Ọjọriẹ Ekareghẹhọ

Enukpe nana Ekareghẹhọ na o kie fihọ Ẹdọvo-Oka, April 2. U fo re ekpako na a muẹrohọ eware nana:

◼ Nọ wha te bi fi oke omakokohọ na họ, jọ u mu owhai ẹro nnọ a rẹ wọ ebrẹdi gbe udi na ha bẹsenọ ọre o re kie diwi no.

◼ Ahwo kpobi, kugbe ọnọ ọ te kẹ ovuẹ na, a rẹ riẹ uzedhe oke gbe oria Ekareghẹhọ na.

◼ A re wo oghẹrẹ ebrẹdi gbe udi nọ a gwọlọ na te obọ, a vẹ jẹ ruẹrẹ ae kpahe.—Rri Uwou-Eroro ọ March 1, 2003, ẹwẹ-obe avọ 10-11.

◼ A rẹ kake wha imidhe, egalase, gbe emẹjẹ avọ ohọ-emẹjẹ nọ u kiehọ ze ọgwa na, a vẹ jẹ kake ruẹrẹ ae họ oria rai.

◼ A re ru Ọgwa Uvie hayo oria ofa nọ a ti kokohọ na fo tẹtẹtẹ evaọ ẹruoke.

◼ A rẹ kake salọ eruẹrẹahwohọ avọ enọ e te wọ ebrẹdi gbe udi na taure oke u te ti te, a vẹ jẹ kẹ ae ithubro kpahe ẹkẹ-iruo rai gbe oghẹrẹ nọ a ti ro ru ei, gbe oware nọ u je fo re a wha ẹgọ nọ o kiehọ.

◼ A re ru ọruẹrẹfihotọ re a wọ ebrẹdi gbe udi na se ọnọ a wholo kpobi nọ ọ sae nyaze he fikinọ oma riẹ o ga ha.

◼ Nọ ikoko nọ e te jọ Ọgwa Uvie ru Ekareghẹhọ na i te bu vrẹ ọvo, emamọ ọruẹrẹfihọ ọ rẹ jọ udevie ikoko na re unuẹthẹ, edhere owotọ, gbe oria nọ a rẹ dhẹ imoto fihọ e gbẹ keke hrọ họ.