereakere kpahe eroruiruo Itanẹte, nwanọ epanọ a rẹ kpọ ae evaọ ẹsalọ ile hayo isinima iriwo rai na.—1 Kọr. 15:33.

¹⁷ U yoma gaga inọ, a si ahwo jọ nọ a jọ inievo mai no ukoko no fiki usu-onya nọ u muhọ ẹkwoma ẹnyakugbe ahwo obọ akpọ ẹkwoma ẹmeọta-kugbe evaọ Itanẹte na nọ u su kpohọ ọfariẹ-ogbe. Avọ igbunu ilogbo, ekpako ukoko a kere ze no inọ ejọ e ghinẹ nya siọ ezae hayo eyae rai ba no re a le usu nọ u muhọ evaọ Itanẹte. (2 Tim. 3:6) Amọfa a vro uzẹme na no fikinọ a rọwo evuẹ nọ ikọ-erue e be kẹ. (1 Tim. 4:1, 2) Evaọ eroro ziezi kpahe enwoma enana, kọ o gbẹ rrọ oware areghẹ re a yọrọ oma kpahe oma nọ a re duhọ abọjọ ẹmeọta-kugbe evaọ Itanẹte na? Uzẹme, edhesẹ areghẹ, eriariẹ, ẹgba iroro, gbe orimuo nọ a t’ẹme kpahe eva Itẹ 2:10-19 na o rẹ sẹro mai evaọ onana.

¹⁸ Ma vuhumu no inọ, ahwo buobu a riẹ nọ a ruẹrẹ Evie evuẹ ọ Itanẹte fihọ kẹ ewhowho emamọ usi na. Inievo jọ nọ e kare orimuo họ enọ i bi ru eria-evuẹ enana. Eria-evuẹ efa e sae jariẹ nọ ikọ-erue nọ e gwọlọ lẹliẹ igbori họ a ru. (2 Jọn 9-11) Nọ o jẹ kpahefihọ sọ ẹgwọlọ ọ riẹ kẹ inievo mai re a ru Evie evuẹ ọ Itanẹte itieye, Odibọgba Uvie Mai ọrọ November 1997, ẹwẹ-obe avọ 3, o ta nọ: “U du fo re ohwo jọ o fi evuẹ họ [Itanẹte] na kpahe Isẹri Jihova, iruẹru mai, hayo erọwọ mai hi. [Oria-evuẹ] nọ a ruẹrẹhọ k’omai na [www.watchtower.org] u dhesẹ evuẹ egbagba rọkẹ ohwo kpobi nọ ọ gwọlọ riẹ.”

¹⁹ Obufihọ Ewuhrẹ Ẹkwoma Itanẹte Na? Ahwo jọ a roro no inọ a bi fiobọhọ kẹ inievo na ẹkwoma evuẹ ekiakiẹ kpahe abọ sa-sa ọrọ iruo uvie mai na nọ a re vi se ai. Wọhọ oriruo, ohwo ọ rẹ sai ru ekiakiẹ kpahe omaa ọ ẹmeọta ovuẹ ogbotu o ve fi onana họ iẹe, bi roro nọ ovuẹ oyena o te jọ erere kẹ ahwo nọ a be ruẹrẹ oma kpahe kẹ omaa ẹmeọta ovona. Amọfa a re fi ikereakere kpobi nọ e te jọ Uwuhrẹ Uwou-Eroro n’otha họ iẹe hayo a rẹ kẹ oria nọ eme Isukulu Odibọgba Ọghẹnẹ hayo Uwuhrẹ Obe Ukoko na u no ze. Otujọ a rẹ sae kẹ iroro-ejẹ kpahe idhere usiuwoma ota. Kọ eyena i re ghine fiobọhọ?

²⁰ Ebe nọ ukoko Jihova o be kẹ e rẹ kpare iroro mai ẹkwoma eme ọbọga je wuhrẹ omai re ma “hẹriẹ uwoma no uyoma.” (Hib. 5:14) Kọ ma sae ta nọ ohwo o re wo onana t’obọ otẹrọnọ amọfa a ru ekiakiẹ mai k’omai?

²¹ A ta kpahe Ileleikristi obọ Bẹria inọ ae “[a mae] rọ uvi-ahwo vi erọ obọ Tẹsalonika.” Fikieme? Keme “evaọ oghọghọ a rọ rehọ ẹme na, yọ a riwẹ ikerakere na kẹse kẹse, sọ epanọ a ta kẹ ae na ere eghinẹ rọ.” (Iruẹru 17:11) Dede nọ Pọl avọ Saelas a ta usiuwoma kẹ ae, a sai ru uzẹme na họ orobọ rai hi ababọ oma rai nọ a rẹ rọkẹ ẹe.

²² Ekiakiẹ omọfa nọ whọ rẹ rọ k’ovuẹ hayo rọ ruẹrẹ oma kpahe kẹ iwuhrẹ efa yọ ekie rọkẹ ẹjiroro ọ uwuhrẹ omobọ ohwo. Kọ o gbẹ rrọ ẹgwọlọ ra re whọ bọ ẹrọwọ obọra ga fihọ Ẹme Ọghẹnẹ? Rono imuẹro omobọ ohwo ze, whọ sai dhesẹ ẹrọwọ ra via kẹ ẹgbede—evaọ eme ra, evaọ ẹkpahefihọ ra eva iwuhrẹ, gbe evaọ usiuwoma ota na. (Rom 10:10) Ekiakiẹ omọfa nọ who re ro ruiruo o rọwo kugbe edhesẹ nọ ọ rrọ Itẹ 2:4, 5 na ha inọ kohwokohwo ọ hae ‘gwọlọ jẹ kiẹe eriariẹ Ọghẹnẹ wọhọ efe nọ a sino.’

²³ Wọhọ oriruo, evaọ okenọ whọ tẹ be gwọlọ ikereakere evaọ Ebaibol ra, whọ rẹ sae rehọ omoke jọ ro se eme nọ e wariẹ oria ikereakere na họ. Whọ rẹ sai ‘lele eware na ẹrẹrẹe,’ wọhọ epanọ Luk o ru okenọ o ro kere Usiuwoma riẹ. (Luk 1:3) Omodawọ ofa nana u re je fiobọhọ k’owhẹ wo ona evaọ ẹgwọlọ ikereakere evaọ odibọgba na gbe okenọ whọ tẹ be kẹ ovuẹ. Ibuobu e ta no inọ Isẹri Jihova a re si ai urru kemena a riẹ epanọ a rẹ rọ rehọ Ebaibol rai ruiruo. Edhere ọvuọvo nọ onana o sai ro kie kpahe omai họ otẹrọnọ ma ru rie fihọ uruemu mai re ma hai se eria ikereakere na evaọ Ebaibol obọmai.

²⁴ Oke Mai Uroruiruo avọ Areghẹ: Oware ofa nọ a re roro kpahe evaọ onana u w’obọ kugbe unu oke nọ a rẹ raha ro koko evuẹ nọ a fihọ Itanẹte họ, ro se ai, jẹ rọ kpahe fihọ ai. Olezi 90:12 o tuduhọ omai awọ nọ re lẹ inọ: “Fikiere wuhrẹ omai re ma kele edẹ mai re ma fi eva mai họ areghẹ olele.” Pọl ọ ta nọ: “Oke nọ a fihọ o rẹ kpẹkpẹe.” (1 Kọr. 7:29) Ọ ta haro nọ: “Fikiere re, nọ uvẹ o gbẹrọ na, joma ru iruo ezi kẹ ahwo kpobi, onọ o mae ro kọ rọ kẹ otu nọ ọrọ ẹgba orọwọ na.”—Gal. 6:10.

²⁵ Uthubro utioye na u fielo họ ẹgwọlọ nọ ọ rrọ k’omai re ma dhesẹ areghẹ evaọ eroruiruo oke mai. Ẹvẹ o rẹ mae kẹ erere te re a raha oke fihọ ese Ẹme Ọghẹnẹ! (Ol. 1:1, 2) Oye họ usu nọ o mai woma nọ ma rẹ sai wo. (2 Tim. 3:16, 17) Esẹ gbe ini, wha bi wuhrẹ emọ rai aghare ọ eroruiruo oke rai avọ areghẹ rọkẹ ilale Uvie? (Ọtausi. 12:1) Oke nọ a raha evaọ uwuhrẹ Ebaibol omobọ ohwo gbe orọ uviuwou, ewuhrẹ o kpohọ, gbe usiuwoma onya o ghare thethabọ vi oke nọ a raha rọ kiẹ Itanẹte.

²⁶ Evaọ onana, o rrọ edhere areghẹ re ma tẹro vi eware abọ-ẹzi gbe enọ i w’iruo jẹ r’oja kẹ izuazọ mai wọhọ Ileleikristi. Onana o gwọlọ ẹkaki roro ziezi tao kpahe ẹsalọ evuẹ nọ ma rẹ raha oke fihọ je roro kpahe. Wọhọ Ileleikristi, Kristi ọ gba oware nọ u w’obọ kpahe izuazọ mai ekru, inọ: “Rekọ wha kake guọlọ uvie riẹ gbe [ẹrẹreokie] riẹ, eware enana kpobi a reti fi ai họ kẹ owhai.” (Mat. 6:33) Kọ o gbẹ rọnọ okenọ ilale Uvie na e tẹ vọ uzuazọ viukpọ iruẹru efa oye eva e jẹ mae were owhẹ?

²⁷ Ileta ọ Itanẹte: Dede nọ u kiehọ re ohwo o gbiku eware nọ e via kẹe hayo ghale iroro riẹ kugbe ahwo uviuwou hayo egbẹnyusu riẹ nọ i thabọ noi, kọ o ghinẹ rrọ oware uyoyou re a kpeze enana se amọfa nọ a riẹ uviuwou hayo egbẹnyusu ra ha? Hayo kọ a re fi enana họ Evie evuẹ rọkẹ k’ohwo k’ohwo kpobi re o se? Kọ a re kere evuẹ omobọ ohwo enana rehọ je vi ai ugbevi se ahwo nọ whọ riẹ hayo enọ whọ riẹ hẹ? Epọvo na, otẹrọnọ amọfa a rọ ethobọ vi evuẹ nọ e rrọ era ha s’owhẹ, o rrọ oware uyoyou re who vi ai se amọfa?

²⁸ Kọ ẹvẹ otẹrọnọ evuẹ nọ who mi je vi na e gbẹ rọ uzẹme he? Onana o gbẹ rọnọ ọrue who bi w’obọ vaha na? (Itẹ 12:19; 21:28: 30:8; Kọl. 3:9) Uzẹme, nọ ma te “fiẹrohọ otọ enẹna eva onya [mai, orọnọ] wọhọ igheghẹ hẹ rekọ iwoareghẹ” o rẹ w’omai roro kpahe onana. (Ẹf. 5:15) Ẹvẹ eva e were omai te inọ Yearbook na, Uwou-Eroro Na, gbe Awake! e vọ avọ iku uzẹme erọ eware no e via nọ e rẹ tuduhọ omai awọ jẹ wọ omai ruabọhọ ẹnya evaọ “edhere na”!—Aiz. 30:20, 21.

²⁹ Enwoma efa jọ e tẹ jẹ riẹ. Pọl ukọ na ọ ta kpahe otujọ inọ: “A te je wuhrẹ oyẹlẹ, nọ a rẹ nya ẹreghe no uwou kpo uwou; ogbẹjẹrọ oyẹlẹ ọvo ho, rekọ a rọ oma rai kẹ ogbẹta gbe igu-iguẹgu, jegbe eme nọ i fo rai ẹ ta ha yọ a ta.” (1 Tim. 5:13) Onana o ta mukpahe oke gbe omodawọ nọ a re ro kpeze evuẹ nọ e r’oja ha se inievo mai.

³⁰ Je roro unu oke nọ o rẹ rehọ re a ruabọhọ ileta ọ Itanẹte ibuobu. Avọ isiuru, obe na Data Smog o ta nọ: “Nọ ohwo ọ be raha oke buobu viere fihọ iẹ na, ileta ọ Itanẹte na i ve nwene vẹrẹ no oware okpokpọ isiuru kpohọ owha nọ o rẹ raha oke buobu, avọ edọzini evuẹ buobu nọ a re se jẹ k’iyo rai kẹdẹ kẹdẹ rono obọ erivẹ, egbẹnyusu, . . . gbe ighoro-eki nọ a zizie he ze.” Ofariẹ, o ta nọ: “Ahwo nọ a rẹ zewa ọ eware kpobi nọ a ruẹ a wo uruemu uyoma ọ ẹwhaliẹ evuẹ nọ a rri fihọ eware isiuru kpobi nọ i te rai obọ—eme ẹkoko, iku erue ọgbọna, ileta ọ Itanẹte nọ a rẹ whaliẹ n’ohwo ruọ ohwo gbe efa—ro se ohwo kpobi nọ ọ rrọ obe adrẹse ọ Itanẹte rai.”

³¹ Onana o rrọ vevẹ evaọ ileta ọ Itanẹte nọ a be vaha evaọ udevie inievo na buobu—eware itieye wọhọ eme aroza hayo iku eware-ehwẹ jọ kpahe odibọgba na; eme-ọketa nọ a rehọ wọhọ nọ i no orọwọ mai ze; etadhesẹ no eme sa-sa nọ a yo no ikokohọ esese, ilogbo, hayo Ọgwa Uvie na ze; eware nọ a jọ usiuwoma ota rọ ẹro ruẹ; gbe efa—eware nọ e rẹ wọhọ nọ i yoma ha. Ibuobu i ru rie fihọ uruemu re a vi ileta ọ Itanẹte itieye ababọ ẹkiẹ oria nọ i noze, nọ u re ru ei bẹbẹ re a riẹ ohwo nọ o ghine kere ei, oware nọ u fo nọ o rẹ lẹliẹ ohwo roro sọ ovuẹ na o ghinẹ rrọ uzẹme.—Itẹ 22:20, 21.

³² Eme itieye na nọ e r’oja tere he na e rrọ oghẹrẹ eme omokpokpọ nọ Pọl o wo fihọ iroro ho evaọ okenọ o kere se Timoti, inọ: ‘He lele oghẹrẹ eme oma okpokpọ eyena enọ whọ jọ unu mẹ yo na evaọ ẹrọwọ gbe uyoyou nọ e rọ eva Kristi Jesu.’ (2 Tim. 1:13) ‘Emamọ ẹrọ-unu’ ọrọ uzoẹme Ikereakere na u wo ‘oghẹrẹ eme oma okpokpọ’ nọ u no uzoẹme Ebaibol orọ ẹkpare kpehru ọ esuo-okpehru Jihova ẹkwoma Uvie na ze. (Zẹf. 3:9) U fo re ma daoma kpobi re ma rehọ oke gbe ẹgba kpobi nọ ma wo rọ tha ẹkpare kpehru ọ esuo-okpehru Jihova na uke.

³³ Nọ ma nya diwi ruọ oke urere ọ eyere eware nana gaga no na, oke onana o rrọ onọ ma rẹ jọ seba eroro ho. Ebaibol na ọ vẹvẹ omai unu inọ: “Jaja aro vi, he roro. Ọwegrẹ ra ukumuomu na, ọ [wọhọ okpohrokpo] nọ obi do enu, be guọlọ ọjọ nọ ọ rẹ ria.” (1 Pita 5:8) O ta haro nọ: “Wha fi ẹgọ-ẹmo Ọghẹnẹ ọsoso họ oma, re wha sai dikihẹ kẹ ereghẹ ukumuomu.”—Ẹf. 6:11.

³⁴ A tẹ rehọ iẹ ruiruo thọthọ, Itanẹte na o rẹ sae jọ edhere nọ Setan o re ro fi ahwo nọ ogaga riẹ o lẹliẹhọ kparobọ. Dede nọ o rẹ sai wo iruo jọ, enwoma e riẹ otẹrọnọ a gbe rri rie avọ areghẹ hẹ. O gwọlọ re esẹ gbe ini maero a fiẹrohọ eroruiruo Itanẹte emọ rai na gaga.

³⁵ Eriwo owowa kpahe Itanẹte na yọ ọthọwẹ. Ma wo ovuhumuo kẹ ekareghẹhọ ẹruoke ọ Pọl na: “Jọ [enọ] . . . i re koko efe akpọ na, [a ru wọhọ ẹsenọ] a wo oware ovo kugbei hi, keme epanọ akpọ na ọ rọ na ọ be vrẹ.” (1 Kọr. 7:29-31) Ma te fi eware enana họ iroro mai u re fiobọhọ k’omai avọ iviuwou mai nọ eware kpobi nọ akpọ na ọ be kẹ, kugbe Itanẹte na i gbe mi omai iroro mai hi.

³⁶ O r’oja re ma sikẹle inievo mai evaọ ukoko na jẹ rehọ oke nọ u kiọkọ na ruiruo avọ areghẹ, rehọ ere fialoma mai via kẹ ẹwhaharo ọ isiuru Uvie na. Nọ uyero onana o be kẹle ekuhọ riẹ na, joma “siọ epanọ ahwo Egedhọ a rẹ nya ba ẹnya, eva iroro diodi eva rai,” rekọ joma “riẹ otọ epanọ oreva Ọnowo na o rọ.”—Ẹf. 4:17; 5:17.