Ileta Nọ Utu Ẹruorote Na U Kere Ze

Ibe Iwhowho-Uvie Eghaghae:

Uvẹ-ọghọ ulogbo o rrọ nọ mai kpobi ma be rọ rehọ okugbe gọ Jihova, Ọghẹnẹ uzẹme ọvo na! Mai yọ “ibe iruiruo” riẹ, nọ ọ kẹ iruo nọ e rrọ ọrẹri nọ i re siwi uzuazọ, iruo usi uwoma ota gbe ahwo nọ ma re wuhrẹ kpahe Uvie riẹ nọ o ro mu no. (1 Kọr. 3:9; Mat. 28:19, 20) Re ma sae rọ udhedhẹ gbe okugbe ru iruo nana evaọ akpọ-soso, ma rẹ jọ ahwo nọ a kokohọ ziezi.—1 Kọr. 14:40.

Obe nana u ti fiobọhọ kẹ owhẹ riẹ oghẹrẹ nọ ukoko Ileleikristi na u bi ro ruiruo nẹnẹ. O ta kpahe uvẹ-iruo sa-sa gbe ewha-iruo nọ who wo nọ whọ rrọ omọvo Isẹri Jihova na. Who te rri uvẹ-iruo ra ghaghae je bi ru iruo ra ziezi, whọ te “jọ gaga evaọ ẹrọwọ na.”—Iruẹru 16:4, 5; Gal. 6:5.

Fikiere, ma be tuduhọ owhẹ awọ nọ whọ romatotọ se obe nana. Daoma fi eme nọ e riẹe eva họ iruo evaọ uzuazọ ra. Wọhọ oriruo, otẹrọnọ who zihe ruọ owhowho-uvie nọ ọ re họ-ame he obọ, eme who re ru hrọ re whọ họ-ame wọhọ omọvo Isẹri Jihova? Kọ otẹrọnọ whọ họ-ame no, eme whọ sai ru re whọ gbẹ nyaharo evaọ usu ra kugbe Jihova je ru odibọgba ra kẹre? (1 Tim. 4:15) Eme who re ru re udhedhẹ ukoko na o gbẹ jariẹ? (2 Kọr. 13:11) Gwọlọ iyo enọ nana evaọ obe nana.

Otẹrọnọ whẹ yọ oniọvo-ọmọzae nọ ọ họ-ame no, eme whọ rẹ sai ru re who te odibo oruiruo, kẹsena who ve te ọkpako? Nọ idu ahwo buobu a bi zurie ziọ ukoko Ọghẹnẹ na, ma gwọlọ inievo-emezae nọ i te nọ e rẹ sae rẹrote eware evaọ ukoko na. Obe nana u ti fiobọhọ kẹ owhẹ riẹ oware nọ ohwo o re ru nọ ọ tẹ “be daoma re o te” kẹ uvẹ-iruo nana.—1 Tim. 3:1.

Ma be lẹ gaga inọ obe nana u fiobọhọ kẹ owhẹ ruẹ abọ nọ who wo evaọ ọruẹrẹfihotọ Jihova je rri rie ghaghae. Ma you owhai kpobi gaga jẹ be hae lẹ inọ wha te jọ usu ahwo nọ a te rọ oghọghọ gọ Jihova ọsẹ obọ odhiwu mai bẹdẹ bẹdẹ.—Ol. 37:10, 11; Aiz. 65:21-25.