UZUAZỌ OLELEIKRISTI
Jihova O re Fiobọhọ kẹ Omai Thihakọ Ebẹbẹ Mai
Evaọ edẹ urere nana nọ ma be rria na, ebẹbẹ buobu i bi te omai. Ẹsejọ dede o rẹ tubẹ jọ omai oma nọ ebẹbẹ nọ i bi te omai e rro vi omai oma. Rekọ, ma tẹ be hai si kẹle Jihova ẹsikpobi, o ti fiobọhọ kẹ omai thihakọ ebẹbẹ nọ e make rro thesiwa. (Aiz 43:2, 4) Ẹvẹ ma sai ro si kẹle Jihova nọ ebẹbẹ i te te omai?
Olẹ. Nọ ma te horie eva mai kẹ Jihova, Jihova o re ru udu te omai otọ jẹ kẹ omai ẹgba nọ ma re ro thihakọ.—Fil 4:6, 7; 1Tẹ 5:17.
Iwuhrẹ nọ ma rẹ nya. Enẹna o mae tubẹ gwọlọ nọ ma re kpohọ iwuhrẹ, re ma hae rehọ ẹme Ọghẹnẹ ko omamai jẹ hai kuomagbe inievo na. (Hib 10:24, 25) Nọ ma tẹ be hae ruẹrẹ oma kpahe kẹ iwuhrẹ, kpohọ iwuhrẹ, kẹ uyo, je ru ẹme, onana u re dhesẹ nọ ma be kuvẹ re Jihova ọ rehọ ẹzi riẹ fiobọhọ kẹ omai.—Ev 2:29.
Usi uwoma ota. Ma tẹ be hae daoma kpohọ usi uwoma ẹsikpobi, iroro mai e gbẹ te jọ ebẹbẹ mai kẹse kẹse he, ukpoye kọ ẹruore mai ma te hai roro kpahe. Nọ ma tẹ be hai kpohọ usi uwoma, u re je fiobọhọ kẹ omai si kẹle Jihova gbe ibe iruiruo mai, koyehọ inievo ukoko na.—1Kọ 3:5-10.
WHA RRI IVIDIO NA JIHOVA O TI KRU OWHẸ REHỌ, KẸSENA WHA VẸ KIYO ENỌ NANA:
Eme o fiobọhọ kẹ Sista Malu si kẹle Jihova ziezi evaọ okenọ ebẹbẹ i tei?
Wọhọ epanọ o jọ kẹ Sista Malu na, ẹvẹ eme nọ e rrọ Olezi 34:18 e sae rọ kẹ omai omosasọ?
Ẹvẹ iku Sista Malu na i ro dhesẹ nọ Jihova ọ rẹ kẹ omai “ogaga nọ u vi ogaga” nọ ebẹbẹ i te te omai?—2Kọ 4:7