UZOẸME UWUHRẸ 32
OLE AVỌ 38 Ọ te Bọ Owhẹ Ga
Jihova Ọ be Kẹ Omai Ẹgba Thihakọ
“Ọghẹnẹ nọ ọ vọ avọ uwowou ulogbo na . . . o ti ru owhai ga, o ti ru owhai dikihẹ ga, o ti ru owhai dowọ muotọ ziezi.”—1 PITA 5:10.
OWARE NỌ A JARIẸ TA KPAHE
Eware nọ Jihova ọ gwọlọ nọ ma re ru re ma sai thihakọ gbe epanọ ma sai ro ru eware yena ọvuọvo.
1. Fikieme o rọ gwọlọ nọ ma re thihakọ, kọ ono o bi fiobọhọ kẹ omai thihakọ? (1 Pita 5:10)
AKPỌ na ọ ga wo umuo ho fikinọ edẹ urere na ma rrọ na. Fikiere idibo Jihova a re thihakọ. Idibo Jihova jọ a be mọ gaga. Ahwo a whu ku ejọ. Efa jọ e riẹ nọ ahwo uviuwou rai hayo egọmeti a bi kpokpo. (Mat. 10:18, 36, 37) Ẹbẹbẹ kpobi nọ o bi te owhẹ kẹhẹ, riẹ nọ Jihova ọ sai fiobọhọ kẹ owhẹ thihakọ.—Se 1 Pita 5:10.
2. Ẹgba vẹ Ileleikristi a be sai ro thihakọ?
2 A tẹ ta nọ ohwo o bi thihakọ, u dhesẹ epanọ ohwo ọ rẹ gbẹ gọ Jihova vrẹ je rẹro nọ eware i ti woma dede nọ a bi kpokpo iei, hayo edawọ i bi tei, hayo o wo ebẹbẹ efa. Orọnikọ ẹgba obọmai ma sai ro thihakọ họ. Rekọ Jihova họ ọnọ ọ be kẹ omai “ogaga nọ u vi ogaga.” (2 Kọr. 4:7) Ma te jọ uzoẹme nana ta ẹme te eware ene jọ nọ Jihova o bi ro fiobọhọ kẹ omai thihakọ. Ma te jẹ ruẹ oware nọ ma re ru re eware yena e sai fiobọhọ kẹ omai.
OLẸ
3. Fikieme ma rọ ta nọ olẹ yọ oware igbunu?
3 Jihova o ru oware igbunu jọ kẹ omai nọ u bi fiobọhọ kẹ omai thihakọ. Ọ kẹ omai uvẹ nọ ma sai ro lele iei ta ẹme dede nọ erahaizi ma rrọ. (Hib. 4:16) Gine roro iei: Ma sae lẹ se Jihova oke kpobi, yọ ma sae lẹ sei kpahe oware kpobi. Ẹvẹrẹ nọ ma rọ lẹ kpobi, o re yo. Yọ oria kpobi nọ ma rrọ ma sae lẹ sei, te ma rrọ oria mai sa hayo a fi omai họ uwou-odi. (Jona 2:1, 2; Iruẹru 16:25, 26) Ma gbẹ make riẹ oware nọ ma rẹ lẹ kpahe he fiki epanọ ebẹbẹ mai e ga te, Jihova ọ rẹ riẹ oware nọ ma gwọlọ ta. (Rom 8:26, 27) Olẹ ginọ edhere igbunu nọ ma sae rọ ta ẹme kẹ Ọghẹnẹ.
4. Fikieme ma rọ ta nọ ma tẹ lẹ se Jihova re o fiobọhọ kẹ omai thihakọ, olẹ na o rọwokugbe oreva riẹ?
4 Ma te rri Ebaibol, ma rẹ ruẹ nọ Jihova ọ vuẹ omai nọ “oware kpobi nọ ma yare riẹ nọ o rọwokugbe oreva riẹ, ọ rẹ gaviezọ kẹ omai.” (1 Jọn 5:14) Kọ o thọ re ma lẹ se Jihova inọ ọ kẹ omai ẹgba nọ ma re ro thihakọ? Ijo, o thọ họ. Oyena o rọwokugbe oreva riẹ re. Eme ma rọ ta ere? Keme ma tẹ be sai thihakọ ebẹbẹ, Jihova ọ te ruẹ uyo kẹ Setan Ẹdhọ nọ ọ be poviẹe na. (Itẹ 27:11) U te no ere no, Ebaibol ọ vuẹ omai nọ Jihova ọ rẹ gwọlọ “dhesẹ ẹgba riẹ fiki ahwo nọ a rehọ udu rai kpobi kẹe.” (2 Irv. 16:9) Fikiere ma riẹ nọ Jihova o wo ogaga nọ ọ sai ro fiobọhọ kẹ omai thihakọ, yọ ọ ginẹ gwọlọ fiobọhọ kẹ omai.—Aiz. 30:18; 41:10; Luk 11:13.
5. Eme Jihova ọ rẹ kẹ omai nọ ma tẹ lẹ sei? (Aizaya 26:3)
5 Ebaibol ọ vuẹ omai oware nọ o rẹ via nọ ma tẹ lẹ se Jihova gaga kpahe ẹbẹbẹ mai. O ta nọ “udhedhẹ Ọghẹnẹ nọ u vi otoriẹ kpobi o vẹ te sẹro udu [mai] gbe ogaga iroro [mai].” (Fil. 4:7) Eme họ otọ ẹme yena? Nọ ebẹbẹ i te te ahwo nọ a be gọ Jihova ha, a re ru eware buobu re udu u te ae otọ. Ejọ i re ru eware jọ re a kpairoro vrẹ eware kpobi, re a gbe roro kpahe ẹbẹbẹ na gbe oware ofa kpobi hi. Rekọ oware yena u woma ha keme o sai ru nọ izi imuomu a rẹ rọ kpọ uzuazọ mai. (Je rri Matiu 12:43-45.) Ere ọvo ho, udhedhẹ Ọghẹnẹ nọ u re te omai obọ nọ ma tẹ lẹ sei na u woma vi udhedhẹ nọ ohwo o re wo nọ o te ru eware efa. Ma tẹ be lẹ se Jihova, u re dhesẹ nọ ma rẹroso Jihova riẹriẹriẹ. Yọ ọ te kẹ omai “udhedhẹ nọ u wo oba ha.” (Se Aizaya 26:3.) Edhere jọ nọ Jihova ọ sae rọ kẹ omai udhedhẹ utioye na họ, ọ sai fiobọhọ kẹ omai kareghẹhọ eware jọ nọ ma wuhrẹ evaọ Ebaibol. Eware yena i re ru udu te omai otọ keme e rẹ lẹliẹ omai riẹ nọ Jihova o you omai yọ ọ gwọlọ fiobọhọ kẹ omai re ma sai ru oware nọ u kiehọ.—Ol. 62:1, 2.
6. Eme ma rẹ lẹ kẹ nọ ẹbẹbẹ o te te omai? (Rri uwoho na re.)
6 Oware nọ whọ rẹ sai ru. Nọ ẹbẹbẹ jọ o te te owhẹ, “gbolo owha ra kẹ Jihova,” whọ vẹ jẹ lẹ sei nọ ọ kẹ owhẹ udhedhẹ riẹ. (Ol. 55:22) Lẹ nọ ọ kẹ owhẹ areghẹ nọ who re ro ru oware nọ u kiehọ evaọ udevie ẹbẹbẹ na. (Itẹ 2:10, 11) Nọ whọ be lẹ se Ọghẹnẹ inọ o fiobọhọ kẹ owhẹ thihakọ na, kareghẹhọ yere iei re. (Fil. 4:6) Hai muẹrohọ epanọ Jihova o bi ro fiobọhọ kẹ owhẹ evaọ udevie ẹbẹbẹ na. Who ve je yere iei. Whọ jọ awa ẹbẹbẹ na o ru nọ whọ gbẹ rọ kareghẹhọ eware nọ Jihova o ru kẹ owhẹ no ho ho.—Ol. 16:5, 6.
Whọ tẹ be lẹ, yọ whọ be ta ẹme kẹ Jihova. Nọ who je bi se Ebaibol, kiyọ Jihova ọ be ta ẹme kẹ owhẹ (Rri edhe-ẹme avọ 6)b
ẸME ỌGHẸNẸ
7. Ẹvẹ Ebaibol nọ ma re se ziezi o sai ro fiobọhọ kẹ omai thihakọ?
7 Ẹme Ọghẹnẹ, koyehọ Ebaibol na yọ oware jọ nọ Ọghẹnẹ o bi ro fiobọhọ kẹ omai thihakọ. Eme buobu e rrọ Ebaibol na nọ i dhesẹ nọ Jihova ọ rẹ rẹrote omai. Whọ rẹ ruẹ ẹme otiọye na se evaọ obe Matiu 6:8. Etẹe ọ ta nọ: “Ọsẹ rai ọ riẹ eware nọ wha gwọlọ taure wha tẹ te yare iẹe dede.” Jesu họ ohwo nọ ọ ta ẹme yena. Yọ ọye ọ mae riẹ Jihova kpobi. Fikiere u mu omai ẹro nọ ebẹbẹ i te te omai, Jihova ọ riẹ eware nọ ma gwọlọ, yọ o ti fiobọhọ kẹ omai. Emamọ eme itieye na efa buobu e rrọ Ebaibol nọ i re kru omai udu ga re ma sai thihakọ.—Ol. 94:19.
8. (a) Ohrẹ Ebaibol jọ vẹ o sai fiobọhọ kẹ omai thihakọ? (b) Eme ma re ru re ma sae kareghẹhọ ehrẹ Ebaibol nọ ẹbẹbẹ o te te omai?
8 Ehrẹ e tẹ jẹ rrọ Ebaibol na nọ i re fiobọhọ kẹ omai thihakọ. Ehrẹ na i re ru omai wo areghẹ nọ ma re ro ru oware nọ u kiehọ. (Itẹ 2:6, 7) Ohrẹ utioye jọ nọ Ebaibol ọ kẹ omai họ, joma ruawa gaga kpahe eware nọ e sae via odẹnotha ha. (Mat. 6:34) Ma tẹ be hai se Ebaibol ẹsikpobi jẹ romatotọ roro kpahe eware nọ ma se, ẹsiẹe ma te mae rọ kareghẹhọ ehrẹ Ebaibol nọ ẹbẹbẹ o te te omai.
9. Ẹvẹ iku ahwo nọ e rrọ Ebaibol na e sai ro fiobọhọ kẹ omai fievahọ Jihova ziezi?
9 Iku ahwo wọhọ omai e tẹ jẹ rrọ Ebaibol. Orọnọ iku esia ha. Ahwo yena a rẹroso Jihova, yọ Jihova o fi rai hotọ gbe he. (Hib. 11:32-34; Jem. 5:17) Ma tẹ be hai se iku itieye na, ma ti fievahọ Jihova gaga. Ma te rehọ iẹe nọ ọye họ “oria adhẹzọ mai gbe ẹgba mai,” yọ “ọ rẹ kake dhogbo ze ti fiobọhọ evaọ oke idhọvẹ.” (Ol. 46:1) Ma tẹ be hai se iku ahwo nọ i fievahọ Jihova evaọ oke anwae, ma te gwọlọ rọ aro kele ae re ma thihakọ je fievahọ Jihova.—Jem. 5:10, 11.
10. Eme who re ru re Ẹme Ọghẹnẹ o sai fiobọhọ kẹ owhẹ thihakọ?
10 Oware nọ whọ rẹ sai ru. Hai se Ebaibol kẹdẹ kẹdẹ. Yọ who te se ku ẹme jọ nọ o te owhẹ udu gaga, kere iei fihotọ. Ahwo buobu a ta nọ ese okpẹdẹ nọ a re se evaọ ohiohiẹ na u bi fiobọhọ kẹ ae gaga. U re ru nọ a re ro roro kpahe Ẹme Ọghẹnẹ evaọ okpẹdoke na soso. Oniọvo-ọmọtẹ jọ nọ a re se Mariea ọ ta nọ ese okpẹdẹ na u fiobọhọ kẹe gaga okenọ ọsẹgboni riẹ a jẹ mọ ẹyao ekansa. Ọye ọ jẹ rẹrote ọsẹgboni riẹ bẹsenọ a ro whu. Kọ ẹvẹ ọ sai ro thihakọ je kru udu ga evaọ okenọ a mọ kẹle uwhu no? Ọ ta nọ: “Kohiohiẹ kohiohiẹ, me re se oria Ebaibol nọ o rrọ ese okpẹdẹ na evaọ obe Ẹkiẹriwo Ikereakere na Kẹdẹ Kẹdẹ, yọ me re roro didi kpahe iẹe. U je ru nọ mẹ jẹ hai ro roro kpahe ẹme Ebaibol. O tẹ whae ze nọ me je ro roro kpahe Jihova gbe eware nọ o bi wuhrẹ omai, me gbe je roro kpahe ebẹbẹ mẹ tere he.”— Ol. 61:2.
INIEVO MAI
11. Eme u je fo re ma hae kareghẹhọ nọ mai ọvo ebẹbẹ i bi te he?
11 Jihova o ru nọ ma ro wo inievo buobu evaọ ukoko na nọ i re fiobọhọ kẹ omai thihakọ. Ma riẹ nọ “inievo [mai] kpobi evaọ akpọ na soso a be ruẹ oghẹrẹ iye evona” nọ i bi te omai na. (1 Pita 5:9) Oware yena nọ ma riẹ na ọvo dede o rẹ kareghẹhọ omai nọ mai ọvo ebẹbẹ i bi te he. Ma riẹ nọ ẹbẹbẹ kpobi nọ o te omai, oghẹrẹ ẹbẹbẹ otiọye na o te ahwo jọ no, yọ a thihakọ riẹ. Koyehọ ma sai thihakọ ọnọ o te omai na re.—Iruẹru 14:22.
12. Ẹvẹ inievo mai a rẹ sai ro fiobọhọ kẹ omai, kọ eme ma sai ru kẹ ae? (2 Ahwo Kọrint 1:3, 4)
12 Nọ ẹbẹbẹ o te te omai, inievo mai a sae tuduhọ omai awọ. Ere inievo na a tuduhọ Pọl ukọ na awọ re. Unuẹse buobu ọ jẹ hai yere inievo nọ i je fiobọhọ kẹe okenọ a fi ei họ uwou-odi evaọ uwou riẹ. Yọ ọ fodẹ odẹ inievo yena. A jẹ hae sasa Pọl oma, a jẹ hae tae udu ga, yọ a jẹ hai fiobọhọ kẹe. (Fil. 2:25, 29, 30; Kọl. 4:10, 11) Ere ọvona o rrọ nẹnẹ re. Nọ ẹbẹbẹ o te te omai, inievo mai a re dikihẹ kẹ omai. Yọ ẹbẹbẹ o te te ae, ma rẹ dhẹ se ae ba ha.—Se 2 Ahwo Kọrint 1:3, 4.
13. Eme o fiobọhọ kẹ Sista Maya thihakọ ebẹbẹ nọ i te rie?
13 Inievo ukoko na a tuduhọ oniọvo-ọmọtẹ jọ nọ a re se Maya awọ gaga evaọ obọ Russia. Ahwo egọmeti a kiẹ uwou riẹ evaọ 2020. A tẹ rehọ iẹe kpohọ ekọto fikinọ ọ jẹ ta usi uwoma kẹ ahwo. Oniọvo na ọ ta nọ: “Oke yena, me je roro iroro, me gbe wo ẹgba ha. Rekọ inievo na a jẹ hae rọ ifonu se omẹ je vi uwou se omẹ, yọ a jẹ hai kere ileta se omẹ. A jẹ hae vuẹ omẹ nọ a you omẹ. Mẹ riẹ anwẹdẹ nọ me wo inievo buobu nọ i you omẹ, yọ mai kpobi uviuwou ọvo. Rekọ anwọ ukpe 2020 ze, mẹ rọ ruẹ onana vevẹ.”
14. Eme ma re ru re inievo mai a sai fiobọhọ kẹ omai? (Rri uwoho na re.)
14 Oware nọ whọ rẹ sai ru. Nọ ẹbẹbẹ o te te owhẹ, go kẹle inievo ukoko na. Ta kẹ ekpako ukoko na re a fiobọhọ kẹ owhẹ. Ekpako na a wọhọ “uwou nọ a re dhere nọ ofou o te bi fou, oria adhẹzọ nọ a re dhere nọ okposo ọ tẹ be rrọ.” (Aiz. 32:2, eme-obotọ) Whọ vẹ jẹ kareghẹhọ nọ ebẹbẹ i bi te inievo ra re. Who te ru omoware jọ kẹ ae, eva e te were owhẹ omara na, yọ u ti fiobọhọ kẹ owhẹ thihakọ ebẹbẹ ra.—Iruẹru 20:35.
Hai go kẹle inievo ra, who no abotọ rai hi (Rri edhe-ẹme avọ 14)c
ẸRUORE MAI
15. Ẹvẹ ẹruore u ro fiobọhọ kẹ Jesu? (Ahwo Hibru 12:2)
15 Jihova o ru omai wo ẹruore nọ o rẹ kẹ omai ẹgba thihakọ. (Rom 15:13) Kareghẹhọ nọ ẹruore nọ Jesu o wo u fiobọhọ kẹe thihakọ ebẹbẹ nọ e mae ga nọ i te rie okenọ ọ jọ otọakpọ. (Se Ahwo Hibru 12:2.) Jesu ọ riẹ nọ o te ru oware nọ o rẹ were Jihova te urere, u ti ru odẹ Jihova fo. Ere ọvo ho, Jesu o je rẹro epanọ ọ te rọ wariẹ jọ kugbe Ọsẹ riẹ evaọ obọ odhiwu gbe epanọ avọ ahwo nọ Ọghẹnẹ ọ salọ a ti ro su evaọ obọ odhiwu. Mai omamai, ẹruore nọ ma wo inọ ma te rria bẹdẹ bẹdẹ evaọ akpọ ọkpokpọ na o rẹ lẹliẹ omai thihakọ ebẹbẹ nọ i bi te omai evaọ akpọ Ẹdhọ nana.
16. Ẹvẹ ẹruore nọ oniọvo-ọmọtẹ jọ o wo u ro fiobọhọ kẹe, kọ eme who wuhrẹ no ẹme nọ ọ ta ze?
16 Ẹruore nọ oniọvo-ọmọtẹ jọ nọ a re se Alla evaọ obọ Russia o wo u fiobọhọ kẹe. A mu ọzae riẹ fihọ uwou-odi be hẹrẹ okenọ a ti ro guẹdhọ riẹ. Okenọ oware yena o rọ via na, Sista Alla ọ ta nọ: “Mẹ jẹ hae lẹ kpahe ẹruore nọ me wo yọ mẹ jẹ hai roro kpahe ẹruore mẹ na. Onana u je kru omẹ udu ga. Mẹ riẹ nọ a maki mu ọzae mẹ na, orọnikọ a fi kparobọ no ye he. Jihova o ti kpe ewegrẹ riẹ no kẹle, yọ ọ te ghale omai gaga oke yena.”
17. Eme ma re ru kpahe ẹruore nọ ma wo na? (Rri uwoho na re.)
17 Oware nọ whọ rẹ sai ru. Hai roro kpahe emamọ akpọ nọ ọ rrọ obaro hẹrẹ owhẹ nọ Jihova ọ ya eyaa riẹ. Hai roro epanọ akpọ ra o ti woma te nọ whọ tẹ ruọ akpọ ọkpokpọ na no gbe eghale nọ who ti wo. Ma tẹ be hai roro kpahe ẹruore mai ere, ma ti rri ebẹbẹ mai inọ e “rrọ ubroke jẹ rrọ vovori.” (2 Kọr. 4:17) Hae jẹ vuẹ ahwo eware nọ who bi rẹro rai na. Kareghẹhọ nọ ebẹbẹ i bi te ahwo yena re fikinọ ma rrọ akpọ nọ Setan o bi su, rekọ a wo ẹruore nọ ma wo kpahe obaro na ha. Fikiere o tẹ make rọnọ ẹmẹme kpẹkpẹe who lele i rai ta kpahe eware nọ Uvie Ọghẹnẹ u ti ru kẹ omai, ẹsejọhọ o te were ae.
Hae romatotọ roro kpahe epanọ akpọ ra o ti woma te evaọ obaro (Rri edhe-ẹme avọ 17)d
18. Fikieme u ro mu omai ẹro nọ Jihova o ti ru eyaa riẹ gba?
18 Nọ Job o thihakọ ebẹbẹ buobu no, ọ tẹ ta kẹ Jihova nọ: “Obọnana mẹ riẹ nọ whọ rẹ sai ru oware kpobi gbe nọ oware ovo nọ who wo họ iroro inọ who ti ru nọ whọ rẹ sai ru hu o rrọ họ.” (Job 42:2) Ẹme nọ Job ọ ta na u dhesẹ nọ o vuhumu nọ oware kpobi nọ Jihova ọ gwọlọ ru, ọ rẹ sai ru ei. Ma tẹ be kareghẹhọ oware yena, ma ti wo ẹgba nọ ma re ro thihakọ. Dae rehọ iẹe nọ aye jọ ọ be mọ. Eva e be were iẹe he keme a wọ riẹ bru edọktọ buobu no, rekọ a be sai siwi ei hi. Rekọ ẹdẹ jọ, ọ tẹ ruẹ edọktọ jọ nọ ọ riẹ iruo gaga nọ ọ te sai siwi ei. Edọktọ na ọ tẹ vuẹe oware nọ o be kẹe uye evaọ oma riẹ na gbe oghẹrẹ nọ o ti ro siwi ei. Eva e tẹ nwani mu aye na họ ẹwere dede nọ ẹyao na o ri kpo ho. Obọnana ọ te sai thihakọ keme o wo ẹruore no inọ ẹyao riẹ na ọ te seba ekpo ho. Ere ọvona re, ẹruore nọ ma wo inọ Aparadase ọ be tha ọ rẹ lẹliẹ omai thihakọ.
19. Eme ma re ru re Jihova ọ sai fiobọhọ kẹ omai thihakọ ebẹbẹ mai?
19 Kọ eware nọ ma wuhrẹ no na i gbe dhesẹ nọ Jihova o bi fiobọhọ kẹ omai thihakọ? Ere dẹẹ! Olẹ, Ebaibol na, inievo mai, gbe ẹruore mai yọ idhere jọ nọ o bi ro fiobọhọ kẹ omai. Joma hae lẹ, se Ebaibol na ziezi, go kẹle inievo mai, je roro didi kpahe ẹruore mai. Ma te ru ere, Jihova o ti fiobọhọ kẹ omai thihakọ ebẹbẹ mai kpobi bẹsenọ ebẹbẹ na kpobi i ti ro te oba.—Fil. 4:13.
OLE AVỌ 33 Gbolo Owha Ra Kẹ Jihova
a Ma nwene edẹ ahwo jọ nọ ma fodẹ evaọ uzoẹme nana.
b IWOHO NA: Oniọvo nọ ọ kpako no nọ o bi thihakọ ẹbẹbẹ nọ o be rọwo kuhọ họ.
c UWOHO NA: Oniọvo nọ ọ kpako no nọ o bi thihakọ ẹbẹbẹ nọ o be rọwo kuhọ họ.
d UWOHO NA: Oniọvo nọ ọ kpako no nọ o bi thihakọ ẹbẹbẹ nọ o be rọwo kuhọ họ.