Kọ Whọ te rọ Aro Kele Ọwhọ Jihova avọ Jesu Evaọ Ezi Ekareghẹhọ Na?

1. Eme Isẹri Jihova a be hae daoma ru evaọ etoke Ekareghehọ?

¹ Jihova ọ rẹ rọ ọwhọ ru ẹjiroro riẹ gba. Nọ Ebaibol ọ jẹ ta kpahe eghale jọ nọ Uvie Ọghẹnẹ o te wha ze, obe Aizaya 9:7 o ta nọ: “Ogaga ỌNOWO Ogba-ẹmo o ti ro ru onana.” Epọvo na re, evaọ okenọ Ọmọ Ọghẹnẹ ọ jọ otọakpọ, o dhesẹ ọwhọ ọgaga kẹ egagọ uzẹme. (Jọn 2:13-17; 4:34) Evaọ etoke Ekareghẹhọ nọ ma re ru kukpe kukpe na, iwhowho-uvie buobu evaọ akpọ na soso a be hae daoma rọ aro kele ọwhọ Jihova avọ Jesu ẹkwoma usiuwoma ota na nọ a be jọ w’obọ ziezi. Kọ whọ te jọ usu rai?

2. Eme ọwhọ ọ te wọ omai ru muhọ no Asa 7 vrẹ?

² Uzizie Ekareghẹhọ Na: Evaọ ukpe nana, ma ti mu uzizie Ekareghẹhọ na họ evaọ Asa 7 nọ u kie fihọ Ẹdẹ-Ọmaha. Mu oma họ ẹruẹrẹhọ obọnana re whọ rọ ọwhọ ta usiuwoma na. O te jọ etoke evawere kẹ ikoko kpobi nọ a te daoma rọ ọwhọ ru ẹkwotọ rai re na. Ruẹ nọ whọ daoma zizie emọ-uwuhrẹ Ebaibol, izihebro, ahwo nọ wha gbẹ rrọ iruo, imoni, gbe ibe emọ-isukulu ra ẹkwoma obe-uzizie nọ whọ rẹ kẹ ae hayo jw.org nọ who re ro ru ei.

3. Ẹvẹ ma sai ro fiba oke usiuwoma ota mai evaọ Asa gbe Ane?

³ Ọkobaro Obufihọ: Ọwhọ ọ te jẹ wọ omai fiba oke usiuwoma ota mai. Ababọ avro, iwhowho-uvie buobu a ti ru ọkobaro obufihọ euwa 30 evaọ Asa hayo Ane. Jọ etoke egagọ uviuwou hayo uwuhrẹ omobọ ra lẹ se Jihova kpahe onana. (Itẹ 15:22) Ọwhọ mai o rẹ lẹliẹ amọfa wo ọwhọ. Who te gbobọnẹ eware jọ re whọ sai fiba oke usiuwoma ota ra, u re dhesẹ nọ whọ be rọ aro kele ọwhọ Jesu.—Mak 6:31-34.

4. Eghale vẹ i ti te omai nọ ma tẹ rọ aro kele ọwhọ Jihova avọ Jesu?

⁴ Ma tẹ rọ aro kele ọwhọ Jihova avọ Jesu evaọ ezi Ekareghẹhọ na, ma ti wo eghale buobu. Ahwo buobu a te gaviezọ kẹ usiuwoma na. Ma te ruẹ evawere gbe evevọwẹ nọ i re no Ọghẹnẹ ọgọ ze gbe amọfa nọ ma re fiobọhọ kẹ. (Iruẹru 20:35) Mai wuzou na, eva e te were Ọghẹnẹ mai nọ ọ vọ avọ ọwhọ na gbe Ọmọ riẹ.