Whaha Ilale “Eware Ifofe”
1 Edhere ẹmeọta-kugbe jọ nọ ọ viodẹ nẹnẹ họ E-mail (ovuẹ nọ a rẹ rehọ kọmputa vi). Dede nọ ohwo ọ rẹ sae ghale iku eware nọ e via kẹe gbe iroro riẹ kugbe ahwo uviuwou avọ egbẹnyusu riẹ ẹkwoma edhere ọnana, “eware ifofe” vẹ e rẹ sai no eroruiruo E-mail nọ o vrẹta ze?—Itẹ 12:11.
2 Unuovẹvẹ Kpahe E-Mail: Ahwo jọ a rẹ ta nnọ a rẹ rehọ ẹkwoma E-mail wo ẹmeọta ọkpekpe kugbe ukoko Jihova evaọ okenọ a te wo evuẹ nọ a rehọ wọhọ evuẹ ekpokpọ. Onana o sae kẹre te ikuigbe eware nọ a rọ ẹro ruẹ, evuẹ kpahe eware nọ e via evaọ Ebẹtẹle, iyẹrẹ kpahe ọraha hayo ukpokpoma, je kugbe evuẹ nọ a whowho evaọ Isukulu Odibọgba Uvie nọ u fo nọ a rẹ ko dhere dede. Oma o rẹ kpakpa efa jọ gaga re a vi evuẹ itieye na, bi rẹro nọ a be te jọ ahwo ọsosuọ nọ a kake fere evuẹ na via kẹ egbẹnyusu rai.
3 Ẹsejọ, a jẹlẹ hayo fiba evuẹ gbe ikuigbe eware nọ a rọ ẹro ruẹ no. Hayo ẹsejọhọ evaọ omodawọ re a ru iku na jọ jajaja, ahwo jọ a kẹ evuẹ ọrue no. Ẹsibuobu enọ e rẹ rọ okpakpa rovie eme itieye na a rẹ riẹ uzẹme na kpobi hi. (Itẹ 29:20) Evaọ ẹsejọ, makọ okenọ iku i vẹro ho, a re vi ai wọhọ iku nọ i siuru. Iyẹrẹ nọ e gba ha hayo erọ osuthọ itieye na yọ ‘iku erue,’ nọ e rẹ wha uvi omorọkẹ Ọghẹnẹ haro ho.—1 Tim. 4:6, 7.
4 Otẹrọnọ who vi ovuẹ nọ a ruẹ uwhremu na nọ o gba ha, whọ rẹ wha abọjọ owha-iruo enuobro hayo ozighi nọ onana o rẹ sae wha ze. Okenọ Devidi o yo iyẹrẹ nọ a bru okpa họ inọ emezae riẹ kpobi i whu no, ọ tẹ “bẹre iwu riẹ” evaọ uweri. Dede na, uzẹme riẹ họ, ọmọzae ọvo riẹ ọvo o whu. Oyena o kẹ uye gaga, rekọ okpa nọ a bru họ ẹme na u fiba edada Devidi. (2 Sam. 13:30-33) Evaọ uzẹme ma gwọlọ ru uvumọ oware nọ u re su oniọvo mai jọ thọ hayo lẹliẹ udu riẹ whrehe he.
5 Edhere Ẹmeọta Ọghẹnẹ: Woi họ iroro nnọ Ọsẹ obọ odhiwu mai ọ rehọ edhere ẹmeọta jọ mu, ‘ọrigbo nọ o wo ẹrọwọ avọ areghẹ na.’ ‘Ọrigbo’ ọyena o wo owha-iruo nọ ọ rẹ rọ riẹ ovuẹ nọ o re whowho kẹ uviuwou ẹrọwọ na, jegbe ‘ẹruoke’ nọ a re ro whowho iei. Ukoko esuo Ọghẹnẹ ọvo a rẹ jọ ruẹ emuore abọ-ẹzi nana. U fo re ma rọ ẹro suọ edhere evuẹ nọ a re fi eva họ onọ Ọghẹnẹ o ro mu ẹsikpobi, orọnikọ ahwo jọ nọ a wo Itanẹte he.—Mat. 24:45.
6 Evie Evuẹ ọ Itanẹte: Ma wo Internet Web site (evie evuẹ ọ Itanẹte) mai: www.watchtower.org. Evie evuẹ nana ọvo o te nọ ma re ro whowho evuẹ kẹ ẹgbede. U du gwọlọ nọ ohwo jọ, ogbẹgwae, hayo ukoko jọ o ruẹrẹ evie evuẹ fihọ nọ o rẹ kẹ evuẹ kpahe Isẹri Jihova ha. Ahwo jọ a fi eme nọ e rrọ ebe mai avọ ikereakere gbe eria nọ a riobọhọ kpobi họ Itanẹte no, yọ a tube fi ebe nọ a rehọ eme okokohọ ubrotọ no ze họ iẹe kẹ ahwo no avọ ẹjiroro azọhọ unevaze. Makọ a re wo erere noi ze hayo a re wo ho, uruemu nọ a rẹ rọ wariẹ kporo jẹ ghale ebe ọ ukoko Watchtower evaọ Itanẹte yọ uziothọ mukpahe izi udu-ekere. Dede nọ ahwo jọ a sai rri onana wọhọ obufihọ kẹ inievo na, ma whẹ obọ họ iẹe he yọ a rẹ se uruemu na ba.
7 Ẹromuhotọ gbe edhesẹ iroro egbagba evaọ okenọ ma tẹ be rehọ ekwakwa ẹmeọta kọmputa ru iruo u re fi obọ họ nọ ma jẹ ruẹ nnọ ma rọ ‘eware eghaghae gbe emamọ efe’ vọ iroro mai.—Itẹ 24:4.