Ma rẹ Yọrọ Ajọwha Mai kẹ Odibọgba na Hrọ
1 Kukpe kukpe anwọ 1992 ze, Isẹri Jihova a be raha vrẹ ehwa ima odu-ọvo rọ ta usiuwoma Uvie na je ru ilele evaọ akpọ soso. O rrọ oware evawere k’omai gaga nọ mai omomọvo ma ro ru ọvuọ ẹmẹkabọ riẹ evaọ iruo ilogbo eyena!—Mat. 28:19, 20.
2 Rekọ, uyere gbe ujiro kpobi u te Jihova ọnọ o fiobọhọ jẹ jọ odibọgba mai thomai evaọ ‘oke obẹbẹ’ nana. (2 Tim. 3:1) Eme o gwọlọ mi omai, otẹrọnọ ma rẹ ruabọhọ iruo obọdẹ nana avọ ajọwha?
3 Oware nọ U re Ru Omai Wo Ajọwha: Uyoyou udidi kẹ Ọghẹnẹ gbe ọrivẹ, jegbe isiuru nọ i no omai udu ze nọ ma rọ gwọlọ rria te omarọkẹ mai, o be w’omai wo ajọwha evaọ iruo Uvie na. (Mat. 22:37-39; 1 Jọn 5:3) Uyoyou o be lẹliẹ omai kpairoro vrẹ eware jọ evaọ uzuazọ re ma sai wobọ vọvọ evaọ iruo usiuwoma ota na.—Luk 9:23.
4 Daoma Yọrọ Ajọwha Ra: Ọwegrẹ mai na Ẹdhọ ọ be dawo ẹgba riẹ kpobi re o whrehe ajọwha mai evaọ odibọgba na. Ahwo nọ a rrọ ẹkwotọ mai nọ a bi dhesẹ isiuru kpahe ovuẹ mai hi, isiuru eware akpọ nana, awaruọ epanọ ma sae rọ re eva vọ kẹdẹ kẹdẹ, gbe awaruọ kpahe oghẹrẹ eyao sa-sa nọ ma be mọ yọ umutho eware jọ nọ Setan ọ be rọ gwọlọ whrehe ajọwha mai.
5 Fikiere, ma rẹ daoma ziezi re ma yọrọ ajọwha mai. U wuzou re ma ru “uyoyou ọsosuọ” nọ ma wo na ga ziezi. Re ma sai ru ere, o gwọlọ nọ ma re se Ebaibol na je roro didi kpahe iẹe ẹsikpobi, jẹ rọ oma kẹ eruẹrẹfihotọ abọ-ẹzi kpobi nọ ‘ọrigbo nọ o wo ẹrọwọ avọ areghẹ na’ o ru.—Evia. 2:4; Mat. 24:45; Ol. 119:97.
6 Wọhọ epanọ eruẹaruẹ Ebaibol i dhesẹ vevẹ, ẹdẹ nọ Jihova ọ te raha ahwo nọ a rrọ eriẹ hẹ ọ be tha kpata kpata. (2 Pita 2:3; 3:10) Nọ ma riẹ ere na, joma daoma ziezi re ma yọrọ ajọwha mai kẹ odibọgba na, wobọ vọvọ evaọ ewhowho ovuẹ Uvie na gbe iruo ilele-iruo nọ e be nyaharo evaọ akpọ soso na!