Bọ Uzuazọ Ra Wariẹ Iruo Jihova Họ

¹ Jesu ọ rehọ ahwo nọ a jẹ kezọ kẹe dhesẹ oghẹrẹ ebebabọ ivẹ. Ọjọ ọ bọ edhere uzuazọ riẹ fihọ ehru utho orọ ẹmeoyo kẹ Kristi ọ tẹ sae dadamu kẹ ofou ọwọsuọ gbe ukpokpoma. Ọrọ avivẹ ọ bọ fihọ ehru uwẹkpẹ orọ aghẹmeeyo ọ oriobọ ọ gbẹ sae dadamu hu evaọ okenọ otunyẹ ọ ze. (Mat. 7:24-27) Nọ ma be rria evaọ ekuhọ eyero eware nana, ma be rọ ẹro ruẹ ofou ukpokpoma buobu. Ẹgho imuozọ orọ uye ulogbo na o bi kokohọ kpakpata. Kọ ma ti thihakọ te urere avọ ẹrọwọ mai nọ ọ te jọ gbẹsinẹdẹ? (Mat. 24:3, 13, 21) Oghẹrẹ nọ ma be bọ izuazọ mai enẹna o r’oja gaga. Fikiere, o rrọ oware ovẹrẹ re ma nọ omobọ mai nọ, ‘Kọ mẹ be bọ uzuazọ Oleleikristi mẹ gaga wariẹhọ iruo ẹmeoyo kẹ Ọghẹnẹ?’

² Eme u dhesẹ re ma bọ izuazọ mai wariẹ iruo Jihova họ? U dhesẹ Jihova nọ ma re ru fihọ uzedhe ehri izuazọ mai. U kpomahọ ẹrotọvi Uvie na wọhọ ugogo ọdawẹ mai. U dhesẹ ẹmeoyo kẹ Ọghẹnẹ evaọ iruẹru uzuazọ ikẹdẹ kẹdẹ mai kpobi. O gwọlọ idu mai nọ ma re fihọ ewuhrẹ Ebaibol ọ omobọ ohwo, uviuwou, gbe orọ ukoko jegbe iruẹru usiuwoma ota mai, ru onana fihọ ute ọsosuọ. (Ọtausi. 12:13; Mat. 6:33) Oghẹrẹ edhere ẹmeoyo otiọye na ọ rẹ wha ẹrọwọ nọ ọ rẹ jọ gaga wọhọ utho ze, onọ u re kie he evaọ okenọ nọ ofou uye ọ tẹ tehe iẹ.

³ O rrọ oware isiuru re ma ruẹ ima ọ ahwo nọ e be bọ izuazọ gbe ẹruore rai kẹ obaro wariẹ iruo Ọghẹnẹ, nwane wọhọ epanọ Jesu o ru. (Jọn 4:34) A be nya lele omaa ikẹse kẹse orọ iruẹru Uvie jẹ be rehọ fiki ere reawere eghale ibuobu. Oni jọ o dhesẹ vevẹ epanọ tei te ọzae riẹ a rọ yọrọ emezae ivẹ rai avọ obokparọ re a gọ Jihova: “Ma rehọ uzẹme na vọ izuazọ mai—ekpohọ ikokohọ na kpobi, oma ruẹrẹkpahe kẹ gbe ekpohọ iwuhrẹ na, gbe iruo usiuwoma ota nọ ma re ru fihọ oware ẹsikpobi orọ izuazọ mai.” Ọzae riẹ o fibae nọ: “Orọnikọ uzẹme na yọ abọjọ uzuazọ mai hi, rekọ oye họ uzuazọ mai. Oware ofa kpobi o wariẹ e riẹ họ.” Kọ who fi iruẹru Jihova fihọ obaro evaọ uviuwou ra no?

⁴ Ma Omaa ọ k’Oka k’Oka Nọ U re Ruiruo: Ukoko Jihova u bi fiobọhọ k’omai nya lele edhere-iruo owoma abọ-ẹzi ẹkwoma iwuhrẹ isoi ẹkpoka. Ileleikristi nọ e bọ izuazọ rai wariẹ egagọ Jihova a rẹ ruẹrẹ iruẹru okọ gbe iviuwou rai họ evaọ edhere nọ a re ro kpohọ iwuhrẹ nana nọ e r’oja na kpobi. A rẹ kuvẹ re eware nọ e r’oja tere he i kpomahọ ekpohọ iwuhrẹ ikẹse kẹse rai hi.—Fil. 1:10; Hib. 10:25.

⁵ Ileleikristi nọ e kpako a re vuhumu nnọ nwanọ epanọ o r’oja re a re emu kẹse kẹse eva unuẹse jọ kẹdẹ kẹdẹ na, ere o r’oja te re a ru ugogo omaa kẹ ewuhrẹ omobọ ohwo gbe orọ uviuwou, kugbe omaruẹrẹfihọ kẹ iwuhrẹ na. (Mat. 4:4) Kọ o tẹ make kawo whọ sai fi iminiti 15 hayo 20 kẹdẹ kẹdẹ họ rọkẹ ewuhrẹ omobọ ra? Usiavẹ na họ a rẹ kẹ eware efa uvẹ hẹ re i kpomahọ oke nọ a fihọ kẹ ewuhrẹ na. Ru ei fihọ uruemu. Onana o sae gwọlọ ẹkake rọwo ze k’ohiohiẹ k’ohiohiẹ vi epanọ who bi ru enẹna. Ahwo 17,000 erọ uviuwou Ebẹtẹle ọ akpọ soso na a rẹ kake kparoma evaọ ohiohiẹ re a ru isase ikere okpẹdẹ na. Uzẹme, ẹkake rọwo ze o gwọlọ ẹkaki kiẹzẹ eva aso re oma na o sae jọ kọkọ evaọ okiokiọ riẹ.

⁶ Otẹrọnọ whẹ yọ ọnọ o wo uzou uviuwou, kake jowọ re whọ m’omaa jẹ ruẹrẹ iruẹru Uvie uviuwou ra họ. Iviuwou jọ i re se Ebaibol na, Yearboook, hayo obe ofa kugbe okenọ a bi serihọ nọ a tẹ re emu owọwọ no. Esẹ gbe ini jọ buobu nọ e ruẹ emọ rai nọ e rro zihero Ileleikristi egaga evaọ abọ-ẹzi no a ta nọ oware jọ nọ o wha obokparọ rai ze họ uruemu uviuwou nọ a rẹ rọ ruẹrẹ oke fihọ evaọ owọwọ jọ k’oka k’oka nọ a rẹ jọ reawere oke ọbọga abọ-ẹzi kugbe. Ọsẹ otiọye jọ ọ ta nọ: “Me roro nọ oware nọ o mae wha ẹnyaharo abọ-ẹzi emọ mai ze họ uwuhrẹ uviuwou ikẹse kẹse mai evaọ aso ọ Edesa-Oka, onọ u muhọ ikpe 30 nọ i kpemu no.” Emọ esa riẹ kpobi a họ-ame eva oke emaha, yọ evaọ obaro aimasa na a tẹ ruọ iruo-odibọgba oke kpobi na. Fiba ewuhrẹ uviuwou na, a rẹ sae wariẹ edhere-ẹmeọta orọ usiuwoma ota hayo eme nọ a te jọ obọ ewuhrẹ ta yọ a rẹ sae reawere iruẹru omokpokpọ efa kugbe.

⁷ Kọ evaọ omaa ọ ẹkpoka ra, whọ ‘dẹ oke’ rọkẹ ewhowho ovuẹ Uvie na no? (Kọl. 4:5) Ibuobu mai a kua iruo v’abọ, ma wo ewha-iruo uviuwou gbe erọ ukoko nọ ma rẹ rẹrote. Otẹrọnọ ma gbe ru ugogo ọruẹrẹfihotọ jọ re ma w’obọ evaọ iruo ovuẹ gbe ewuhrẹ na k’oka k’oka ha, o te jọ lọlọhọ gaga re eware efa e rehọ oke iruo nana nọ e r’oja na no. Ohwo jọ nọ o wo ogba ulogbo orọ iruẹ ọ ta nọ: “Ole ukpe ọ 1944 me vuhumu nnọ edhere ọvuọvo nọ mẹ sai ro kpohọ usiuwoma họ mẹ rẹ m’omaa ẹdẹ jọ fihọ kẹe. Rite inẹnẹ na mẹ gbẹ ruẹrẹ ẹdẹ jọ fihọ evaọ ẹkpoka na rọkẹ usiuwoma ota.” Ọkpako ukoko Oleleikristi jọ ọ ruẹ nọ ewo ugogo omaa rọkẹ isẹri-ise o rẹ lẹliẹe wo euwa 15 k’amara k’amara evaọ iruo usiuwoma ota na. Otẹrọnọ o wo iruẹru okọ jọ evaọ Ẹdẹ-Ọmaha, o re fi ei họ oke nọ o no usiuwoma ohiohiẹ riẹ ze no. Kọ whẹ gbe uviuwou ra a sae m’omaa ọ makọ ẹdọvo k’oka k’aka rọkẹ usiuwoma ota, re wha ru ei fihọ abọjọ edhere uzuazọ abọ-ẹzi rai?—Fil. 3:16.

⁸ Kiẹ Edhere-Iruẹru Uzuazọ Ra Riwi: Eware jọ e riẹ nọ e rẹ wọso ebabọ izuazọ mai wariẹ iruo Jihova. Eware idudhe e rẹ sai kpomahọ omaa ọ uwuhrẹ omobọ mai, iwuhrẹ ukoko, gbe usiuwoma ota nọ ma rọ oma totọ ruẹrẹhọ no. Ọwegrẹ mai, Setan, ọ be dao ẹgba riẹ kpobi re “ọ whaha omai” jẹ raha omaa mai. (1 Tẹs 2:18; Ẹf. 6:12, 13) Whọ kuvẹ re ezadhe enana i whrehe owhẹ hẹ, re who serihọ. Ru enwene kpobi nọ o gwọlọ re who ru iruẹru Uvie ra nọ whọ m’omaa rai gba. Ọtamuo gbe ẹdadamu e r’oja re a sai ru oware aghare gba.

⁹ Ma rẹ kuvẹ vievie he re okpomahọ akpọ gbe ekpehre isiuru ọ oma-iwo sebaẹgba mai i fi iruẹru nọ e kare abọ-ẹzi họ aro mai nọ e rẹ sae rehọ oke gbe ẹromuhotọ mai. O gwọlọ ọkiẹriwo omobọ ohwo, ẹkwoma enọ wọhọ: ‘Kọ edhere uzuazọ mẹ o rọ ẹmẹrera jẹlẹ hayo riwi akotọ no, wọhọ odẹme? Kọ me muọ uzuazọ mẹ họ ẹbọ wariẹ eware nọ e rọ evaọ akpọ ọnana nọ e be te vrẹ na? (1 Jọn 2:15-17) Bro oke mẹ be raha fihọ ilale omobọ mẹ, erẹ omawere, iruẹru aroza omarujaja, hayo aroza ẹkeriotọ efa—wọhọ etẹlivisiọne hayo ekiakiẹ ọ Itanẹte—nọ a tẹ rehọ iẹ wawọ oke nọ mẹ be raha fihọ iruẹru abọ-ẹzi?’

¹⁰ Otẹrọnọ who muẹrohọ nọ iruẹru nọ e r’oja ha e dhẹ uzuazọ ra kpobi wariẹ no, eme who re ru? Nwanọ wọhọ epanọ Pọl ọ lẹ inọ inievo riẹ e “kpọ idhere uzuazọ rai vi” na, eme whọ gbẹ yare Jihova kẹ obufihọ re whọ wariẹ t’ẹrovi iruo riẹ hẹ? (2 Kọr. 13:9, 11) Jọ u n’owhẹ eva ze re who ru ọtamuo ra gba je ru inwene nọ i fo. (1 Kọr. 9:26, 27) Jihova o ti fiobọhọ k’owhẹ whaha ẹnya gẹle kpohọ ẹkpẹlobọ hayo obọze evaọ iruo ẹmeoyo rọkẹ ẹe.—Wawo Aizaya 30:20, 21.

¹¹ Wo Iruo Buobu Evaọ Iruẹru Oghọghọ Ọghẹnẹ: Ima ahwo buobu a bi le evawere gaga rekọ a tẹ te ruẹ nnọ nọ urere uzuazọ u bi sikẹle na, ekwakwa iwo nọ a je le avọ osegboja na e wha evawere ikrẹkri se ai hi. “Ofou o kie lele” o rrọ. (Ọtausi. 2:11) Evaọ abọdekọ riẹ, okenọ ma tẹ tọ uzuazọ mai vi Jihova, re ‘mai avọ iẹe a gbẹ jọ kẹse kẹse,’ ma rẹ ruẹ evevọwẹ ididi. (Ol. 16:8, 11) Onana o rrọ ere keme Jihova họ uzedhe ohwo nọ ma rọ fiki riẹ rrọ uzuazọ. (Evia. 4:11) Ababọ riẹ, Ọjiroro Ologbo na, uzuazọ u wo otofa ha. Egagọ Jihova i re ru izuazọ mai vọ avọ iruo nọ i wo ẹjiroro, enọ e rẹ k’omai gbe amọfa erere evaọ edhere okrẹkri, ẹhẹ, evaọ edhere ebẹdẹ bẹdẹ.

¹² O r’oja re ma whaha uruemu ọ onọmeru-ute jẹ rọ ere ku iroro ovẹrẹ mai kpahe urere akpọ Setan nọ o be tha kpata kpata na fiẹ. Eriwo mai kpahe obaro u re kpomahọ uzuazọ ikẹdẹ kẹdẹ mai. Ahwo edẹ Noa, enọ e rọwo nọ ẹvo akpọ soso o ti ku hu, “a riẹ hẹ,” a tọ izuazọ rai vi ilale omobọ ohwo—a jẹ re, jẹ da, jẹ rọ kẹ rọo—bẹsenọ ẹvo na ọ rọ “rehọ ai kpobi vrẹ.” (Mat. 24:37-39) Nẹnẹ na, ahwo nọ a tọ izuazọ rai vi akpọ ọnana a te ruẹ nọ irẹro rae e te raha ku ai evaọ ọraha ologbo nọ ohwo-akpọ ọ te ruẹ vẹre he, “ẹdẹ Ọghẹnẹ.”—2 Pita 3:10-12.

¹³ Fikiere, gbẹ hae bọ uzuazọ ra wariẹ họ Ọghẹnẹ uzuazọ na, Jihova, gbe eruo oreva riẹ. Uvumọ eki nọ who re duomahọ nọ o wo Ọthuke evaifihọ wọhọ Jihova ọ rrọ họ. Ọ rẹ ta ọrue he—o ti ru eyaa riẹ gba. (Taitọs 1:2) O re whu hu—oware ovo nọ a rọ kẹ Jihova kru nọ u re vru o rrọ họ. (Hab. 1:12; 2 Tim. 1:12) Uzuazọ ẹmeoyo gbe ẹrọwọ nọ ma be bọ enẹna yọ emuhọ gheghe ọrọ uzuazọ nọ o te jọ bẹdẹ bẹdẹ evaọ iruo oghọghọ Ọghẹnẹ evawere mai!—1 Tim. 1:11; 6:19.

[Blurb on page 3]

“Orọnikọ uzẹme na yọ abọjọ uzuazọ mai hi, rekọ oye họ uzuazọ mai.

Oware ofa kpobi o wariẹ e riẹ họ.”