“Ọ Rẹ Rehọ Eri kẹ Enọ Oma O Rẹ Rọ”
1 Oma o rẹ rọ omai kpobi ẹsejọ. Oma o sae rọ omai orọnọ fiki iruo egaga nọ ma ru ọvo ho rekọ fiki ebẹbẹ nọ ma be rẹriẹ ova dhe evaọ “oke ẹbẹbẹ” nana. (2 Tim. 3:1) Wọhọ idibo Jihova, ẹvẹ ma re ro wo ẹgba abọ-ẹzi nọ u re fiobọhọ kẹ omai nọ ma gbe rolobọ evaọ odibọgba mai hi? Ma re ru onana ẹkwoma ẹrorọsuọ ọnọ o wo “ẹgba ologbo” na Jihova. (Aiz. 40:26) Ọ riẹ ẹgwọlọ mai yọ o rrọ isiuru riẹ re o fiobọhọ kẹ omai.—1 Pita 5:7.
2 Eruẹrẹfihotọ Jihova: Jihova ọ rẹ kẹ omai ẹgba ẹkwoma ẹzi ọfuafo riẹ, ogaga nọ a sae za dhe he nọ ọ rọ ma ehrugbakpọ na. Ẹzi Ọghẹnẹ o re fiobọhọ “tua eri” mai otẹrọnọ oma o rrọ omai. (Aiz. 40:31) Nọ oma ra nọ, ‘Okevẹ mẹ lẹ ba kẹ ẹzi ọfuafo Ọghẹnẹ re ọ kẹ omẹ ẹgba nọ me re ro ru iruo nọ i te omẹ wọhọ Oleleikristi?’—Luk 11:11-13.
3 Ẹkwoma ese Ebaibol na kẹdẹ kẹdẹ gbe eroro-didi kpahe oware nọ ma se gbe ebe ukoko na nọ ma rẹ romatotọ se ẹsikpobi, ma te jọ wọhọ “ure nọ a kọ họ akotọ ame, nọ o rẹ mọ ubi evaọ ezi riẹ, ebe riẹ i re lo gbe he.”—Ol. 1:2, 3.
4 Jihova ọ rẹ rehọ ibe egegagọ mai kẹ omai “omaosasọ” re. (Kọl. 4:10, 11) A rẹ rehọ ẹkwoma eme ọbọga rai, iyo rai gbe eme nọ a rẹ jọ iwuhrẹ ukoko ru rọ bọ omai ga. (Iruẹru 15:32) Maero, ekpako ukoko a rẹ kẹ obufihọ abọ-ẹzi gbe uduotahawọ osasa.—Aiz. 32:1, 2.
5 Odibọgba Na: Who te muẹrohọ nọ oma o be gwọlọ rrọ owhẹ evaọ egagọ Ọghẹnẹ, whọ se usiuwoma ota ba ha! Iruo odibọgba na i wo ohẹriẹ no iruo efa kpobi, keme ma tẹ be jariẹ wobọ ẹsikpobi o rẹ kẹ omai omosasọ. (Mat. 11:28-30) Usiuwoma na nọ ma rẹ ta u re fiobọhọ kẹ omai tẹrovi Uvie Ọghẹnẹ je wo uzuazọ ebẹdẹ bẹdẹ avọ eghale nọ i ti lele ie họ iroro ẹsikpobi.
6 Iruo e vọ riẹ nọ ma re ru taure a tẹ te raha uyerakpọ muomu nana. Ma wo uvi ẹjiroro nọ ma re ro dikihẹ whawha evaọ odibọgba mai, ‘rehọ ẹro so ogaga nọ Ọghẹnẹ ọ rẹ kẹ.’ (1 Pita 4:11) Avọ obufihọ Jihova ma ti ru iruo na te oka, keme ọ be “rehọ eri kẹ enọ oma o rẹ rọ.”—Aiz. 40:29.