Wha Tudu họ Ohwohwo Awọ nọ Wha Tẹ Rrọ Usiuwoma
1 O rẹ were omai kpobi nọ a tẹ ta eme uduotahawọ kẹ omai eva ẹruoke. (Itẹ 25:11) Nọ ma tẹ rrọ usiuwoma kugbe amọfa, ẹvẹ ma sae rọ ruẹ nọ ẹmeọta mai ọ be tudu họ ai awọ?
2 Eme Uduotahawọ: Nọ ma tẹ rrọ usiuwoma, o rẹ kẹ uduotahawọ nọ ma tẹ be ta eme nọ i kpomahọ eware abọ-ẹzi. (Ol. 37:30) Ma sae ta kpahe uzoẹme nọ ma te rọ ta usiuwoma hayo gbiku eware ọbọga jọ nọ ma reawere rai evaọ usiuwoma ota kẹle. (Iruẹru 15:3) Kọ u wo oware jọ nọ o were omai nọ ma se ku evaọ isase Ebaibol obọmai, emagazini nọ i kpozi kẹle na, hayo nọ ma jọ eva iwuhrẹ ukoko gaviezọ kẹ? Ma sae ta kpahe eware jọ nọ a ta eva ovuẹ ogbotu nọ ma gaviezọ kẹ kẹle na eva Ọgwa Uvie.
3 Udu o rẹ sai whrehe omai nọ ohwo nọ ma be ta usiuwoma kẹ ọ tẹ kpahe ẹme nọ o re bruẹme dhe rekọ ma sae kpahe ẹme ọvo kẹe he. Nọ ma te no uwou na no, o rẹ kẹ erere nọ ma tẹ rehọ iminiti jọ kakao ro lele ọrivẹ mai t’ẹme kpahe epanọ ma re ru nọ ma tẹ nyaku uyero utioye na evaọ obaro, ma sai rri omobe na Epanọ A ro Muhọ Jẹ Ruabọhọ Ebaibol E rọ Jiroro. Nọ ma te jiri ohwo nọ ma gbẹ rrọ usiuwoma ota fiki oghẹrẹ nọ ọ rọ ta usiuwoma nọ o were omai, o rẹ sae kẹe uduotahawọ.
4 Kake Jowọ Na: Kọ ahwo jọ a rrọ utu uwuhrẹ obe ukoko mai nọ ma ri kuomagbe kpohọ usiuwoma kẹle he? Nọ who te zizie omọfa jọ re o kuomagbe owhẹ kpohọ usiuwoma ota, o rẹ sai rovie uvẹ fihọ nọ wha rẹ rọ tudu họ ohwohwo awọ. (Rom 1:12) Eva e rẹ were ekobaro obufihọ gbe erọ oke-kpobi nọ a tẹ ruẹ amọfa nọ a re lele kpohọ usiuwoma ota, maero evaọ ohiohiẹ hayo ubrobọ owọwọ nọ umutho iwhowho-uvie jọ ọvo a re kpohọ usiuwoma na. Ma sae tha ekobaro na uke ẹkwoma usiuwoma nọ ma re lele ai nya. Kọ owhowho-uvie jọ ọ riẹ nọ ẹyao ọ be hae kẹ uye nọ ọ gbẹ be sai wobọ ziezi evaọ odibọgba na ha? Ma te ru ọruẹrẹfihotọ re o lele omai kpohọ obe-uwuhrẹ Ebaibol mai, o rẹ sai fi obọ họ.—Itẹ 27:17.
5 Eme ovuhumuo gbe ujiro nọ a rẹ kẹ ohwo makọ evaọ eware esese, o rẹ sae kẹ uduotahawọ. Ma rẹ kareghẹhọ oyena nọ ma tẹ rrọ usiuwoma kugbe amọfa, nọ orọnọ ma gwọlọ ‘hẹ wha ohwohwo udu ga na.’—1 Tẹs. 5:11