“Ohwo nọ O Re Thihakọ kẹ Odawọ O Wo Oghale”
1 Ileleikristi kpobi a rẹ rẹriẹ ovao dhe edawọ. (2 Tim. 3:12) Edawọ e rẹ sae nyaze evaọ abọ ẹyao, ẹbẹbẹ ugho, ọwọsuọ, hayo evaọ idhere efa. Setan ọ rẹ wha edawọ ze re e lẹliẹ oma whrehe omai, re e lẹliẹ omai se iruo usiuwoma ota mai ba, hayo tube ru re ma se Ọghẹnẹ ba ẹgọ. (Job 1:9-11) Ẹvẹ edawọ nọ ma re thihakọ rai o rẹ rọ wha evawere ze?—2 Pita 2:9.
2 Ruẹrẹ Oma Kpahe kẹ Edawọ: Jihova ọ k’omai Ẹme riẹ, Ebaibol na nọ ikuigbe uzuazọ Jesu gbe iwuhrẹ riẹ e rrọ. Eme Jesu nọ ma re wuhrẹ je ru lele, o rẹ lẹliẹ omai wo ẹrọwọ ọgaga, jẹ ruẹrẹ oma kpahe kẹ edawọ. (Luk 6:47-49) Ma re je wo obufihọ no eruẹrẹfihotọ efa ze—inievo Ileleikristi mai, iwuhrẹ ukoko, gbe ebe nọ utu ọrigbo nọ o wo ẹrọwọ avọ areghẹ na a kere no Ebaibol ze. U te je fo re ma hae lẹ ẹsikpobi.—Mat. 6:13.
3 Jihova ọ k’omai ẹruore no re. Nọ ma te wo ẹrọwọ ọgaga fihọ eyaa Jihova, ẹruore mai ọ vẹ te jọ oware nọ “umuẹro gbe o nọ u kie omai uduvi.” (Hib. 6:19) Evaọ oke anwae, te ova-ehru o ghariẹ hayo o ghariẹ hẹ, ekọ-oyibo i re bi no unueri ababọ umu-okọ họ. Nọ ẹkporo o te fi ze idudhe nọ a je gbolo umu-okọ na fihọ ame, u re kru okọ na nọ u gbe su kpohọ oria nọ itho e rrọ họ re o seba ezue. Ere ọvona re, ẹrọwọ nọ ma re fihọ eyaa Ọghẹnẹ o rẹ lẹliẹ omai dikihẹ ga nọ ẹkporo ebẹbẹ o te fi omai. Ebẹbẹ e rẹ sae roma via idudhe. Dede nọ iruo usiuwoma ota Pọl avọ Banabas e jẹ riẹ nya ziezi evaọ Listra, uyero na u nwene idudhe nọ ahwo Ju ọwọsuọ a dulawhe.—Iruẹru 14:8-19.
4 Ithihakọ E rẹ Wha Oghọghọ Ze: Nọ ma te dikihẹ gaga evaọ iruo usiuwoma ota na ghelọ ọwọsuọ, o rẹ k’omai iroro idhedhẹ. Ma rẹ ghọghọ nọ a te kele omai gbe enọ i gine te erọ ọjẹfiẹ fiki odẹ Kristi. (Iruẹru 5:40, 41) Edawọ nọ ma re thihakọ rai u re fiobọhọ k’omai wo ekwakwa wọhọ omarokpotọ, ẹmeoyo, gbe ithihakọ ziezi. (Izie. 8:16; Hib. 5:8; Jem. 1:2, 3) U re wuhrẹ omai nọ ma fievahọ Jihova, fievahọ eyaa riẹ, je ru ei fihọ adhẹzọ mai.—Itẹ 18:10.
5 Ma riẹ nọ ubroke jọ ọvo edawọ e te jariẹ. (2 Kọr. 4:17, 18) Edawọ i re rovie uvẹ nọ ma re ro dhesẹ epanọ uyoyou mai kẹ Jihova u diwi te. Nọ ma te thihakọ rai, ma re dhesẹ Setan fihọ ọtọrue. Fikiere, jọ o bẹ owhẹ no ho! “Ohwo nọ o re thihakọ kẹ odawọ o wo oghale, keme re o te mudhe kẹ odawọ na, o re ti mi etu-uvie uzuazọ.”—Jem. 1:12.