Omaa Okpokpọ orọ Ẹdẹ Okokohọ Obọdẹ

Evuẹ buobu e riẹ enẹna kpahe epanọ ma rẹ rọ rẹrote ubiudu mai re ma sae reawere uzuazọ uthethei. Whaọ udu ẹwoho mai na u tube wuzou viere. Uzoẹme ọruẹrẹfihotọ ẹdẹ okokohọ obọdẹ nọ o ti muhọ evaọ February 2004 na o nwani fo kẹhẹ: “Ẹgọ Jihova avọ Udu Kpobi.” (1 Irv. 28:9) Eme ma rẹ sai rẹro nọ ma ti wuhrẹ?

Ọsẹro okogho na ọ te ta kpahe “Obọ Ufihọ kẹ Amọfa re A Gọ Jihova avọ Udu Evawere.” Ekiẹriwo i ti fielo họ oghọghọ nọ u re no isiuru nọ a rẹ bọ gbe ebe-iwuhrẹ Ebaibol nọ a re ru kugbe ahwo nọ a gwọlọ gọ Jihova ze. Ababọ avro, ahwo nọ a te jariẹ kpobi a ti wo omosasọ gbe uduotahawọ no ẹme ọsosuọ oruẹme ọrara na ze, “Ẹruọsa Idu Mai Evaọ Akpọ Ukpokpoma.” Ẹme ame-ọhọ a ti ro ku abọ ohiohiẹ na họ.

Evaọ oke uvo, abọ na “Obọ Ufihọ kẹ Amọfa” o te ta kpahe epanọ ma sai ro fi obọ họ kẹ amọfa. Eme esẹgbini e rẹ sai ru re a kpọ udu emọ rai no usu uyoma, je fi obọ họ kẹ ai si kẹle Jihova? Abọ na “Fi Obọ họ kẹ Emọ Ra Wo Evawere Kpahe Jihova” o te kẹ iroro-ejẹ nọ i re fi obọ họ je dhesẹ epanọ a sai ro ru onana.

Kọ ma be rehọ ọruẹrẹfihotọ Jihova kpobi ruiruo ro ru udu ẹwoho mai na kpokpọ jẹ ga ziezi? Ẹme urere oruẹme ọrara na, “Ruabọhọ Udu Kpobi nọ A rẹ rọ Gọ Jihova” o te tẹro vi abọ ene jọ nọ i wuzou erọ ọruẹrẹfihotọ ẹruọsa abọ-ẹzi mai. Ẹvẹ ma be raha oke jẹ daoma te kẹ olẹ, ewuhrẹ Ẹme Oghẹnẹ, usiuwoma ota ajọwha, gbe omakugbe Ileleikristi efa? Kọ ma sae jọ abọ nana jọ daoma viere?

Jihova ọ kẹ uzizie na: “Rehọ iroro ra kẹ ohrẹ gbe ezọ egaviẹ rọ kẹ eme eriariẹ.” (Itẹ 23:12) Jọ enẹna ma omaa re whọ jariẹ evaọ obọdẹ ẹdẹ nana nọ ọ vọ avọ ithubro Ikereakere na. Ere oruo o te bọ owhẹ ga ruabọhọ ẹgọ Jihova avọ udu kpobi gbe ẹgwọlọ ra kpobi.