Jihova Ọ be Siọ Omai Ba Ha

1-2. (a) Fikieme ma gbe ro roro nọ ma wo ohwo ọvo ho nọ ebẹbẹ i te te omai? (b) Eme ma te ta kpahe evaọ uzoẹme nana?

NỌ EBẸBẸ ilogbo jọ i te te omai, ẹsejọ ma re roro nọ ma wọhọ ohwo nọ ọ rrọ okọ osese evaọ abade ologbo nọ ẹkporo o bi jo fi. Rekọ ma du roro nọ ma wo ohwo ho ho. Keme Ọsẹ obọ odhiwu mai na ọ be ruẹ oware kpobi nọ o be via kẹ omai. Yọ ọ ya eyaa nọ o ti fiobọhọ kẹ omai thihakọ ebẹbẹ na kpobi. Jihova ọ vuẹ idibo riẹ nọ e talamu ei ẹme jọ nọ o rẹ lẹliẹ udu rai dhẹ. Anọ: “Me ti fiobọhọ kẹ owhẹ.”—Aiz. 41:10.

² Ma te jọ uzoẹme nana ta ẹme te idhere ene jọ nọ Jihova o bi ro fiobọhọ kẹ omai. Ọrọ ọsosuọ, o bi su omai. Ọrọ avọ ivẹ, ọ be rẹrote omai. Ọrọ avọ esa, ọ be thọ omai. Ọrọ avọ ene, ọ be sasa omai oma. Jihova ọ vuẹ omai nọ epanọ ẹbẹbẹ nọ o te omai ọ rro te kẹhẹ, ma te thọrọ iẹe ẹro ho. Ọ te siọ omai ba ha. Fikiere ma du roro nọ ma wo ohwo ho ho.

JIHOVA O BI SU OMAI

3-4. Ẹvẹ Jihova o bi ro su omai? (Olezi 48:14)

³ Se Olezi 48:14. Jihova ọ riẹ nọ mai ọvo ma sai su omamai hi. Kọ ẹvẹ o bi ro su idibo riẹ nọ e talamu ei? Eme nọ e rrọ Ebaibol na yọ edhere jọ nọ o bi ro su omai. (Ol. 119:105) Jihova ọ be rọ eme nọ e rrọ Ebaibol na wuhrẹ omai re ma sai ru oware nọ u fo je wo emamọ uruemu. O tẹ whae ze nọ eva e be rọ were omai gaga makọ enẹna, yọ evaọ obaro kọ uzuazọ ebẹdẹ bẹdẹ.a Nẹnẹ na, Jihova o bi wuhrẹ omai nọ ma si ofu no eva, ma ta uzẹme evaọ oware kpobi nọ ma bi ru, re ma je you amọfa no eva mai kpobi ze. (Ol. 37:8; Hib. 13:18; 1 Pita 1:22) Ma te bi gine ru eware yena nọ Jihova o bi wuhrẹ omai na, ma te jọ emamọ ọsẹ hayo emamọ oni, emamọ ọzae hayo emamọ aye, gbe emamọ ogbẹnyusu.

⁴ Oware ofa ona. Jihova o gbiku ahwo jọ fihọ Ebaibol na nọ ebẹbẹ i te oma. Ahwo yena yọ ahwo wọhọ omai re nọ oware o rẹ kẹ uye. (1 Kọr. 10:13; Jem. 5:17) Iku ahwo nọ e rrọ Ebaibol na yọ iku esia ha. Nọ ma te bi se ai, je bi wuhrẹ oware jọ no ai ze, u ti fiobọhọ kẹ omai evaọ idhere ivẹ jọ. Ọrọ ọsosuọ, ma te ruẹ nọ kpakọ oghẹrẹ ẹbẹbẹ nọ o te omai na o te ahwo jọ no re, yọ a sai thihakọ riẹ. (1 Pita 5:9) Ọrọ avọ ivẹ, ma te riẹ oghẹrẹ nọ ma sai ro kru udu ga dede nọ ẹbẹbẹ ọ rrọ otọ kẹ omai.—Rom 15:4.

5. Amono jọ Jihova o bi ro su omai nẹnẹ nọ ma rrọ edhere uzuazọ na?

⁵ Jihova ọ be jẹ rọ inievo mai vuẹ omai oware nọ ma re ru.b Inievo itieye na jọ họ esẹro okogho nọ e rẹ nyaze ti rri omai re a tuduhọ omai awọ. Evuẹ nọ a rẹ kẹ nọ a tẹ nyaze ti rri ukoko mai, e rẹ lẹliẹ ẹrọwọ mai ga, yọ i re si inievo na kpobi kẹle ohwohwo. (Iruẹru 15:40–16:5) Ekpako ukoko omarai a re muẹrohọ oniọvo kpobi evaọ ukoko na re a riẹ epanọ eware e rrọ kẹe. (1 Pita 5:2, 3) Yọ esẹgbini a be rọ Ẹme Ọghẹnẹ wuhrẹ emọ rai re a sai roro eware te ziezi je wo emamọ uruemu. (Itẹ 22:6) Kọ inievo-emetẹ nọ e kpako no nọ i kru ukoko na ga? Ae omarai a bi fi emamọ oriruo hotọ kẹ inievo-emetẹ nọ e gbẹ maha, a rẹ kẹ ae emamọ ohrẹ, yọ a rẹ tuduhọ ae awọ.—Tait. 2:3-5.

6. Nọ Jihova o bi wuhrẹ omai no na, eme u fo nọ ma re ru?

⁶ Whaọ Jihova o bi wuhrẹ omai no, ọ be vuẹ omai oware nọ u fo nọ ma re ru. O bi ru ẹkabọ riẹ no. Kọ omai? Ẹvẹ ma sai ro dhesẹ nọ ma se eware nọ o bi wuhrẹ omai na gboja? Obe Itẹ 3:5, 6 o ta nọ: “Rehọ udu ra kpobi fievahọ Jihova, whọ rẹroso otoriẹ obọra ha.” Ma te ru ere, Jihova o “ti ru idhere [mai] liọ.” Koyehọ o ti ru nọ ma gbẹ te rọ abọ te imu te oma ha, eva e vẹ te ginẹ were omai. Ma yere Jihova gaga nọ o bi ro wuhrẹ omai eware nọ i re fiobọhọ kẹ omai.—Ol. 32:8.

JIHOVA Ọ BE RẸROTE OMAI

7. Eware jọ vẹ Jihova o bi ru kẹ omai rọ rẹrote omai? (Ahwo Filipai 4:19)

⁷ Se Ahwo Filipai 4:19. Orọnikọ ewuhrẹ ọvo Jihova o bi wuhrẹ omai hi. Omoware kpobi nọ ma bi ru re ma sae re eva vọ, ku ewu họ, jẹ ruẹ oria nọ ma rẹ rria, Jihova o bi fi obọ họ iẹe. (Mat. 6:33; 2 Tẹs. 3:12) Mai ahwo-akpọ ma rẹ gwọlọ ruawa kpahe eware yena, yọ orọnọ o thọ họ. Rekọ Jihova ọ be vuẹ omai nọ ma du ruawa eware nana ga hrọ họ. (Mat. 6:25) Fikieme? Keme Jihova Ọsẹ mai na o re fi ahwo nọ a be gọe ziezi hotọ họ nọ ebẹbẹ i te te ai. (Mat. 6:8; Hib. 13:5) Nọ Jihova ọ ta nọ ọ te rẹrote omai na, ma du vro ẹme riẹ na vievie he.

8. Ẹvẹ Jihova o ro fiobọhọ kẹ Devidi?

⁸ Jihova o fiobọhọ kẹ Devidi gaga. Evaọ ikpe buobu, Devidi ọ jẹ dhẹ no oria ruọ oria re a se iẹe ba ekpe. Oke yena kpobi na, Jihova o ru nọ te Devidi te ahwo nọ a jọ kugbei a jẹ rọ ruẹ emu nọ a rẹ re. Uwhremu na nọ Devidi o roro te epanọ Jihova ọ rọ rẹrotei no anwọ emaha riẹ ze, o te kere nọ: “Mẹ jọ ọmaha oke jọ rekọ obọnana mẹ kpako no, rekọ mẹ re ruẹ ohwo okiẹrẹe ọvuọvo nọ a kiukeku hu, hayo ruẹ emọ riẹ nọ e be gwọlọ emu bẹ hẹ.” (Ol. 37:25) Ẹsejọhọ whẹ omara whọ riẹ idibo Jihova nọ i fievahọ iẹe nọ Jihova ọ rẹrote no re.

9. Nọ oghẹrẹ oware jọ o tẹ via kẹ idibo Jihova nẹnẹ, eme Jihova o re ru kẹ ae? (Rri iwoho na re.)

⁹ Jihova ọ rẹ rẹrote idibo riẹ nọ oghẹrẹ oware jọ o tẹ via. Evaọ oke ikọ na, u wo oke jọ nọ ohọo u je ro mu. Ileleikristi nọ e jọ eria avọ eria a te je vi eware se inievo rai nọ eware e jọ gaga kẹ. (Iruẹru 11:27-30; Rom 15:25, 26) Ere idibo Jihova nẹnẹ a re fiobọhọ kẹ ohwohwo re. Nọ oware okpẹtu o tẹ via, Jihova o re ru nọ idibo riẹ a rẹ rọ rehọ emu, ame, iwu, gbe imu ro se ahwo nọ a be rria oria nọ oware na o jọ via na. Oke yena, inievo nọ e rrọ ofẹ ebabọ, a rẹ ruẹrẹ iwou gbe Egwa Uvie nọ e raha. Yọ oware okpẹtu o tẹ nwane via no, inievo na a rẹ tuduhọ inievo nọ eware rai e raha na awọ re a kru udu ga jẹ gọ Jihova vrẹ.c

10-11. Eme whọ jọ iku Borys na wuhrẹ?

¹⁰ Ahwo nọ a maki ri mu Jihova họ ẹgọ họ, Jihova ọ rẹ rẹrote ae re. Ma rẹ rọ aro kele Jihova. Ma rẹ gwọlọ epa kpobi nọ ma re ro fiobọhọ kẹ ahwo nọ a rrọ ukoko na ha. (Gal. 6:10) Obọ nọ ma fihọ kẹ ahwo otiọye na o rẹ lẹliẹ ibuobu rai gwọlọ nọ a re wuhrẹ kpahe Jihova. Ere a fiobọhọ kẹ ọzae jọ nọ ọ rrọ Osẹri Jihova ha nọ a re se Borys nọ ọ be rria obọ Ukraine. Ọzae na yọ ohwo nọ o wuzou isukulu. Emọ nọ e rrọ Isẹri Jihova evaọ isukulu na, ọzae na ọ jẹ hae riẹ ae ru. Ọ jẹ hae gba ae họ re a ru eware nọ i ti kpokpo udu rai hi. Nọ ẹmo obọ Ukraine na ọ ga te oria no, Borys ọ tẹ ta nọ ọ rẹ dhẹ kpohọ ofẹ nọ ẹmo na ọ jọ ga tere he evaọ orẹwho na, yọ inievo na a fiobọhọ kẹe. Uwhremu na ọzae na o te kuomagbe inievo na ru Ekareghẹhọ uwhu Jesu. Uwhremu na ọ ta nọ: “Isẹri Jihova a rẹrote omẹ, yọ a fiobọhọ kẹ omẹ gaga. Oware nọ a ru kẹ omẹ na o da omẹ ẹro fia.”

¹¹ Jihova Ọsẹ mai nọ ọ rẹ re ohrọ ohwo gaga na o re fiobọhọ kẹ ahwo nọ ẹbẹbẹ o te oma. Ere u fo nọ ma re fiobọhọ kẹ inievo ukoko na gbe ahwo nọ a ri mu Jihova họ ẹgọ họ. (Luk 6:31, 36) Ma be lẹ nọ obọ nọ ma bi fihọ kẹ ahwo otiọye na u duobọte ae udu re a jọ ilele Jesu. (1 Pita 2:12) Rekọ a gbẹ maki kurẹriẹ ze he, eva e rẹ were omai gaga fikinọ ma bi fiobọhọ kẹ amọfa.—Iruẹru 20:35.

JIHOVA Ọ RẸ THỌ OMAI

12. Oghẹrẹ vẹ Jihova ọ te rọ thọ idibo riẹ kpobi? (Olezi 91:1, 2, 14)

¹² Se Olezi 91:1, 2, 14. Jihova ọ ta nọ ọ te thọ omai idibo riẹ nẹnẹ re oware ovo o gbẹ raha usu mai avọ iẹe hẹ. Ọ te kẹ Setan uvẹ re ọ rehọ iwuhrẹ erue gbe iruemu etọtọ raha ukoko na ha. (Jọn 17:15) Okenọ “uye ulogbo na” u te muhọ no, orọnikọ eware nọ e rẹ raha usu mai avọ Jihova ọvo ọ te thọ omai no ho. Rekọ ọ te thọ idibo riẹ kpobi wọhọ epanọ ọ ta nọ o ti ru, a vẹ te zọ. Ma fi eva mai kpobi họ iẹe.—Evia. 7:9, 14.

13. Oghẹrẹ vẹ Jihova ọ be rọ thọ odibo riẹ kpobi?

¹³ Oghẹrẹ vẹ Jihova ọ be rọ thọ odibo riẹ kpobi nẹnẹ? Jihova ọ rọ Ẹme riẹ wuhrẹ omai no. U te ru nọ ma rọ riẹ oware nọ u woma gbe onọ u yoma. (Hib. 5:14) Ma te bi ru eware nọ Jihova ọ be rọ Ebaibol wuhrẹ omai na, ma re ru eware nọ e rẹ wha uye se omai hi. Yọ ma re ru eware nọ e rẹ raha usu mai avọ Jihova ha. (Ol. 91:4) Jihova ọ be jẹ rọ inievo ukoko na thọ omai re. (Aiz. 32:1, 2) Ẹvẹ ma rọ ta ere? Keme nọ ma tẹ be hai kuomagbe inievo nọ i you Jihova je bi koko izi riẹ, emamọ eme nọ a te ta ze gbe emamọ uruemu rai, o rẹ lẹliẹ omai kru udu ga. U re je ru nọ ma gbẹ rọ kẹ oware ovo uvẹ re o raha usu mai avọ Jihova ha.—Itẹ 13:20.

14. (a) Fikieme Jihova ọ rẹ rọ kuvẹ ẹsejọ re edawọ i te idibo riẹ? (b) Eme Olezi 9:10 o ta nọ Jihova o ti ru hu? (Je rri ẹme-obotọ na re.)

¹⁴ Evaọ oke anwae, Jihova ọ thọ idibo riẹ jọ nọ oware uyoma o gbẹ rọ via kẹ ae he. Rekọ orọnọ uye kpobi Jihova ọ thọ rai no ho. Ẹsejọ “eware nọ a rẹro rai hi” e rẹ sae via kẹ omai. (Ọtausi. 9:11) U te no ere no, who te se iku idibo Ọghẹnẹ no oke anwae ze, whọ rẹ ruẹ nọ ẹsejọ Jihova ọ kuvẹ nọ a gboja kẹ idibo riẹ je kpe ejọ no dede. Jihova ọ kuvẹ yena re nọ a je kru ẹrọwọ rai te urere, a ve dhesẹ nọ Ẹdhọ yọ ọtọrue. (Job 2:4-6; Mat. 23:34) Nẹnẹ na re, Jihova ọ rẹ nwane thọ omai no oware uyoma kpobi hi. Nọ ẹbẹbẹ jọ o te te omai, ẹsejọhọ Jihova ọ te nwani si ẹbẹbẹ na no ho. Rekọ joma riẹ nọ ọ te siọ ahwo nọ i you rie ba vievie he.d—Ol. 9:10.

JIHOVA Ọ RẸ SASA OMAI OMA

15. Ma tẹ be lẹ se Ọghẹnẹ, bi se Ẹme riẹ, je bi go kẹle inievo na, ẹvẹ u re ro fiobọhọ kẹ omai? (2 Ahwo Kọrint 1:3, 4)

¹⁵ Se 2 Ahwo Kọrint 1:3, 4. Ẹsejọ ma re weri, ma rẹ ruawa ẹsejọ, hayo ẹbẹbẹ ọfa ọ sai te omai. Ẹsejọhọ ma be ta ẹme na, who wo ẹbẹbẹ jọ nọ o soriẹ ze nọ who bi ro roro nọ who gbe wo ohwo ho. Kọ ohwo jọ ọ riẹ epanọ oware na o be kẹ owhẹ uye te? Jihova ọ riẹ epanọ o be kẹ owhẹ uye te. Nọ oware jọ o tẹ be kẹ omai uye, Jihova ọ rẹ riẹ epanọ o be kẹ omai uye te, yọ “ọ rẹ sasa omai oma evaọ edawọ mai kpobi.” Ẹvẹ ọ rẹ rọ sasa omai oma? Ma tẹ lẹ se Jihova gaga kpahe oware nọ o be kẹ omai uye, “udhedhẹ Ọghẹnẹ nọ u vi otoriẹ kpobi” na u re te omai obọ. (Fil. 4:6, 7) Ma te bi se eme nọ Ọghẹnẹ ọ jọ Ebaibol vuẹ omai, e rẹ sasa omai oma. Eme riẹ i re ru nọ ma rẹ rọ ruẹ nọ o you omai, yọ ma wo ẹruore inọ uye na u ti kuhọ. E rẹ jẹ lẹliẹ omai wo areghẹ nọ ma re ro ru oware nọ u fo. Oma o rẹ jẹ sasa omai re nọ ma te kuomagbe inievo mai evaọ obọ ewuhrẹ je bi yo eme nọ a be ta no Ebaibol ze.

16. Eme whọ jọ iku Nathan avọ Priscilla na wuhrẹ?

¹⁶ Oware nọ o via kẹ oniọvo jọ nọ a re se Nathan avọ aye riẹ Priscilla u dhesẹ nọ Jihova ọ rẹ ginẹ rọ Ẹme riẹ sasa omai oma. Aimava na a be rria United States. Evaọ ikpe jọ nọ e vrẹ, a tẹ ta nọ a rẹ kwa kpohọ oria nọ a jọ gwọlọ iwhowho-uvie gaga. Nathan ọ ta nọ: “Nọ ma jẹ nya na, ma fievahọ Jihova inọ ọ te rẹrote omai.” Rekọ nọ a ti te obei no, ẹyao ọ tẹ jẹ lahiẹ ae gaga, yọ ugho o gbẹ jarae obọ tere he. A rẹro nọ eware e te nya ere he. A te dhugbe zihe kpo. Rekọ nọ a maki kpo no, eware e gbẹ jarae oma gaga. Uwhremu na, Nathan ọ ta nọ: “Ma je roro nọ Ọghẹnẹ o ti ru nọ eware e te rọ riẹ nya kẹ omai. Rekọ eware e nya ere he. U te epanọ me je ro roro nọ, ‘Kọ mẹ raha uzi jọ?’” Nọ oke o be nya na, a tẹ te ruẹ nọ Ọghẹnẹ ọ nyase ae ba ha. Nathan ọ ta nọ: “Eware e jọ gaga oke yena. Rekọ Ebaibol nọ ma je se u fiobọhọ kẹ omai gaga. Etẹe ma jẹ jọ ruẹ emamọ ehrẹ gbe eme nọ e jẹ sasa omai oma. Ma je roro kpahe epanọ Jihova o ro fiobọhọ ke omai thihakọ ẹbẹbẹ na, orọnikọ nwanọ ẹbẹbẹ na ọvo ma je roro kpahe he. O lẹliẹ omai kru udu ga inọ ẹbẹbẹ ọfa kpobi nọ o te omai, Jihova ọ rrọ kugbe omai.”

17. Oghẹrẹ vẹ Jihova ọ rọ sasa oniọvo-ọmọtẹ jọ nọ a re se Helga oma? (Rri uwoho na re.)

¹⁷ Inievo mai a rẹ sasa omai oma re. Evaọ oghẹrẹ vẹ? U wo oniọvo jọ nọ a re se Helga nọ ọ be rria obọ Hungary. Ebẹbẹ buobu i te rie evaọ ikpe buobu, yọ i ru nọ o je ro rri omariẹ nọ o fioka ha. Rekọ nọ o rri eware na kpobi, ọ tẹ ruẹ nọ Jihova ọ rọ inievo na sasa iẹe oma. O kere nọ: “Ẹsejọ fiki iruo mẹ gbe ọmọ mẹ nọ ọ jẹ mọ, gbe ebẹbẹ efa, me re wo ẹgba nọ me re ro ru oware ovo ho. Rekọ ẹsikpobi nọ me gbe wo ẹgba ọvo ho, Jihova ọ jẹ hai fiobọhọ kẹ omẹ. Anwọ ikpe ọgba ena nọ Jihova ọ be rọ sasa omẹ oma wọhọ epanọ ọ ta nọ o ti ru na. Ọ re siọ omẹ ba ha, makọ ẹdẹ ọvo dede. Ẹsibuobu emamọ ẹme nọ inievo na a rẹ ta kẹ omẹ, oye Jihova ọ rẹ rọ sasa omẹ oma. Ẹsibuobu a rẹ rọ ifonu vi uwou se omẹ, a re vi ekade se omẹ, yọ a re jiri omẹ. Yọ nwanọ oware nọ o te ta omẹ udu ga oke yena oye.”

18. Ẹvẹ ma sae rọ sasa ahwo oma?

¹⁸ Ma tẹ be sasa ahwo oma, yọ Jihova ma be rọ aro kele na. Kọ ẹvẹ ma sai ro ru ei? Ma rẹ romatotọ gaviezọ kẹ ae nọ a tẹ be ta ẹme. Ma rẹ ta ẹme nọ u re ru udu te ae otọ, ma ve je ru eware jọ ro fiobọhọ kẹ ae. (Itẹ 3:27) Makọ ahwo nọ a ri mu Jihova họ ẹgọ họ dede, ma rẹ sasa ae oma re nọ uye jọ u te te ae oma. Ẹsejọhọ ahwo otiọye na a bi weri, hayo a be mọ, hayo a be ruawa fiki oware jọ. Ma rẹ sae nyabru ae, gaviezọ kẹ ae ziezi jẹ ta ẹme no Ebaibol ze nọ ọ rẹ sasa ae oma. Ma tẹ be rọ aro kele Jihova “Ọghẹnẹ omosasọ kpobi” na, ma ti fiobọhọ kẹ inievo mai nọ a te sai ro kru udu ga dede nọ ebẹbẹ i bi te ae. Yọ o sai ru nọ ahwo nọ a be gọ Jihova ha a re ro kurẹriẹ ze te gọe.—Mat. 5:16.

JIHOVA Ọ RẸ SIỌ OMAI BA HA

19. Eme Jihova o re ru kẹ omai, kọ ẹvẹ ma sae rọ rehọ aro kele iei?

¹⁹ Jihova o you ahwo kpobi nọ a you rie. Ọ rẹ siọ omai ba ha nọ ẹbẹbẹ o te te omai oma. Ọsẹ hayo oni nọ o you ọmọ riẹ ọ rẹ rẹrotei. Ere Jihova ọ be rẹrote idibo riẹ nọ e be gọe ziezi. O bi su omai, ọ be rẹrote omai, ọ be thọ omai, yọ ọ be sasa omai oma. Ma tẹ be hai fiobọhọ kẹ ahwo nọ ẹbẹbẹ o te oma jẹ ta ae udu ga, yọ Ọsẹ oyoyou mai na ma be rọ aro kele na. Ma riẹ nọ ebẹbẹ e rẹ siọ omai ba ete he. Rekọ jọ o thọrọ omai ẹro ho inọ Jihova ọ rrọ kugbe omai. Ọ vuẹ omai nọ: “Jọ ozọ u mu owhẹ hẹ, keme mẹ rrọ kugbe owhẹ.” (Aiz. 41:10) Udu o rrọ omai awọ fiki ẹme yena. Ma riẹ nọ Jihova ọ te siọ omai ba vievie he.