Ẹkpẹti Ọnọ

◼ Enwoma vẹ e rrọ usu nọ a rẹ jọ Itanẹte mu kugbe ohwo nọ whọ riẹ hẹ?

A ruẹrẹ evie evuẹ Itanẹte buobu fihọ kẹ ahwo nọ a rẹ jọ tẹme kugbe. Evie evuẹ Itanẹte nana buobu e rẹ kẹ ahwo uvẹ kere je vi evuẹ kpahe omobọ rai, nọ e rẹ kẹre te iwoho rai gbe evuẹ efa kpahe oma rai. Ahwo nọ a ruẹ evuẹ yena a sae rọ ẹkwoma oyena lele ohwo na tẹme. Izoge na a be mae rehọ evie-evuẹ itieye na ruiruo, yọ izoge jọ evaọ ukoko na a rehọ e rai tẹme kugbe ahwo jọ nọ a se oma rai Isẹri Jihova no.

O rẹ lọlọhọ re ohwo nọ ma nyaku evaọ Itanẹte o gu ọrue k’omai kpahe oghẹrẹ ohwo nọ ọ rrọ, edikihẹ abọ-ẹzi riẹ, hayo ẹjiroro riẹ. (Ol. 26:4) Ohwo nọ o bi se omariẹ Osẹri Jihova na ọ sae jọ ohwo nọ ọ rrọ ukoko ho, ohwo nọ a sino ukoko no, hayo ukọ-ọrue. (Gal. 2:4) Evaọ ẹsibuobu, ahwo nọ a rẹ gba emaha na du a rẹ jọ evie-evuẹ yena gwọlọ emaha nọ i ti kie ruọ ai obọ.

O tẹ make rrọ nọ u mu omai ẹro nọ ahwo nọ ma bi lele tẹme evaọ Itanẹte a ga evaọ ukoko na, o rẹ lọlọhọ re ẹmeọta evaọ edhere otiọye na ọ whrẹrẹ kpohọ eme nọ i fo kẹ Ileleikristi hi. Onana o rrọ ere keme nọ ohwo o te bi lele ohwo nọ ọ re ruẹ ẹdọvo ho tẹme, ẹsiẹe ọ rẹ mae ta oghẹrẹ ẹme nọ o je rie kpobi. A sai je rri ẹmeọta Itanẹte wọhọ oware idhere, roro nọ esẹgbini rai, ekpako ukoko, hayo amọfa a te riẹ oware nọ a ta ha. U yoma gaga inọ izoge buobu nọ a jọ ukoko na yẹ a kie ruọ agbefẹ nana no, a te je kie ruọ ẹta eme etọtọ nọ i fo ho no. (Ẹf. 5:3, 4; Kọl. 3:8) Amọfa jọ a fi iwoho rai nọ e rẹ kpare isiuru ọfariẹ-ogbe ba evuẹ rai no, edẹ-ova nọ i fo ho, hayo ovuẹ kpahe oria nọ a jẹ sae jọ Itanẹte ruẹ ile ividio nọ a jọ dhesẹ iwoho ẹbẹba.

Fiki eware nọ ma tẹme te no na, u fo re esẹgbini a muẹrohọ eware nọ emọ rai a be jọ ekọmputa ru. (Itẹ 29:15) O rẹ jọ oware enwoma re ma zizie ọrara nọ ma riẹ ẹdọvo ho ziọ uwou mai ma vẹ nyase iẹe avọ emọ mai ọvo ba. Ere ọvona re, o rrọ oware enwoma k’omai hayo emọ mai re ma jọ Itanẹte mu usu kugbe erara nọ ma riẹ hẹ, o tẹ make rọnọ a se oma rai Isẹri Jihova.—Itẹ 22:3.