Ma Rri Uvẹ-Ọghọ Sa-Sa nọ Ma Wo Ghaghae!
1 No emuhọ ikuigbe ohwo-akpọ ze, Jihova ọ kẹ idibo riẹ oghẹrẹ uvẹ-ọghọ sa-sa no. Ọ kẹ rae uvẹ-ọghọ sa-sa ghelọ oghẹrẹ uyero rai, makọ te ezae te eyae, te emaha te ekpako. (Luk 1:41, 42; Iruẹru 7:46; Fil. 1:29) Kọ uvẹ-ọghọ sa-sa vẹ ọ k’omai nẹnẹ?
2 Uvẹ-Ọghọ Sa-Sa Jọ nọ Ma Wo: Ma wo uvẹ-ọghọ nọ Jihova o bi ro wuhrẹ omai. (Mat. 13:11, 15) Ujiro nọ ma rẹ kẹ Jihova evaọ iwuhrẹ ukoko ẹkwoma iyo nọ ma rẹ kẹ yọ uvẹ-ọghọ ofa jọ nọ ma wo. (Ol. 35:18) Nọ uvẹ u te rovie fihọ nọ ma rẹ rọ kpahe ẹme, ma re ru ei avọ ọwhọ. Ere ọvona re, ma te rri ẹme hayo iruo kpobi nọ a k’omai evaọ ukoko na wọhọ uvẹ-ọghọ, ma re ru ei te epanọ ẹgba mai o mu kpobi. Kọ ma be hai wobọ evaọ uvẹ-ọghọ erufuọ gbe ẹruorote Ọgwa Uvie na?
3 Dede nọ u re gbe ahwo buobu unu sọ Ọghẹnẹ ọ be kezọ kẹ elẹ rai, ma be reawere uvẹ-ọghọ nọ Ọnọ ọ mai Kpehru Kpobi evaọ ehrugbakpọ ọ be rọ kezọ kẹ elẹ mai. (Itẹ 15:29) Jihova omariẹ ọ rẹ kezọ kẹ elẹ idibo riẹ, ọ rehọ iruo yena kẹ omọfa jọ họ. (1 Pita 3:12) O fi ọnyaba họ epanọ ma rẹ lẹ sei kpekpe te he. Uvẹ-ọghọ nọ ma wo o rro kẹhẹ nọ ma sae rọ lẹ evaọ oke kpobi!—Ẹf. 6:18.
4 ‘Ibe Iruiruo Ọghẹnẹ’: Uvẹ-ọghọ obọdẹ jọ nọ ma wo họ orọ ewhowho emamọ usi Uvie Ọghẹnẹ wọhọ ‘ibe iruiruo Ọghẹnẹ.’ (1 Kọr. 3:9) Iruo nana yọ iruo nọ e rẹ kẹ evevọwẹ gbe omosasọ. (Jọn 4:34) Orọnikọ o gba Jihova họ nọ ahwo-akpọ o re ro ru iruo na ha, rekọ fiki uyoyou nọ o wo k’omai ọ rọ k’omai iruo nana. (Luk 19:39, 40) O make rrọ ere na, Jihova ọ rọ uvẹ-ọghọ nana kẹ ahwo kpobi hi. O gwọlọ nọ ahwo nọ a re wobọ evaọ odibọgba ẹgbede na a rẹ nyate itee abọ-ẹzi jọ, jẹ ruabọhọ onana evaọ uzuazọ rai. (Aiz. 52:11) Kọ ma bi dhesẹ nọ ma rri uvẹ-ọghọ nana ghaghae ẹkwoma usiuwoma ota na nọ ma fihọ abọjọ iruo ẹkpoka mai?
5 Uvẹ-ọghọ kpobi nọ u no obọ Jihova ze o rẹ wha oghọghọ se omai. (Itẹ 10:22) Who rri rai vo vievie he! Ma te bi dhesẹ nọ ma rri uvẹ-ọghọ kpobi nọ ma wo evaọ egagọ Jihova ghaghae, ma re ru eva were Ọsẹ obọ odhiwu mai, Ọnọ ọ rẹ kẹ ‘okẹ uwoma kpobi avọ okẹ nọ o gba kiete’ na.—Jem. 1:17.