Hae Ta Ẹme Kugbe Ohwo nọ Wha Gbẹ Rrọ Usiuwoma
1. Ẹvẹ ma sae rọ rehọ aro kele Pọl ukọ na nọ ma tẹ rrọ kugbe oniọvo jọ evaọ usiuwoma?
1 Pọl ukọ na o rri oke nọ ọ rẹ raha kugbe inievo na wọhọ oke nọ a re ro “wo oma osasọ kugbe.” (Rom 1:12) Nọ whẹ avọ owhowho-uvie jọ wha tẹ rrọ usiuwoma, kọ whọ be hae rọ oke yena tuduhọ iẹe awọ je fi obọ họ kẹe? Ukpenọ who re mu unu họ, daoma ta kpahe eware nọ i bi fi obọ họ kẹ owhẹ ta usiuwoma na ziezi.
2. Ẹvẹ ma sai ro fi obọ họ kẹ oniọvo nọ ma gbẹ rrọ usiuwoma wo udu, kọ fikieme onana o rọ roja?
2 Fi Obọ Họ kẹ Amọfa Wo Udu: Udu o rẹ nyawo iwhowho-uvie buobu nọ a tẹ rrọ usiuwoma, yọ o rẹ sai dhesẹ oma via evaọ ovao hayo uvou rai. Ma rẹ sai fi obọ họ kẹ ae wo udu nọ ma te bi jiri ai. Eware efa vẹ ma rẹ sai ru ro fi obọ họ kẹ ae wo udu? Ọsẹro ọnyawariẹ jọ ọ rẹ ta kẹ ohwo nọ a gbẹ rrọ usiuwoma inọ ozọ u re mu ọyomariẹ gbe nọ ọ rẹ le se Jihova ẹsikpobi re o fi obọ họ kẹe whaha ozodhẹ na. Oniọvo ọfa ọ fodẹ oware nọ u re fi obọ họ kẹe wo udu, ọ ta nọ: “Mẹ rẹ kaki ru unu ohwohwẹ. Ẹsejọ mẹ rẹ tubẹ lẹ se Ọghẹnẹ re mẹ sai ru omoware yena.” Kọ oware jọ u fi obọ họ kẹ owhẹ fi ozodhẹ kparobọ no evaọ usiuwoma? Ta oware na kẹ oniọvo nọ wha gbẹ rrọ usiuwoma.
3. Eme ma rẹ sae ta kẹ oniọvo nọ ma gbẹ rrọ usiuwoma nọ u re fi obọ họ kẹe wo onaa usiuwoma ota?
3 Ta Kpahe Onaa Usiuwoma Ota Ra: Kọ who wo ẹme ọkpẹkpẹe jọ hayo onọ jọ, ẹsejọhọ kpahe oware jọ nọ o via evaọ ẹwho ra nọ who re ro mu usiuwoma họ? Kọ who fi eme ba oriruo usiuwoma ota jọ no nọ ahwo a jọ gaviezọ kẹ owhẹ ziezi? Tae kẹ ohwo nọ wha gbẹ rrọ usiuwoma. (Itẹ 27:17) Nọ wha te bi zihe bru ohwo nọ whọ ta usiuwoma kẹ, whọ rẹ sae vuẹ oniọvo nọ wha gbẹ rrọ usu kpahe ẹme nọ whọ te ta kugbe ohwo na. Nọ wha te ru uwuhrẹ Ebaibol no, whọ rẹ sae vuẹ oniọvo na kpahe oware nọ o lẹliẹ owhẹ rehọ ẹme jọ, oria Ebaibol jọ, hayo onaa jọ ruiruo evaọ uwuhrẹ na.
4. Fikieme ma re ro fi obọ họ kẹ inievo nọ ma gbẹ rrọ usiuwoma?
4 Evaọ ikpe-udhusoi ọsosuọ, orọnikọ ahwo nọ a jọ ukoko ho ọvo inievo na a je fi obọ họ kẹ hẹ. A riẹ nọ o roja re a tuduhọ ohwohwo awọ jẹ bọ ohwohwo ga. (Iruẹru 11:23; 15:32) Pọl ukọ na o wuhrẹ Timoti, kẹsena ọ tẹ ta kẹe re ọ rehọ eware nọ o wuhrẹ na fi obọ họ kẹ amọfa. (2 Tim. 2:2) Nọ ma te bi fi obọ họ kẹ inievo nọ ma gbẹ rrọ usiuwoma, eva e te were ae, a ti wo onaa usiuwoma ota ziezi, ma ve je ru Jihova Ọsẹ obọ odhiwu mai eva were.—Hib. 13:15, 16.