Mai Kpobi Ma Wo Oware Jọ nọ Ma rẹ Sae Kẹ Jihova
1 Kọ whọ riẹ nọ ahwo-akpọ a wo oware jọ nọ a rẹ sae kẹ Ọghẹnẹ? Ebẹle, ọ rehọ emamọ erao riẹ jọ ro dhidhe kẹ Jihova, yọ Noa gbe Job a dhe ọkpọ idhe itieye re. (Emu. 4:4; 8:20; Job 1:5) Evaọ uzẹme, orọnikọ idhe itieye na i ru Ọghẹnẹ fe evaọ edhere jọ họ, keme Ọghẹnẹ o wo eware kpobi. Rekọ idhe na i dhesẹ uyoyou udidi nọ ezae ẹrọwọ enana a wo kẹ Ọghẹnẹ. Nẹnẹ, ma rẹ sae rehọ oke mai, ẹgba mai, gbe ekwakwa abọ-iwo mai rọ kẹ Jihova “okẹ iwẹegọ ejiro.”—Hib. 13:15.
2 Oke Mai: Oware uwoma o rrọ re ma bru oke nọ ma rẹ raha fihọ eware nọ i wuzou tere he kpẹre, re ma sai wobọ ziezi evaọ odibọgba na. (Ẹf. 5:15, 16) Ma sae jọ omaa mai ru inwene re ma sai ru ọkobaro obufihọ amara ọvo hayo bu viere evaọ ukpe. Ma sae jọ odibọgba na raha oke theri vi epaọ ọsosuọ. Ma tẹ be raha iminiti 30 ba oke nọ ma be hae raha koka koka vẹre, koyehọ ma te rọ euwa ivẹ fiba oke nọ ma be hae jọ usiuwoma ota na raha evaọ amara.
3 Ẹgba Mai: Re ma wo ẹgba nọ ma rẹ rọ ta usiuwoma, o gwọlọ nọ ma rẹ whaha erozaha oma-uru-jaja gbe iruo nọ e rẹ lẹliẹ oma rrọ omai vrẹ ẹta nọ ma gbẹ sae rọ ẹgba mai kpobi ro ru iruo Jihova ha. O tẹ jẹ gwọlọ nọ ma siọ awaruọ nọ ọ rẹ sai ru omai jọ ọkọkora ba, onọ u re mi omai ẹgba nọ ma rẹ sae rọ gọ Ọghẹnẹ no. (Itẹ 12:25) O tẹ make rọnọ ma wo ugogo ẹjiroro jọ nọ ma rẹ rọ ruawa, oware nọ o mai woma họ, ‘ma re gbolo owha mai kẹ Jihova.’—Ol. 55:22; Fil. 4:6, 7.
4 Ekwakwa Abọ-Iwo Mai: Ma sae jẹ rehọ ekwakwa abọ-iwo mai rọ tha iruo usiuwoma ota na uke. Pọl ọ tudu họ ibe Ileleikristi awọ nọ a hae ‘ruẹrẹ oware jọ kpahe’ kẹse kẹse nọ a sai ro fi obọ họ kẹ enọ i wo ẹgwọlọ. (1 Kọr. 16:1, 2) Epọvo na re, ma rẹ sai fi unuigho jọ họ nọ ma re ro ru unevaze kẹ ẹgwọlọ ukoko gbe iruo akpọ-soso na. Utho ugho hayo oware kpobi nọ ma ro ru unevaze o rẹ da Jihova ẹro.—Luk 21:1-4.
5 Jihova ọ kẹ omai eware buobu no. (Jem. 1:17) Ma re dhesẹ edẹro mai ẹkwoma oke mai, ẹgba, gbe ekwakwa abọ-iwo mai nọ ma rẹ rọ gọe no eva ze. Ere nọ ma re ru o rẹ were Jihova, “keme Ọghẹnẹ o re you ohwo nọ ọ rẹ kẹ okẹ-evawere.”—2 Kọr. 9:7.